ନୂଆଦିଲ୍ଲୀ, ୨୦।୯: ଆର୍ଥିକ ବର୍ଷ ୨୦୨୨-୨୩ରେ ଦେଶର ପରିବାରର ସଞ୍ଚୟ (ହାଉସ୍ହୋଲ୍ଡ ସେଭିଂସ) ୫ ଦଶନ୍ଧିର ସବୁଠାରୁ କମ୍ ରହିଛି ବୋଲି ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆର୍ବିଆଇ) ପକ୍ଷରୁ କୁହାଯାଇଛି। ୨୦୨୧-୨୨ରେ ଏହା ସମୁଦାୟ ଘରୋଇ ଉତ୍ପାଦ (ଜିଡିପି)ର ୭.୨ ପ୍ରତିଶତ ଥିବା ବେଳେ ୨୦୨୨-୨୩ରେ କମି ୫.୧ ପ୍ରତିଶତ ହୋଇଛି। ଏହି ସମୟରେ ଲୋକଙ୍କ ଆୟ ବହୁଳ ମାତ୍ରାରେ ହ୍ରାସ ପାଇଥିବା ବେଳେ ମହାମାରୀ ପରବର୍ତ୍ତୀ ସମୟରେ ଖର୍ଚ୍ଚ ପରିମାଣ ବଢ଼ିଯାଇଛି।
ଦୁଶ୍ଚିନ୍ତାର ବିଷୟ ଯେ, ପରିବାରଗୁଡ଼ିକର ବାର୍ଷିକ ଆର୍ଥିକ ଋଣ ପରିମାଣ ୨୦୨୨-୨୩ରେ ଜିଡିପିର ୫.୮ ପ୍ରତିଶତ ରହିଛି। ୨୦୨୧-୨୨ରେ ଏହା ୩.୮ ପ୍ରତିଶତ ଥିଲା। ଅର୍ଥାତ୍ ୨୦୨୨-୨୩ରେ ରିୟଲ ଇଷ୍ଟେଟ କିଣିବା ଓ ଖାଉଟି ସାମଗ୍ରୀରେ ବ୍ୟୟ କରିବା ଲାଗି ଅତିମାତ୍ରାରେ ଋଣ କରାଯାଇଛି। ଗତ ଆର୍ଥିକ ବର୍ଷରେ ଋଣ ପରିମାଣ ବୃଦ୍ଧି ସ୍ବାଧୀନତା ପରଠାରୁ ଦ୍ୱିତୀୟ ସର୍ବବୃହତ୍ ଥିଲା। କେବଳ ୨୦୦୬-୦୭ ଆର୍ଥିକ ବର୍ଷରେ ଏହା ୬.୭ % ଥିଲା ବୋଲି ରିପୋର୍ଟରୁ ସୂଚନା ମିଳିଛି।
ଆର୍ଥିକ ବର୍ଷ ୨୦୨୦-୨୧ରେ ନେଟ୍ ଘରୋଇ ସମ୍ପତ୍ତି ପରିମାଣ ୨୨.୮ ଟ୍ରିଲିୟନ ଟଙ୍କାକୁ ହ୍ରାସ ପାଇଥିବା ବେଳେ ୨୦୨୧-୨୨ରେ ୧୬.୯୬% ଏବଂ ୨୦୨୨-୨୩ରେ ଏହା ୧୩.୭୬ ଟ୍ରିଲିୟନ ଟଙ୍କାକୁ କମିଛି। ମୁଦ୍ରାସ୍ଫୀତି ଯୋଗୁ ଲୋକଙ୍କ ସଞ୍ଚୟ କମିଯାଇଥିବା ବେଳେ ଆବଶ୍ୟକତା ମେଣ୍ଟାଇବା ସକାଶେ କରାଯାଇଥିବା ଋଣ ପରିବାର ପାଇଁ ବୋଝ ହୋଇଯାଇଛି।
