ନୂଆଦିଲ୍ଲୀ: ହୋଣ୍ଡା ମୋଟର ସାଇକେଲ ଆଣ୍ଡ ସ୍କୁଟର ଇଣ୍ଡିଆ ପ୍ରାଇଭେଟ ଲିମିଟେଡ୍(ଏଚ୍ଏମ୍ଏସ୍ଆଇ) ପକ୍ଷରୁ ନୂଆ ହୋଣ୍ଡା ହାଇନେସ୍-ସିବି ୩୫୦ ମଡେଲର ଶୁଭାରମ୍ଭ କରାଯାଇଛି। ହୋଣ୍ଡା ମୋଟର କମ୍ପାନୀ ଲିମିଟେଡ୍ର ପରିଚାଳନା ନିର୍ଦ୍ଦେଶକ ଓ ଚିଫ୍ ଅଫିସର (ମୋଟର ସାଇକେଲ ବିଜ୍ନେସ କାରବାର) ନୋରିଆକି ଆବେ ଓ ହୋଣ୍ଡା ମୋଟର କମ୍ପାନୀର ଅପରେଟିଂ ଅଫିସର ମାସାୟୁକି ଇଗାରାଶି ଭର୍ଚୁଆଲ କାର୍ଯ୍ୟକ୍ରମରେ ଏହି ଯାନଟିକୁ ଉନ୍ମୋଚନ କରିଥିଲେ। ଏହାଦ୍ୱାରା କମ୍ପାନୀ ମଧ୍ୟମ ବର୍ଗ ମୋଟର ସାଇକେଲ ସେଗ୍ମେଣ୍ଟରେ ପ୍ରବେଶ କରିଛି। ହୋଣ୍ଡା ବିଗ୍ ଓ୍ବିଙ୍ଗର ତୃତୀୟ ବିଏସ୍-୬ ମଡେଲ ସ୍ବରୂପ କମ୍ପାନୀ ପକ୍ଷରୁ ଏହି ଯାନରେ ୯ଟି ନୂଆ ପେଟେଣ୍ଟ ପ୍ରୟୋଗ କରାଯାଇଛି। ନୂଆ ମଡେଲଟିରେ ସଦ୍ୟତମ ପ୍ରଯୁକ୍ତି ବ୍ୟବହାର କରାଯାଇଥିବା ହୋଣ୍ଡା ମୋଟର ସାଇକେଲ ଏବଂ ସ୍କୁଟର ଇଣ୍ଡିଆର ସିଇଓ ଅତଶୁଶି ଓଗାତା ସୂଚନା ଦେଇଛନ୍ତି। ଏଥିରେ ଗ୍ରାହକ ଅତୁଳନୀୟ ପରଫରମାନ୍ସ ଲାଭ କରିବାକୁ ସକ୍ଷମ ହେବେ ବୋଲି କମ୍ପାନୀର ବରିଷ୍ଟ ଉପସଭାପତି ୟଦବିନ୍ଦର ସିଂ ଗୁଲେରିଆ କହିଛନ୍ତି। ଏହି ମଡେଲରେ ୩୫୦ ସିସିର ୪ ଷ୍ଟ୍ରୋକ ଓଏଚ୍ସି ସିଙ୍ଗଲ ସିଲିଣ୍ଡର ଇଞ୍ଜିନ, ପିଜିଏମ୍ ଏଫ୍ଆଇ ପ୍ରଯୁକ୍ତି, ହୋଣ୍ଡାର ସିଲେକ୍ଟେବଲ ଟର୍କ କଣ୍ଟ୍ରୋଲ, ସ୍ମାର୍ଟଫୋନ ଭଏସ୍ କଣ୍ଟ୍ରୋଲ ସିଷ୍ଟମ ରହିଛି। ହୋଣ୍ଡା ବିଗ୍ ଓ୍ବିଙ୍ଗ ଡିଲରଶିପ ଏବଂ ଓ୍ବେବ୍ସାଇଟରେ ଗ୍ରାହକ ଏହାକୁ ବୁକିଂ କରିପାରିବେ। ଡିଏଲ୍ଏକ୍ସ ଏବଂ ଡିଏଲ୍ଏକ୍ସ ପ୍ରୋ ଭଳି ୨ଟି ଭାରିଆଣ୍ଟରେ ଏହା ଆସିଛି। ମଡେଲଟିରେ କମ୍ପାନୀ ୬ ବର୍ଷିଆ ଓ୍ବାରେଣ୍ଟି ମଧ୍ୟ ପ୍ରଦାନ କରୁଛି।
