ଲକ୍ଷ୍ନୌ,୨୩।୧୦: ଉତ୍ତରପ୍ରଦେଶର ଗାଜିପୁର ଥାନା ଅଧୀନ ଇନ୍ଦିରା ନଗର କଲୋନୀ ସି-ବ୍ଲକ୍ରେ ଥିବା ଏକ ଘରେ ନିଆଁ ଲାଗି ଜଣେ ଅବସରପ୍ରାପ୍ତ ପୋଲିସ ଆଇଜିଙ୍କ ମୃତ୍ୟୁ ଘଟିଛି। ସେ ହେଲେ ଦୀନେଶ ଚନ୍ଦ୍ର ପାଣ୍ଡେ(୭୦)। ଏଥିରେ ତାଙ୍କ ସ୍ତ୍ରୀ ଓ ପୁଅ ଗୁରୁତର ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଘରର ତଳ ମହଲାରେ ନିଆଁ ଲାଗିଯିବାରୁ ପରିବାର ସଦସ୍ୟ ବାହାରିପାରି ନ ଥିବା ଜଣାପଡିଛି। ଅଗ୍ନିଶମ କର୍ମଚାରୀ ପହଞ୍ଚି ଆଇଜି ପାଣ୍ଡେ, ସ୍ତ୍ରୀ ଅରୁଣା ଓ ପୁଅ ଶଶାଙ୍କଙ୍କୁ ଉଦ୍ଧାର କରି ହସ୍ପିଟାଲ ପଠାଇଥିଲେ। ସେଠାରେ ଆଇଜିଙ୍କ ମୃତ୍ୟୁ ଘଟିଥିବା ଡାକ୍ତର ଘୋଷଣା କରିଥିଲେ। ହେଲେ ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇନାହିଁ।
