ନୂଆଦିଲ୍ଲୀ,୨୬ା୨(ପି.ଟି.): ଆଇସିସି ଟ୍ରଫିକୁ ନେଇ ବିରାଟ କୋହଲିଙ୍କୁ କିଛି କ୍ରିକେଟ ସମୀକ୍ଷକ ବିଫଳ ଅଧିନାୟକର ଟ୍ୟାଗ ଦେଇଛନ୍ତି। ତାଙ୍କ ନେତୃତ୍ୱରେ ଭାରତ ୪ ବର୍ଷରେ ଗୋଟିଏ ଆଇସିସି ଟ୍ରଫି ଜିତି ନ ଥିଲା। ଆର୍ସିବିର ପୋଡକାଷ୍ଟରେ କୋହଲି ଏହା ଉପରେ ପ୍ରତିକ୍ରିୟା ରଖିଛନ୍ତି। କ୍ରୀଡା ପ୍ରତି ସଚ୍ଚୋଟ ରହିବା ବାସ୍ତବ ସଫଳତା ବୋଲି ସେ କହିଛନ୍ତି। ୨୦୧୧ ବିଶ୍ୱକପ୍ ବିଜୟୀ ଦଳ ଓ ୨୦୧୩ ଚାମ୍ପିୟନ୍ସ ଟ୍ରଫି ବିଜୟୀ ଦଳରେ ମୁଁ ସାମିଲ ଥିଲି। ଅଧିନାୟକ ଭାବରେ ମୁଁ ସଦାବେଳେ ବିଜୟୀ ହେବାକୁ ପ୍ରୟାସ କରିଥାଏ। ଦଳରେ ଏକ ଦୃଢ ମାନସିକତା ଆଣିବାରେ ସଫଳ ହୋଇଥିବାରୁ ମୁଁ ଗର୍ବିତ। ୨୦୧୭ ଚାମ୍ପିୟନ୍ସ ଟ୍ରଫି ଫାଇନାଲ, ୨୦୧୯ ବିଶ୍ୱକପ୍ ସେମିଫାଇନାଲ ଓ ୨୦୨୧ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ଦଳ ପ୍ରବେଶ କରିଥିଲା। ଆଇସିସି ଟ୍ରଫିରୁ ସଫଳତା ନିର୍ଦ୍ଧାରଣ କରାଯିବା ଠିକ୍ ନୁହେଁ ବୋଲି ସେ କହିଛନ୍ତି। ଏହା ସହିତ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସହିତ ସମ୍ପର୍କକୁ ନେଇ କୋହଲି ମତ ରଖିଛନ୍ତି। ମାହି ଭାଇ(ଧୋନୀ) ଏକମାତ୍ର ଖେଳାଳି ଯିଏ ମୋର ଖରାପ ଫର୍ମ ସମୟରେ ମୋତେ କଲ୍ କରିଥିଲେ। ୧୧ ବର୍ଷ ଧରି ଡ୍ରେସିଂ ରୁମ୍ ଶେୟାର କରିଥିବା ବେଳେ ସେ ସର୍ବଦା ମୋର ଅଧିନାୟକ ରହିବେ ବୋଲି କୋହଲି କହିଛନ୍ତି।
