ବେଡ୍ରୁମ ପାଲଟିଛି ଆଇସିୟୁ, କାର୍ ହୋଇଛି ଆମ୍ବୁଲାନ୍ସ; ପୂରା ଘଟଣା ଜାଣିଲେ ହେବେ ଭାବୁକ
05 ଭୋପାଳ,୨୧ା୧୧: ମଧ୍ୟପ୍ରଦେଶର ଜବଲପୁରରେ ଅବସରପ୍ରାପ୍ତ ଇଞ୍ଜିନିୟର ଅସୁସ୍ଥ ସ୍ତ୍ରୀଙ୍କ ପାଇଁ ତାଙ୍କ ଘରର ସମସ୍ତ ମାନଚିତ୍ର ପରିବର୍ତ୍ତନ କରି ଦେଇଛନ୍ତି। ସେ ତାଙ୍କ ବେଡ୍ରୁମକୁ ଆଇସିୟୁରେ ପରିଣତ କରିଥିବା ବେଳେ ତାଙ୍କ କାର୍କୁ କରିଛନ୍ତି ଆମ୍ବୁଲାନ୍ସ। ବୃତ୍ତିରେ ସେ ଜଣେ ଇଞ୍ଜିନିୟର। କିନ୍ତୁ ସେ ଜଣେ ନର୍ସଙ୍କ ଅପେକ୍ଷା ନିଜ ସ୍ତ୍ରୀଙ୍କର ଅଧିକ ଯତ୍ନ ନିଅନ୍ତି। ଔଷଧ ଦେବାଠାରୁ ଆରମ୍ଭ କରି ନିଜେ ଇଞ୍ଜେକ୍ସନ ଦେବା କାର୍ଯ୍ୟ ମଧ୍ୟ କରିଥାନ୍ତି।
ଜବଲପୁରର ୭୪ ବର୍ଷୀୟ ଜ୍ଞାନପ୍ରକାଶ ଅଡିନାନ୍ସ କାରଖାନାର ଅବସରପ୍ରାପ୍ତ ଇଞ୍ଜିନିୟର। ତାଙ୍କ ପୁଅ ଓ ଝିଅ ବିଦେଶରେ ରହୁଛନ୍ତି। ଏଠାରେ ସେ ତାଙ୍କ ସ୍ତ୍ରୀ କୁମୁଦିନୀଙ୍କ ସହ ରୁହନ୍ତି। ତାଙ୍କ ସ୍ତ୍ରୀ କୁମୁଦିନୀଙ୍କର ସେଟୋ ନାର୍କୋସିସ ନାମକ ଏକ ରୋଗ ଅଛି। ଏହି ରୋଗରେ ସେ ବଞ୍ଚିବା ପାଇଁ ନିରନ୍ତର ଅମ୍ଳଜାନ ଆବଶ୍ୟକ କରିଥାନ୍ତି। ବାରମ୍ବାର ଡାକ୍ତରଖାନା ପରିଦର୍ଶନ କରିବା ପରେ ଜ୍ଞାନପ୍ରକାଶ ତାଙ୍କ ସ୍ତ୍ରୀଙ୍କୁ ଡାକ୍ତରଖାନାରୁ ଏକ ଉନ୍ନତ ତଥା ନିରାପଦ ପରିବେଶ ଦେବାକୁ ଚାହୁଁଥିଲେ। ତେଣୁ ଅବସରପ୍ରାପ୍ତ ଏହି ଇଞ୍ଜିନିୟର ତାଙ୍କ ଘରକୁ ଡାକ୍ତରଖାନା ଏବଂ ତାଙ୍କ କାରକୁ ଅମ୍ଳଜାନ ଫିଟ୍ମେଣ୍ଟ ଆମ୍ବୁଲାନ୍ସରେ ପରିଣତ କରିଦେଲେ।
ଭେଣ୍ଟିଲେଟର, ଅମ୍ଳଜାନ, ବାୟୁ ବିଶୋଧନକାରୀଙ୍କ ବ୍ୟତୀତ ତାଙ୍କ ଘରେ ଏପରି ଅନେକ ସୁବିଧା ଅଛି, ଯାହା ସାଧାରଣ ଡାକ୍ତରଖାନାରେ ମିଳିପାରିବ ନାହିଁ। ଜ୍ଞାନପ୍ରକାଶ ତାଙ୍କ ସ୍ତ୍ରୀଙ୍କ ପାଇଁ ମେଡିକାଲ ଉପକରଣ ମଧ୍ୟ ତିଆରି କରିଛନ୍ତି। ଯେଉଁଥିରେ ମୋବାଇଲ ଷ୍ଟେଥୋସ୍କୋପ ମଧ୍ୟ ଅନନ୍ୟ ଅଟେ। ମୋବାଇଲ ଷ୍ଟେଥୋସ୍କୋପ ସାହାଯ୍ୟରେ ସେ ତାଙ୍କ ସ୍ତ୍ରୀଙ୍କ ହୃଦ୍ସ୍ପନ୍ଦନକୁ ମୋବାଇଲରେ କ୍ୟାପଚର କରି ହ୍ବାଟ୍ସଆପ ଜରିଆରେ ଡାକ୍ତରଙ୍କ ନିକଟକୁ ତାଙ୍କ ସାଉଣ୍ଡ ଫାଇଲ ପଠାନ୍ତି। ଯାହାଫଳରେ ଡାକ୍ତର କୁମୁଦିନୀଙ୍କ ପାଇଁ ଔଷଧ ଲେଖିଥାନ୍ତି।
ଜ୍ଞାନପ୍ରକାଶ ତାଙ୍କ ଘରେ ପର୍ଯ୍ୟାପ୍ତ ପରିମାଣର ଅମ୍ଳଜାନ ସିଲିଣ୍ଡର ରଖିଛନ୍ତି। ଯାହା ଆବଶ୍ୟକ ସମୟରେ ସେ ନିଜେ ପରିବର୍ତ୍ତନ କରିଥା’ନ୍ତି। ଡାକ୍ତରଖାନାର ମହଙ୍ଗା ଚିକିତ୍ସା ବିଷୟରେ ଚିନ୍ତା ନାହିଁ, ଚିକିତ୍ସାରେ ଅବହେଳା କିମ୍ବା ସଂକ୍ରମଣର ଆଶଙ୍କା ବି ନାହିଁ। କୁମୁଦିନୀ ତାଙ୍କ ଘର ଆଇସିୟୁରେ ଉନ୍ନତ ସ୍ବାସ୍ଥ୍ୟ ସୁବିଧା ପାଇପାରୁଛନ୍ତି। ଯେଉଁଥିପାଇଁ ତାଙ୍କ ସ୍ବାସ୍ଥ୍ୟରେ ଉନ୍ନତି ଆସୁଛି।