ଓ୍ବାଶିଂଟନ୍,୨୩ା୩(ରଏଟର୍ସ):ଆମେରିକା-ଇସ୍ରାଏଲ ଏବଂ ଇରାନ ମଧ୍ୟରେ ଆକ୍ରମଣ-ପ୍ରତ୍ୟାକ୍ରମଣ ବେଳକୁ ବେଳ ବଢ଼ି ଚାଲିଥିଲାବେଳେ ହର୍ମୁଜ୍ ଷ୍ଟ୍ରେଟ୍ ଦେଇ ତୈଳ ପରିବହନ ପ୍ରସଙ୍ଗ ଉଭୟ ପକ୍ଷଙ୍କ ପାଇଁ ଗୁରୁତ୍ୱପୂର୍ଣ୍ଣ ରହିଛି। ହର୍ମୁଜ୍ ସାମୁଦ୍ରିକ ପଥକୁ ଇରାନ୍ କବ୍ଜା କରି ତୈଳ ଓ ଗ୍ୟାସ୍ ଯୋଗାଣ ବନ୍ଦ କରିଥିବାରୁ ଅନ୍ତର୍ଜାତୀୟ ବଜାରରେ ତୈଳ ଦର ହୁ ହୁ ହୋଇ ବଢ଼ି ଚାଲିଛି। ଏହାଦ୍ୱାରା ବୈଶ୍ୱିକ ଅର୍ଥନୀତିକୁ ପ୍ରଭାବିତ କରି ଇରାନ୍ ଆମେରିକା ସମେତ ବିଶ୍ୱ ସମୁଦାୟ ଉପରେ ଚାପ ସୃଷ୍ଟି କରିବାକୁ ରଣନୀତି କରିଛି। ଆମେରିକା ଇରାନ୍ର ଏହି ଆଭିମୁଖ୍ୟକୁ ବୁଝିପାରି ହର୍ମୁଜ୍ ସ୍ଥିତିକୁ ସ୍ବାଭାବିକ କରିବାକୁ ଉଦ୍ୟମ କରି ଅନ୍ୟ ସହଯୋଗୀ ରାଷ୍ଟ୍ରଙ୍କ ସହଯୋଗ ଲୋଡ଼ିଥିଲେ ହେଁ ବିଫଳ ହୋଇଛି। ଏଭଳି ସ୍ଥିତିରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଇରାନ୍କୁ ଚେତାବନୀ ଦେଇ ହର୍ମୁଜ୍ ଷ୍ଟ୍ରେଟ୍କୁ ସମ୍ପୂର୍ଣ୍ଣ ମୁକ୍ତ କରିବାକୁ କହିଛନ୍ତି। ଇରାନ୍ ଯଦି ୪୮ ଘଣ୍ଟା ମଧ୍ୟରେ ଏହାକୁ ମୁକ୍ତ କରି ସ୍ଥିତି ସ୍ବାଭାବିକ ନ କରେ ତେବେ ଭୟଙ୍କର ପରିଣାମ ଭୋଗିବାକୁ ପଡ଼ିବ।
ଇରାନ୍ର ସବୁ ପାଓ୍ବାର ପ୍ଲାଣ୍ଟକୁ ଉଡ଼ାଇ ଦେଇ ଅନ୍ଧାର କରିଦିଆଯିବ ବୋଲି ଟ୍ରମ୍ପ୍ ଚେତାଇ ଦେଇଛନ୍ତି। ଏପରିକି ଚେତବାନୀ ଦିଆଯିବାର ନିର୍ଦ୍ଦିଷ୍ଟ ସମୟ ଠାରୁ ଇରାନ୍ ଗଣନା ଆରମ୍ଭ କରି ପ୍ରସ୍ତୁତ ରହିବା ଉଚିତ ବୋଲି ଟ୍ରମ୍ପ୍ କହିବା ସହ ପ୍ରଥମେ ଆମେରିକା ସେନା ଇରାନ୍ର ସର୍ବବୃହତ ପାଓ୍ବାର ପ୍ଲାଣ୍ଟକୁ ଟାର୍ଗେଟ କରିବ ବୋଲି ଟ୍ରମ୍ପ୍ କହିଛନ୍ତି। ଆମେରିକା ଏବଂ ଇସ୍ରାଏଲ ଇରାନ୍ ବିରୋଧରେ ନେବାକୁ ଥିବା କାର୍ଯ୍ୟାନୁଷ୍ଠାନରେ ସଫଳ ହୋଇଥିବାବେଳେ ବର୍ତ୍ତମାନ ଯୁଦ୍ଧକୁ ବିରତି ଦେବାର ସମୟ ଆସିଛି ବୋଲି ଟ୍ରମ୍ପ୍ କହିବାର କିଛି ଘଣ୍ଟା ପରେ ଏଭଳି ଧମକ ଦେଇଛନ୍ତି। ସେପଟେ ୨୨୦୦ ଆମେରିକୀୟ ମେରିନ୍ କମାଣ୍ଡୋଙ୍କୁ ନେଇ ଆମେରିକାର ଯୁଦ୍ଧ ଜାହାଜ ୟୁଏସ୍ଏସ୍ ଟ୍ରିପୋଲି ଇରାନ୍ ଅଭିମୁଖେ ଯାତ୍ରା କରି ନିକଟବର୍ତ୍ତୀ ହୋଇଥିବାବେଳେ ହର୍ମୁଜ୍ ଏବଂ ଇରାନ୍ର ଖର୍ଗ ଦ୍ୱୀପକୁ ଆମେରିକା କବ୍ଜାକୁ ନେବା ଆଶଙ୍କା ମଧ୍ୟ ବଢିବାରେ ଲାଗିଛି।
ଅପରପକ୍ଷରେ ଟ୍ରମ୍ପଙ୍କ ଏଭଳି ଧମକ ପରେ ଇରାନ୍ ହର୍ମୁଜ୍ ଷ୍ଟ୍ରେଟ୍କୁ ସମ୍ପୂର୍ଣ୍ଣ ବନ୍ଦ କରିଦେବାକୁ ପାଲଟା ଧମକ ଦେଇଛି। କେବଳ କେତେକ ନିର୍ଦ୍ଦିଷ୍ଟ ଦେଶକୁ ବାଦ୍ ଦେଇ ଏହି ସାମୁଦ୍ରିକ ପଥ ଦେଇ ଅନ୍ୟ କୌଣସି ଜାହାଜକୁ ଯାତାୟାତ ଲାଗି ଅନୁମତି ଦିଆଯିବ ନାହିଁ ବୋଲି ଇରାନ୍ କହିଛି। ଏହାଛଡ଼ା ଯଦି ଆମେରିକା ଇରାନ୍ର ପାଓ୍ବାର ପ୍ଲାଣ୍ଟ ଉପରେ ଆକ୍ରମଣ କରେ ତେବେ ଇରାନ୍ ଉପସାଗରୀୟ ଅଞ୍ଚଳର ଅନ୍ୟ ଦେଶର ତୈଳ ଓ ଗ୍ୟାସ୍ ଭିତ୍ତିଭୂମି ଉପରେ ଆହୁରି ଜୋରଦାର୍ ଆକ୍ରମଣ କରିବା ସହ ସେଗୁଡିକର ଓ୍ବାଟର ଡିସ୍ଲାଇନେଜେଶନ ପ୍ଲାଣ୍ଟଗୁଡିକ ଉପରେ ଆକ୍ରମଣକୁ ଜୋରଦାର କରାଯିବ ବୋଲି ଇରାନ୍ ପକ୍ଷରୁ କୁହାଯାଇଛି।
Dharitri – Odisha’s No.1 Odia Daily
