ନୂଆଦିଲ୍ଲୀ,୩୦।୯: ବ୍ୟାଙ୍କ ଫିକ୍ସଡ୍ ଡିପୋଜିଟ୍(ଏଫ୍ଡି) ଦୀର୍ଘ ସମୟ ଧରି ଏପରି ନିବେଶକମାନଙ୍କ ପାଇଁ ପସନ୍ଦଯୋଗ୍ୟ ସଞ୍ଚୟ ବିକଳ୍ପ ହୋଇ ରହିଛି, ଯେଉଁମାନେ ଅଧିକ ରିଟର୍ନ ଅପେକ୍ଷା ସୁରକ୍ଷିତ ନିବେଶକୁ ଅଗ୍ରାଧିକାର ଦିଅନ୍ତି। କିନ୍ତୁ ଆପଣ କେବେ ଭାବିଛନ୍ତି କି ଜଣେ ଗ୍ରାହକ ପାଇଁ ଏଫ୍ଡିରେ ନିବେଶର ସର୍ବାଧିକ ସୀମା କ’ଣ? ଅନେକେ ଏହା ଜାଣିବାକୁ ଉତ୍ସୁକ ହୋଇଥାନ୍ତି, ଫିକ୍ସଡ୍ ଡିପୋଜିଟରେ କେତେ ରାଶି ନିବେଶ କରାଯାଇ ପାରିବ? ଏହାର କୌଣସି ସୀମା ଅଛି କି? ଏଫ୍ଡିରେ କେତେ ନିବେଶ କରାଯାଇ ପାରିବ?
ମୂଳ ପ୍ରଶ୍ନ ହେଉଛି, ଏଫ୍ଡିରେ କୌଣସି ସର୍ବାଧିକ ସୀମା ଅଛି କି? ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆର୍ବିଆଇ) ଏଫ୍ଡି ଉପରେ କୌଣସି ସର୍ବାଧିକ ନିବେଶ ସୀମା ନିର୍ଦ୍ଧାରଣ କରି ନାହିଁ। ଅର୍ଥାତ ଆପଣ ଯେକୌଣସି ରାଶିରେ FD ଖୋଲି ପାରିବେ ଏବଂ ବିଭିନ୍ନ ବ୍ୟାଙ୍କରେ ଏକାଧିକ ଏଫ୍ଡି ଆକାଉଣ୍ଟ ମଧ୍ୟ ଖୋଲି ପାରିବେ। କିନ୍ତୁ ମନେ ରଖିବା କଥା ହେଉଛି ଯେ ବ୍ୟାଙ୍କିଂ ନିୟମ ଅନୁଯାୟୀ ପ୍ରତ୍ୟେକ ଜମାକାରୀଙ୍କୁ ଡିପୋଜିଟ ଇନସୁରାନ୍ସ ଆଣ୍ଡ କ୍ରେଡିଟ ଗ୍ୟାରେଣ୍ଟି କର୍ପୋରେଶନ (ଡିଆଇସିଜିସି) ତରଫରୁ ମୋଟ ୫ ଲକ୍ଷ ଟଙ୍କା ପର୍ଯ୍ୟନ୍ତ ବୀମା ସୁରକ୍ଷା ମିଳିଥାଏ, ଯେଉଁଥିରେ ମୂଳଧନ ଏବଂ ସୁଧ ଉଭୟ ଅନ୍ତର୍ଭୁକ୍ତ। ଅର୍ଥାତ ଯଦି ବ୍ୟାଙ୍କ ଡିଫଲ୍ଟ କରେ, ତେବେ ୫ ଲକ୍ଷ ଟଙ୍କା ପର୍ଯ୍ୟନ୍ତ ରାଶି ସୁରକ୍ଷିତ ବୋଲି ବିବେଚନା କରାଯାଏ।
ଏଫ୍ଡି ସମ୍ବନ୍ଧରେ କିଛି ଜରୁରୀ ତଥ୍ୟ ନ୍ୟୂନତମ ଓ ସର୍ବାଧିକ ରାଶି: ଅଧିକାଂଶ ବ୍ୟାଙ୍କରେ ଏଫଡିର ନ୍ୟୂନତମ ନିବେଶ ୧,୦୦୦ ଟଙ୍କାରୁ ୧୦,୦୦୦ ଟଙ୍କା ମଧ୍ୟରେ ହୋଇଥାଏ। ସର୍ବାଧିକ ରାଶିର କୌଣସି ସୀମା ନାହିଁ।
