କୋଚି,୫।୩: ଏସ୍ଏଫ୍ଆଇର ବିକ୍ଷୋଭ ପ୍ରଦର୍ଶନ ପରେ କେରଳ ପୋଲିସ କୋଝିକୋଡେସ୍ଥିତ ଏକ ଟିଭି ଚ୍ୟାନେଲ କାର୍ଯ୍ୟାଳୟରେ ରବିବାର ଚଢାଉ କରି ତଦନ୍ତ ଆରମ୍ଭ କରିଛି। ଟୁଇଟରରେ ଏକ ଭିଡିଓ ଶେୟାର କରି କେନ୍ଦ୍ର ମନ୍ତ୍ରୀ ରାଜୀବ ଚନ୍ଦ୍ରଶେଖର ପୋଲିସର ତଦନ୍ତ ସମ୍ପର୍କରେ ଏହି ସୂଚନା ଦେଇଛନ୍ତି।
ସୂଚନାଯୋଗ୍ୟ, ଉତ୍ତର କେରଳର ଏକ ବିଦ୍ୟାଳୟରେ ଛାତ୍ରୀଙ୍କୁ ଯୌନ ନିର୍ଯାତନା ଦିଆଯାଉଥିବା ନେଇ ସମ୍ପୃକ୍ତ ନ୍ୟୁଜ୍ ଚ୍ୟାନେଲରେ ଏକ ଖବର ପ୍ରକାଶିତ ହୋଇଥିଲା। ଏହାକୁ ଫେକ୍ ନ୍ୟୁଜ୍ କହି ଶୁକ୍ରବାର ସନ୍ଧ୍ୟାରେ ଷ୍ଟୁଡେଣ୍ଟସ ଫେଡେରେଶନ ଅଫ୍ ଇଣ୍ଡିଆ(ଏସ୍ଏଫ୍ଆଇ)ର କେତେକ କାର୍ଯ୍ୟକର୍ତ୍ତା କେରଳ କୋଚିସ୍ଥିତ ଏକ ମାଲୟାଲମ୍ ନ୍ୟୁଜ୍ ଚ୍ୟାନେଲ କାର୍ଯ୍ୟାଳୟରେ ପଶି ବିକ୍ଷୋଭ ପ୍ରଦର୍ଶନ କରିଥିଲେ। ହେଲେ ଚ୍ୟାନେଲର ଅଭିଯୋଗ ଆଧାରରେ ପୋଲିସ ଛାତ୍ର ସଙ୍ଗଠନର ପ୍ରାୟ ୩୦ଜଣ କର୍ମକର୍ତ୍ତାଙ୍କ ବିରୋଧରେ ମାମଲା ରୁଜୁ କରିଛି।
ଅଭିଯୋଗ ଅନୁଯାୟୀ, ଏସ୍ଏଫ୍ଆଇ କର୍ମଚାରୀମାନେ ରାତି ପ୍ରାୟ ୮ଟାରେ ଚ୍ୟାନେଲ କାର୍ଯ୍ୟାଳୟରେ ପ୍ରବେଶ କରି ଚ୍ୟାନେଲ ବିରୋଧରେ ସ୍ଲୋଗାନ ଦେଇ କର୍ମଚାରୀଙ୍କୁ ଧମକ ଦେଇଥିଲେ। ଅନ୍ୟପକ୍ଷେ ଏସ୍ଏଫ୍ଆଇର କାର୍ଯ୍ୟକୁ ସମାଲୋଚନା କରି ପ୍ରେସ କ୍ଲବ ଅଫ ଇଣ୍ଡିଆ ପକ୍ଷରୁ କେରଳ ସରକାରଙ୍କୁ ଘଟଣାର ତଦନ୍ତ କରିବାକୁ ଅନୁରୋଧ କରାଯାଇଛି।
