କେନ୍ଦୁଝର,୬ା୧(ସ୍ବ.ପ୍ର.): କେନ୍ଦୁଝର ସଦର ବ୍ଲକ୍ ରଘୁନାଥପୁର ରାଜସ୍ବ ନିରୀକ୍ଷକଙ୍କ ଅଧୀନ ବଡ଼ ମନୋହରପୁର ନିକଟ ସଂରକ୍ଷିତ ଶାଳ ଜଙ୍ଗଲ ନିକଟରେ ବେଆଇନ ହଟ୍ ମିକ୍ସ ପ୍ଲାଣ୍ଟ୍ ଚାଲୁଛି। ଏଥିସହ ଉକ୍ତ ସ୍ଥାନରେ ବିନା ପ୍ରଦୂଷଣ ନିୟନ୍ତ୍ରଣରେ ଏକ ଚିପ୍ସ କ୍ରଶର ମଧ୍ୟ ଚାଲୁଥିବାରୁ ଶବ୍ଦ ଓ ବାୟୁ ପ୍ରଦୂଷଣ ବଢ଼ିବାରେ ଲାଗିଛି। ପ୍ରଦୂଷଣ ନିୟନ୍ତ୍ରଣ ନିୟମ ଅନୁଯାୟୀ ଧୂଳିଧୂଆଁରୁ ରକ୍ଷା ପାଇଁ ଚାରିଆଡ଼େ ଉଚ୍ଚ ପାଚେରି (ୱିଣ୍ଡ୍ ବ୍ରେକିଂ ୱାଲ) କିମ୍ବା ସବୁଜ ବଳୟ ନାହିଁ। ସେହିପରି ବାୟୁ ପ୍ରଦୂଷଣ ରୋକିବା ପାଇଁ ନିୟମିତ ପାଣି ସିଞ୍ଚନ ହେଉନି। ଫଳରେ ପଥର ଗୁଣ୍ଡ ଉଡ଼ି ଚାରିଆଡ଼େ ପଡୁଥିବାରୁ ଜଙ୍ଗଲରେ ହାତୀ ସମେତ ଅନ୍ୟ ଜଙ୍ଗଲୀ ପ୍ରାଣୀ ପ୍ରଭାବିତ ହେଉଛନ୍ତି। ସ୍ଥାନୀୟ ଲୋକେ ମଧ୍ୟ ଧୂଳିଧୂଆଁରେ ଅତିଷ୍ଠ ହୋଇ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ମୁତାବକ, କ୍ରଶର ଏବଂ ହଟ୍ ମିକ୍ସ ପ୍ଲାଣ୍ଟଠାରୁ ୫୦୦ ମିଟରରୁ କମ୍ ଦୂରତାରେ ରଘୁନାଥପୁର ସଂରକ୍ଷିତ ଜଙ୍ଗଲ ରହିଛି। ଏହି ସ୍ଥାନରେ ବର୍ଷର ସବୁ ସମୟରେ ହାତୀ ତଥା ଅନ୍ୟାନ୍ୟ ବନ୍ୟପ୍ରାଣୀଙ୍କ ଚଳପ୍ରଚଳ ରହିଥାଏ। ଦିନରାତି କ୍ରଶର ଓ ହଟ୍ମିକ୍ସ ପ୍ଲାଣ୍ଟ୍ ଚାଲୁଥିବାରୁ ବହୁ ପରିମାଣର ଶବ୍ଦ ପ୍ରଦୂଷଣ ହେଉଛି। ହଟ୍ ମିକ୍ସ ବା ପିଚୁ ଗୋଳା କାରଖାନାରୁ କଳା ଧୂଆଁ ବହୁ ପରିମାଣର ନିର୍ଗତ ହୋଇ ବାୟୁମଣ୍ଡଳକୁ ଦୂଷିତ କରୁଛି। ଏହାକୁ ରୋକିବା ପାଇଁ କୌଣସି ପଦକ୍ଷେପ ନିଆଯାଉ ନ ଥିବାରୁ ରାଜସ୍ବ, ଜଙ୍ଗଲ, ପ୍ରଦୂଷଣ ନିୟନ୍ତ୍ରଣ ବୋର୍ଡର ଭୂମିକାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ଏହାକୁ ବସାଇବା ପାଇଁ ପ୍ରଦୂଷଣ ନିୟନ୍ତ୍ରଣ ବୋର୍ଡର ଅନୁମତି ନିଆଯାଇଛି କି ନାହିଁ ତାହା ତଦନ୍ତ ସାପେକ୍ଷ। ଉକ୍ତ ଶାଳ ଜଙ୍ଗଲ ପରିବେଷ୍ଟିତ ସ୍ଥାନର ପରିସୀମା ଚିହ୍ନଟ ହୋଇ ନ ଥିବାରୁ ଏଣେ ତେଣେ ମେଟାଲ, ଚିପ୍ସ, ବୋଲ୍ଡର ଗଦା ହୋଇରହୁଛି। ଏପରିକି ପାଖରେ ଥିବା ଜଙ୍ଗଲକୁ ଅନଧିକାର ବ୍ୟବହାର କରୁଥିବାରୁ ସ୍ଥାନୀୟ ଲୋକମାନେ ଅସନ୍ତୋଷ ବ୍ୟକ୍ତ କରୁଛନ୍ତି। ଅନ୍ୟପକ୍ଷରେ ଉକ୍ତ ସ୍ଥାନରେ ବହୁ ପରିମାଣରେ ପଥର ଜମା ହୋଇ ରହିଛି। ତେବେ ଏତେ ପରିମାଣର ପଥର ଜମା ହୋଇ ରହିଥିଲେ ହେଁ ତାହା କେଉଁଠୁ ଆସିଲା ତାହାର ଯାଞ୍ଚ କରାଯାଇ ପରିବେଶ ସୁରକ୍ଷା ଆଇନ ୧୯୮୮ ଅନୁଯାୟୀ କାଯର୍ର୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି।
ପ୍ଲାଣ୍ଟର ମ୍ୟାନେଜର ବିରଞ୍ଚତ୍ ବେହେରା କହିଛନ୍ତି, ନିୟମାନୁଯାୟୀ ପ୍ରଦୂଷଣ ବିଭାଗର ଅନୁମତିରେ ପ୍ଲାଣ୍ଟ୍ ଚାଲିଛି। ନିଜର ଗୋପାଳପୁର କ୍ୱାରିରୁ ପଥର ଅଣାଯାଉଛି। ଏ ସମ୍ପର୍କରେ ସଦର ରେଞ୍ଜର ବିଜୟ ମହାନ୍ତ କୁହନ୍ତି, ସଂରକ୍ଷିତ ଜଙ୍ଗଲର ୫୦୦ ମିଟରରେ କୌଣସି ପ୍ରକଳ୍ପ ହୋଇପାରିବ ନାହିଁ। ଯଦି ସେଭଳି ସ୍ଥିତି ଆସେ ତେବେ ବନ ବିଭାଗର ଅନୁମତି ନେବା ଜରୁରୀ। ଏଥିରେ ଖିଲାପ ହୋଇଥିଲେ ଯାଞ୍ଚ କରି ପଦକ୍ଷେପ ନିଆଯିବ। ଏ ନେଇ ଓଡ଼ିଶା ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ପ୍ରଶାନ୍ତ କର କହିଛନ୍ତି, ଏହାର ସେ ତଦନ୍ତ କରି କହିପାରିବେ। ସଦର ତହସିଲଦାର ଆଶିଷ ମହାପାତ୍ର କହିଛନ୍ତି, ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