ଅବଧି ଓ ପୂର୍ବ ଉଠାଣ: ଏଫ୍ଡିର ଅବଧି ୭ ଦିନରୁ ୧୦ ବର୍ଷ ପର୍ଯ୍ୟନ୍ତ ହୋଇପାରେ। ଯଦି ଆପଣ ର୍ନିଦ୍ଧାରିତ ସମୟ ପୂର୍ବରୁ ଏଫ୍ଡି ଭାଙ୍ଗନ୍ତି, ତେବେ ବ୍ୟାଙ୍କ ଜରିମାନା ଏବଂ କମ ସୁଧ ହାର ଲାଗୁ କରିଥାଏ।
ସୁଧ ହାର: ସୁଧ ହାର ବ୍ୟାଙ୍କ ଏବଂ ଅବଧି ଉପରେ ନିର୍ଭର କରେ। ବୟୋଜ୍ୟେଷ୍ଠ ନାଗରିକମାନେ ସାଧାରଣ ନିବେଶକଙ୍କ ତୁଳନାରେ ଅଧିକ ସୁଧ ହାର ପାଇଥାନ୍ତି।
ଟ୍ୟାକ୍ସ ପ୍ରଭାବ: ଏଫ୍ଡିରୁ ମିଳୁଥିବା ସୁଧ ଆପଣଙ୍କ ଆୟକର ସ୍ଲାବ ଅନୁଯାୟୀ ଟ୍ୟାକ୍ସଯୋଗ୍ୟ। କିନ୍ତୁ ଟ୍ୟାକ୍ସ ସେଭିଂ ଏଫ୍ଡିରେ ନିବେଶ କଲେ ଧାରା ୮୦ସି ଅନୁଯାୟୀ ଟ୍ୟାକ୍ସ ଛାଡ଼ ମିଳିପାରେ।
ନାମାଙ୍କନ ସୁବିଧା: ଆରବିଆଇ ସମସ୍ତ ଏଫ୍ଡି ଆକାଉଣ୍ଟରେ ନାମାଙ୍କନକୁ ବାଧ୍ୟତାମୂଳକ କରିଛି, ଯାହା ଦ୍ୱାରା ମୃତ୍ୟୁ ପରେ ରାଶି ହସ୍ତାନ୍ତର ସହଜ ହୋଇଥାଏ।
ଟିଡିଏସ୍ କଟୌତୀ: ଯଦି ବାର୍ଷିକ ସୁଧ ଆୟ ୪୦,୦୦୦ ଟଙ୍କା (ବୟୋଜ୍ୟେଷ୍ଠ ନାଗରିକଙ୍କ ପାଇଁ ୫୦,୦୦୦ ଟଙ୍କା) ରୁ ଅଧିକ ହୁଏ, ତେବେ ବ୍ୟାଙ୍କ ଟିଡିଏସ୍ କାଟିଥାଏ।
ଅଟୋ-ରିନ୍ୟୁଅଲ ଓ ମ୍ୟାଚୁରିଟି: ଅନେକ ବ୍ୟାଙ୍କ ଏଫଡିର ଅବଧି ଶେଷ ହେବା ପରେ ଏହାକୁ ସ୍ବୟଂଚାଳିତ ଭାବେ ରିନ୍ୟୁ କରିଦିଅନ୍ତି। ତେଣୁ ନିବେଶକମାନଙ୍କୁ ଆଗୁଆ ନିଷ୍ପତ୍ତି ନେବାକୁ ପଡ଼ିଥାଏ ଯେ ସେମାନେ ରାଶି ଉଠାଇବାକୁ ଚାହୁଁଛନ୍ତି ନା ପୁନଃ ନିବେଶ କରିବାକୁ ଚାହୁଁଛନ୍ତି।
ଏଫଡିକୁ ଏବେ ମଧ୍ୟ ସବୁଠାରୁ ସୁରକ୍ଷିତ ନିବେଶ ବିକଳ୍ପ ବୋଲି ବିବେଚନା କରାଯାଏ କାରଣ ଏଥିରେ ମୂଳଧନ ସୁରକ୍ଷିତ ରହିଥାଏ ଏବଂ ସୁଧ ହାର ସ୍ଥିର ରହିଥାଏ। ତେବେ, ନିବେଶ ପୂର୍ବରୁ ସୁଧ ହାର, ଟ୍ୟାକ୍ସ ନିୟମ ଏବଂ ବୀମା କଭରେଜ ପରି ଦିଗଗୁଡ଼ିକୁ ବୁଝିବା ଜରୁରୀ। ଯଦି ଆପଣ ଏଫଡିରେ ନିବେଶ କରିବାକୁ ଚିନ୍ତା କରୁଛନ୍ତି, ତେବେ ଏହି ସୂଚନା ଆପଣଙ୍କ ପାଇଁ ଅତ୍ୟନ୍ତ ଉପଯୋଗୀ ହୋଇପାରେ।
