ନୟାଗଡ଼ ଅଫିସ,୧୨ା୧୦: ସରକାର ପ୍ରଧାନମନ୍ତ୍ରୀ ଆବାସ ଯୋଜନା ଓ ବିଜୁ ପକ୍କାଘର ଯୋଜନାରେ ଗରିବ ପରିବାରଙ୍କୁ ମାଗଣାରେ ଘର ଯୋଗାଇ ଦେଉଛନ୍ତି। ହେଲେ ଅନେକ ଯୋଗ୍ୟ ପରିବାର ଏହି ତାଲିକାରେ ସାମିଲ ହୋଇପାରୁ ନାହାନ୍ତି। ଗଣିଆ ବ୍ଲକ ଆଡକଟା ପଞ୍ଚାୟତ ଜଗନ୍ନାଥପ୍ରସାଦର ବିକାଶ ସିଂ ଓ ଗଗନ ସିଂଙ୍କ ପରିବାର ଏଥିରୁ ବଞ୍ଚିତ ହୋଇ ପାଲଟଣା ଝାଟିମାଟି ଘରେ ଜୀବନ ବିତାଉଛନ୍ତି। ସେମାନଙ୍କ କହିବା କଥା ଘରଟିଏ ପାଇଁ ଲୋକ ପ୍ରତିନିଧିଙ୍କଠାରୁ ଆରମ୍ଭ କରି ବିଡିଓ, ଉପଜିଲାପାଳଙ୍କୁ ଭେଟିଥିଲେ। ପ୍ରତିଶ୍ରୁତି ମିଳିଥିଲେ ବି ଯୋଜନାର ସୁଫଳ ପାଇନାହାନ୍ତି।
ବିକାଶ ଓ ଗଗନ ଦୁଇ ଭାଇ। ଉଭୟ ରହୁଥିବା ଘରେ କାନ୍ଥ ନାହିଁ। କାଠ, ବାଉଁଶ ଉପରେ ମାଟି ଛଟାଯାଇଛି। ପୁଣି ଚାଳ ଛପର କରିବାକୁ ପାଖରେ ଅର୍ଥ ନ ଥିବାରୁ ପାଲଟାଣି ରହୁଛନ୍ତି। ବିକାଶଙ୍କ ପରିବାରରେ ୪ଜଣ ସଦସ୍ୟ। ଏକ କେସ୍ରେ ବିକାଶ ଜେଲ ଯାଇଥିବାବେଳେ ପରର କାମଧନ୍ଦା କରି ସ୍ତ୍ରୀ ଘର ଚଳାଉଥିଲେ ମଧ୍ୟ ତାହା କାଠିକର ପାଠ। ଦିନେ ଖାଇଲେ ଆଉ ଦିନେ ଉପବାସ। ରାଶନ କାର୍ଡ ଥିବାରୁ କଷ୍ଟେମଷ୍ଟେ ଚଳିଯାଉଛନ୍ତି। ସେହିପରି ଗଗନଙ୍କ ପରିବାରର ସଦସ୍ୟ ସଂଖ୍ୟା ୫। ମୂଲ ଲାଗି ଗଗନ ଘର ଚଳାଇ ଆସୁଛନ୍ତି। ଗଗନ କୁହନ୍ତି, ଯେଉଁମାନଙ୍କର କୋଠା ଓ ଆଜବେଷ୍ଟସ୍ ଘର ଅଛି ସେମାନେ ସରକାରୀ ମାନଦଣ୍ଡ ପୂରଣ କରି ପାରୁଛନ୍ତି। କାରଣ ସେମାନେ ଲାଞ୍ଚ ଦେଇ ଘର କରିପାରୁଛନ୍ତି। ହେଲେ ଆମର ଭଙ୍ଗା ଘର ହୋଇଥିଲେ ହେଁ ମାନଦଣ୍ଡ ପୂରଣ କରୁ ନ ଥିବା ଆଶ୍ଚର୍ଯ୍ୟ କରୁଛି। କେତେଜଣ କୁଜିନେତା ବିଭିନ୍ନ ସମୟରେ ଆସି ଲାଞ୍ଚ ମାଗୁଛନ୍ତି। ଲାଞ୍ଚ ଦେଲେ ଘର ମିଳିଯିବ ନ ହେଲେ ମାନଦଣ୍ଡ ପୂରଣ ହେବନି ବୋଲି କହୁଛନ୍ତି। ହେଲେ ଆମପରି ଗରିବ ଲୋକ ଲାଞ୍ଚ ଦେଇ ଘର କରିବା ସମ୍ଭବ ନୁହେଁ। ଆମ ପାଖରେ ଟଙ୍କା ଥିଲେ ଆମେ ଚାଳଛପର କରି ରହିଥାନ୍ତୁ। ସମିତି ସଭ୍ୟଙ୍କ ଦୟାରୁ ଜରିପାଲଟିଏ ପାଇବା ପରେ ଚାଳରେ ପକାଇ ରହିଛୁ। ପ୍ରାୟ ୧୦ବର୍ଷ ହେଲା ସେ ଘର ପାଇଁ ଲୋକ ପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ଅନୁରୋଧ କରିଆସୁଥିଲେ ବି ସୁଫଳ ପାଇ ନ ଥିବା କହିଛନ୍ତି। ଏ ସମ୍ପର୍କରେ ଗଣିଆ ବିଡିଓ ସିରିୟଲ ଶୁଭ୍ର ପଟେଲ କୁହନ୍ତି, ଏ ନେଇ ଅବଗତ ନ ଥିଲୁ। କେଉଁ କାରଣରୁ ଗ୍ରାମୀଣ ଆବାସ ଯୋଜନାରେ ଘର ହୋଇପାରୁନି ସେ ଦିଗରେ ଅନୁଧ୍ୟାନ କରି ପଦକ୍ଷେପ ନେବୁ।