ମୋତିଲାଲ ଓସ୍ଓ୍ବାଲ୍ର ଅର୍ଥନୀତିଜ୍ଞ ନିଖିଲ ଗୁପ୍ତା କହିଛନ୍ତି, ଦୁର୍ବଳ ଆୟ ଅଭିବୃଦ୍ଧି ଓ ଆର୍ଥିକ ସଞ୍ଚୟ ହ୍ରାସର ସଂଯୋଗ ସହିତ ଋଣ ବଢ଼ିଯାଉଥିବାରୁ ଅର୍ଥନୀତିରେ ଅସ୍ବାଭାବିକତା ଦେଖାଦେଇଛି। ସମ୍ଭବତଃ ସେଥିଲାଗି ସ୍ବାଧୀନତା ପରବର୍ତ୍ତୀ ସମୟରେ ପରିବାରର ଋଣ ପରିମାଣ ଦ୍ୱିତୀୟ ସର୍ବାଧିକ ହୋଇଛି।
ଆର୍ବିଆଇ ତଥ୍ୟ କହୁଛି, ପରିବାରର ସଞ୍ଚୟ ଆର୍ଥିକ ବର୍ଷ ୨୦୨୨-୨୩ରେ ତା’ ପୂର୍ବ ବର୍ଷ ତୁଳନାରେ କମ୍ ରହିଥିଲା। ଯଦି ଅର୍ଥନୀତିରେ ଅଭିବୃଦ୍ଧି ଓ ଲୋକଙ୍କ ଆୟ ବଢ଼େ, ତାହା ହେଲେ ପରିବାରର ସଞ୍ଚୟ ଊର୍ଦ୍ଧ୍ୱମୁଖୀ ହୋଇପାରିବ। ଚଳିତ ବର୍ଷରେ ଯଦି ସଞ୍ଚୟ ପରିମାଣ ନ ବଢ଼େ, ତେବେ ଉଭୟ ଖର୍ଚ୍ଚ ଓ ପୁଞ୍ଜିଲଗାଣକୁ ପ୍ରଭାବିତ କରିବ। ଆର୍ଥିକ ବର୍ଷ ୨୦୨୩-୨୪ର ପ୍ରଥମ ତ୍ରୈମାସିକର ଜିଡିପି ତଥ୍ୟ କହୁଛି, ବ୍ୟୟଠାରୁ ପୁଞ୍ଜିଲଗାଣ ସାମାନ୍ୟ ବଢ଼ିଥିବା ବେଳେ ଗ୍ରାମାଞ୍ଚଳଠାରୁ ସହରାଞ୍ଚଳ ଚାହିଦା ଅଧିକ ଥିଲା। ଏଚ୍ଏସ୍ବିସିର ଭାରତୀୟ ଅର୍ଥନୀତିଜ୍ଞ ପ୍ରଞ୍ଜୁଲ ଭଣ୍ଡାରୀ କହିଛନ୍ତି, ଗ୍ରାମାଞ୍ଚଳରେ ଲୋକଙ୍କ ମଜୁରି ହ୍ରାସ ପାଇଥିବା ବେଳେ ଅସ୍ଥାୟୀ ସାମଗ୍ରୀ ସକାଶେ ହେଉଥିବା ଖର୍ଚ୍ଚ ମଧ୍ୟ କମିଯାଇଛି।
ଅଶୋଧିତ ତୈଳର ମୂଲ୍ୟ ବଢ଼ି ବ୍ୟାରେଲ ପିଛା ୯୫ ଡଲାର ହୋଇଯାଇଥିବାରୁ ତାହା ଖାଉଟି ପଦାର୍ଥକୁ ପ୍ରଭାବିତ କରିଚାଲିଛି। ଏଥିସହିତ କୃଷିଜାତ ସାମଗ୍ରୀ ପରିମାଣ ହ୍ରାସ ଗ୍ରାମାଞ୍ଚଳ ଚାହିଦା ଉପରେ ପ୍ରଭାବ ପକାଇବ ବୋଲି ଉକ୍ତ ରିପୋର୍ଟରେ କୁହାଯାଇଛି।
