ମୁମ୍ବାଇ, ୨୮।୩: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଦୁଇ ନୂଆ ଦଳ ଗୁଜରାଟ ଟାଇଟାନ୍ସ ଓ ଲକ୍ଷ୍ନୌ ସୁପର ଜିଆଣ୍ଟ୍ସ ମଧ୍ୟରେ ପ୍ରଥମ ମ୍ୟାଚ ସୋମବାର ଅନୁଷ୍ଠିତ ହୋଇଛି। ଦୀପକ ହୁଦା ଓ ଆୟୂଷ ବାଦୋନୀଙ୍କ ଅର୍ଦ୍ଧଶତକ ବଳରେ ଲକ୍ଷ୍ନୌ ଦଳ ୨୦ଓଭରରେ ୬ ଉଇକେଟ ହରାଇ ୧୫୮ ରନ ସଂଗ୍ରହ କରିଛି। ଟସ୍ ଜିତି ଗୁଜରାଟ ଟାଇଟାନ୍ସ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲେ। ମହମ୍ମଦ ଶାମି ଓ ବରୁଣ ଆରୋନ ମାତ୍ର ୨୯ ରନ ମଧ୍ୟରେ ଲକ୍ଷ୍ନୌର ୪ଟି ଉଇକେଟ ନେଇ ଅଧିନାୟକଙ୍କ ନିଷ୍ପତ୍ତିକୁ ଉଚିତ ସାବ୍ୟସ୍ତ କରିଥିଲେ। ଶାମି ଘାତକ ବୋଲିଂ କରି ପ୍ରତିପକ୍ଷ ଦଳର ଅଧିନାୟକ ଲୋକେଶ ରାହୁଲ (୦) କ୍ୱିଣ୍ଟନ ଡି’କକ୍ (୭) ଓ ମନୀଷ ପାଣ୍ଡେ (୬)ଙ୍କୁ ଆଉଟ କରିଥିଲେ। ଇଭିନ ଲିଓ୍ବିସ (୧୦)ଙ୍କୁ ପ୍ୟାଭିଲିୟନ ପଠାଇଥିଲେ ଆରୋନ। ତେବେ ଦୀପକ ହୁଦା ଓ ଯୁବ ଖେଳାଳି ଆୟୂଷ ବାଦୋନୀ ୫ମ ଉଇକେଟରେ ୬୮ ବଲ୍ରୁ ୮୭ ରନ କରି ଇନିଂସ ସମ୍ଭାଳିଥିଲେ। ୪୧ ବଲ୍ରୁ ୬ ଚୌକା ଓ ୨ ଛକା ସହାୟତାରେ ୫୫ ରନ କରିଥିବା ହୁଦାଙ୍କୁ ଆଉଟ କରି ଗୁଜରାଟକୁ ବ୍ରେକ୍ ଥ୍ରୁ ଦେଇଥିଲେ ତାରକା ସ୍ପିନର ରଶିଦ ଖାଁ। ସେଟ୍ ବ୍ୟାଟର ବୋଦାନୀ ନିଜ ପ୍ରଥମ ଆଇପିଏଲ୍ ମ୍ୟାଚରେ ହାସଲ କରିଥିଲେ ଅର୍ଦ୍ଧଶତକ। ସେ ୪୧ ବଲ୍ରୁ ୪ ଚୌକା ଓ ୩ ଛକା ସହାୟତାରେ ୫୪ ରନକରି ଶେଷ ବଲ୍ରେ ଆଉଟ ହୋଇଥିଲେ। କୃନାଲ ପାଣ୍ଡ୍ୟା ୧୩ ବଲ୍ରୁ ୨୧ (୩ ଚୌକା) ରନରେ ଅପରାଜିତ ରହିଥିଲେ। ଗୁଜରାଟ ପକ୍ଷରୁ ମହମ୍ମଦ ସାମି ୩ଟି ବରୁଣ ଆରୋନ ୨ଟି ଓ ରଶିଦ ଖାଁ ଗୋଟିଏ ଉଇକେଟ ନେଇଥିଲେ।
