ଶ୍ରୀଗଙ୍ଗାନଗର,୫।୨: ରାଜସ୍ଥାନରୁ ଏକ ଚାଞ୍ଚଲ୍ୟକର ହତ୍ୟାକାଣ୍ଡର ଖବର ସାମ୍ନାକୁ ଆସିଛି। ଜଣେ ନବବିବାହିତ ଯୁବକଙ୍କୁ ତାଙ୍କ ସ୍ତ୍ରୀ ନିଜ ପ୍ରେମିକ ସହ ମିଶି ଅତି ନିର୍ମମ ଭାବେ ହତ୍ୟା କରିଛନ୍ତି। ପ୍ରଥମେ ଏହା ଏକ ‘ହିଟ୍-ଏଣ୍ଡ-ରନ୍’ ମାମଲା ଭଳି ମନେ ହେଉଥିଲେ ମଧ୍ୟ ପୋଲିସ ତଦନ୍ତ ପରେ ଏହି ଜଘନ୍ୟ ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଛି।
୩ ମାସ ପୂର୍ବରୁ ଆଶିଷ ଏବଂ ଅଞ୍ଜୁଙ୍କ ବିବାହ ହୋଇଥିଲା। ଗତ ଜାନୁଆରୀ ୩୦ ତାରିଖ ରାତି ପ୍ରାୟ ୯ଟା ସମୟରେ ଉଭୟ ଖାଇସାରି ବୁଲିବାକୁ ଯାଇଥିଲେ। ଅଞ୍ଜୁଙ୍କ କହିବା ଅନୁଯାୟୀ, ଏକ ଅଜ୍ଞାତ ଗାଡ଼ି ସେମାନଙ୍କୁ ଧକ୍କା ଦେଇଥିଲା। ଯେଉଁଥିରେ ଆଶିଷଙ୍କ ମୃତ୍ୟୁ ଘଟିଥିଲା। କେବଳ ସେତିକି ନୁହେଁ, ଅଭିଯୁକ୍ତମାନେ ଅଞ୍ଜୁଙ୍କ ସୁନା ଅଳଙ୍କାର ଲୁଟି ନେଇଥିବା ଏବଂ ସେ ଅଚେତ ହୋଇ ପଡ଼ିଥିବା ସେ ପୋଲିସକୁ କହିଥିଲେ।
ଶ୍ରୀଗଙ୍ଗାନଗର ଏସପି ଅମୃତା ଦୁହାନଙ୍କ ସୂଚନା ଅନୁଯାୟୀ, ପୋଲିସର ତଦନ୍ତ ସମୟରେ ଅଞ୍ଜୁଙ୍କ ବୟାନରେ ଅନେକ ଅସଙ୍ଗତି ଦେଖାଦେଇଥିଲା। ଆଶିଷଙ୍କ ଶରୀରରେ ଆଘାତ ଚିହ୍ନ ସହ ଗଳା ଚିପି ହତ୍ୟା କରାଯାଇଥିବା ପ୍ରମାଣ ମିଳିଥିଲା। ଅନ୍ୟପଟେ, ଅଞ୍ଜୁଙ୍କ ଶରୀରରେ କୌଣସି ଆଘାତ ନଥିଲା। ପରେ ଅଞ୍ଜୁ ନିଜ ପୂର୍ବ ପ୍ରେମିକ ସଞ୍ଜୁ ସହ ନିୟମିତ ଯୋଗାଯୋଗରେ ଥିବା ଜଣାପଡ଼ିଥିଲା।
ତେବେ ରିପୋର୍ଟ ଅନୁଯାୟୀ ଅଞ୍ଜୁ ନିଜ ବାହାଘରରେ ଖୁସି ନଥିଲେ। ପ୍ରେମିକ ସଞ୍ଜୁ ସହ ମିଶି ଆଶିଷଙ୍କୁ ରାସ୍ତାରୁ ହଟାଇବାକୁ ଯୋଜନା କରିଥିଲେ। ସଞ୍ଜୁ ଏବଂ ତାଙ୍କର ଦୁଇ ସହଯୋଗୀ (ରକି ଓ ବାଦଲ) ପୂର୍ବରୁ ଏକ ନିଛାଟିଆ ରାସ୍ତାରେ ଲୁଚି ରହିଥିଲେ। ଅଞ୍ଜୁ ଆଶିଷଙ୍କୁ ସେହି ସ୍ଥାନକୁ ନେଇଯିବା ପରେ ସମସ୍ତେ ମିଶି ତାଙ୍କୁ ହତ୍ୟା କରିଥିଲେ। ଲୁଟ୍ର ରୂପ ଦେବା ପାଇଁ ଅଞ୍ଜୁ ନିଜ ଫୋନ୍ ଓ କାନଫୁଲ ସେମାନଙ୍କୁ ଦେଇଦେଇଥିଲେ।
ମେଘାଳୟ ହନିମୁନ୍ ମର୍ଡର ସହ ସମାନତା
ଏହି ଘଟଣାଟି କିଛି ଦିନ ପୂର୍ବରୁ ମେଘାଳୟରେ ଘଟିଥିବା ‘ସୋନମ୍ ଓ ରାଜା’ ହତ୍ୟାକାଣ୍ଡ ସହ ବହୁତ ମେଳ ଖାଉଛି। ଯେଉଁଠି ସ୍ତ୍ରୀ ସୋନମ୍ ନିଜ ପ୍ରେମିକ ସହ ମିଶି ସ୍ୱାମୀଙ୍କୁ ହନିମୁନ୍ ସମୟରେ ହତ୍ୟା କରିଥିଲେ।
ବର୍ତ୍ତମାନ ପୋଲିସ ଅଞ୍ଜୁ, ପ୍ରେମିକ ସଞ୍ଜୁ ଏବଂ ଅନ୍ୟ ଦୁଇ ସହଯୋଗୀଙ୍କୁ ଗିରଫ କରି କୋର୍ଟ ଚାଲାଣ କରିଛି।
