କଟକ ଅଫିସ,୨୧ା୪: ମଙ୍ଗଳାବାଗ ଥାନା ପ୍ରାଣୀଧନ ନିର୍ଦ୍ଦେଶାଳୟ ପରିସରକୁ ସ୍ଥାନାନ୍ତର କରାଯିବ। ଓଏମ୍ପି ଛକ ନିକଟ ଅଧ ଏକର ଜମିରେ ବ୍ଲଡ୍ ବ୍ୟାଙ୍କ ଷ୍ଟାଫ କ୍ୱାର୍ଟର୍ସ ନିର୍ମାଣ ହେବ। ଏସ୍ସିବି ମେଡିକାଲକୁ ବିଶ୍ୱସ୍ତରୀୟ କରିବା ପାଇଁ ସମ୍ପ୍ରସାରଣ କାର୍ଯ୍ୟ ଜାରି ରହିଛି। ଏହାକୁ ଅଧିକ ତ୍ୱରାନ୍ବିତ କରିବା ପାଇଁ ପ୍ରଶାସନ ଗୁରୁତ୍ୱ ଦେଇଛି। ଏହି ପରିପ୍ରେକ୍ଷୀରେ ଗୁରୁବାର କଟକ ଉନ୍ନୟନ କର୍ତ୍ତୃପକ୍ଷ(ସିଡିଏ) ଅଧ୍ୟକ୍ଷ ତଥା ପ୍ରକଳ୍ପ କାର୍ଯ୍ୟକାରୀ କମିଟି ଅଧ୍ୟକ୍ଷ ଅନିଲ କୁମାର ସାମଲ ଏସ୍ସିବି ମେଡିକାଲ ପରିଦର୍ଶନ କରିବା ସହ ନିର୍ମାଣ କାର୍ଯ୍ୟର ସମୀକ୍ଷା କରିଥିଲେ।
୨୦୨୩ ସୁଦ୍ଧା ପ୍ରକଳ୍ପ କାର୍ଯ୍ୟ ଶେଷ ହେବା ପାଇଁ ଲକ୍ଷ୍ୟଧାର୍ଯ୍ୟ ହୋଇଛି। ଏଥିସହ ହସ୍ପିଟାଲର ୨ ପଟରେ ଆରମ୍ଭ ହୋଇଥିବା ୪ ଲେନ୍ କାର୍ଯ୍ୟ ଆସନ୍ତା ୪ ମାସ ମଧ୍ୟରେ ଶେଷ ହେବ ବୋଲି ସାମଲ ସୂଚନା ଦେଇଛନ୍ତି। ହସ୍ପିଟାଲର ୪ ପାଖରୁ ଗୋଟିଏ ପଟରେ ତାଳଦଣ୍ଡା କେନାଲ ରାସ୍ତା ରହିଥିବାବେଳେ ଅନ୍ୟ ପଟରେ ରିଂବନ୍ଧ ରାସ୍ତା ରହିଛି। ସେହିପରି ଅନ୍ୟ ଦୁଇ ପଟରୁ ଲେଫ୍ଟ ଆକ୍ସେସ୍ ରୋଡ୍ ଏବଂ ରାଇଟ୍ ଆକ୍ସେସ୍ ରୋଡ କାର୍ଯ୍ୟ ଆରମ୍ଭ ହୋଇଛି। ଲେଫ୍ଟ ଆକ୍ସେସ ଓ ରାଇଟ୍ ଆକ୍ସେସ୍ ରୋଡ ପାଇଁ ଜମି ଅଧିଗ୍ରହଣ ସରିଥିବାବେଳେ ବାକି ୨ଟି ଜମିର ଅଧିଗ୍ରହଣ କାର୍ଯ୍ୟ ଜାରି ରହିଛି। ସେହିପରି ନୂତନ ରେଡ୍କ୍ରସ୍ ବିଲ୍ଡିଂର ନିର୍ମାଣ କାର୍ଯ୍ୟ ୨ ମାସ ମଧ୍ୟରେ ଶେଷ ହେବା ପରେ ଉକ୍ତ ପୁରୁଣା ବିଲ୍ଡିଂକୁ ଭାଙ୍ଗି ଦିଆଯିବ ବୋଲି ସାମଲ କହିଛନ୍ତି। ଏସ୍ସିବି ସମ୍ପ୍ରସାରଣ ପ୍ରକଳ୍ପ ପାଇଁ ୧୩ଟି କାର୍ଯ୍ୟ (ରେସିଡେନ୍ସିଆଲ) ନାଗାର୍ଜୁନ ନାମକ ସଂସ୍ଥାକୁ ଦିଆଯାଇଥିଲାବେଳେ କ୍ଲିନିକାଲ ବ୍ଲକର ୪ଟି ପ୍ରକଳ୍ପକୁ ଏଲ୍ଆଣ୍ଡ୍ଟିକୁ ଦିଆଯାଇଛି। ୨୮୮୦ କୋଟି ଟଙ୍କା ବ୍ୟୟରେ ଏସ୍ସିବିର କ୍ଲିନିକାଲ ବ୍ଲକ କାର୍ଯ୍ୟ ଜାରି ରହିଛି। ବ୍ଲଡବ୍ୟାଙ୍କ ବିଲ୍ଡିଂର ନିର୍ମାଣ କାର୍ଯ୍ୟ ପିଡବ୍ଲ୍ୟୁଡି ଦ୍ୱାରା କରାଯାଉଥିବା ସମ୍ପର୍କରେ ସାମଲ ସୂଚନା ଦେଇଛନ୍ତି। ଏହି ପରିଦର୍ଶନବେଳେ ଏଡିଏମ୍(ରେଭିନ୍ୟୁ) ପୂର୍ଣ୍ଣଚନ୍ଦ୍ର ମିଶ୍ର୍ର, କଟକ ସଦର ତହସିଲଦାରଙ୍କ ସମେତ ଏସ୍ସିବି ମେଡିକାଲ ରେଜିଷ୍ଟ୍ରାର ପ୍ରମୁଖ ଉପସ୍ଥିତ ଥିଲେ।