ମେଲବୋର୍ନ,୨୨ା୧୦: ରାଜ୍ୟଗୋଷ୍ଠୀ କ୍ରୀଡାରୁ ହକି ଇଭେଣ୍ଟ ବାଦ ପଡିବାକୁ ଯାଉଛି। ୨୦୨୬ରେ ରାଜ୍ୟଗୋଷ୍ଠୀ କ୍ରୀଡା ଆରମ୍ଭରୁ ଅଷ୍ଟ୍ରେଲିଆର ଭିକ୍ଟୋରିଆରେ ହେବାର କାର୍ଯ୍ୟକ୍ରମ ରହିଥିଲା। ତେବେ ବର୍ଦ୍ଧିତ ଖର୍ଚ୍ଚକୁ ଦୃଷ୍ଟିରେ ରଖି ଅଷ୍ଟ୍ରେଲିଆ ଓହରି ଯାଇଥିବା ବେଳେ ବର୍ତ୍ତମାନ ଏହା ସ୍କଟଲାଣ୍ଡର ଗ୍ଲାସ୍ଗୋରେ ଅନୁଷ୍ଠିତ ହେବାକୁ ଯାଉଛି। ତେବେ ଖର୍ଚ୍ଚକାଟକୁ ଦୃଷ୍ଟିରେ ରଖି ଆସନ୍ତା ଗେମ୍ରୁ ହକିକୁ ବାଦ ଦେବା ପାଇଁ ସ୍କଟଲାଣ୍ଡ ନିଷ୍ପତ୍ତି ନେଇଛି। ତେବେ ଏ ସମ୍ପର୍କରେ ଅନ୍ତର୍ଜାତୀୟ ହକି ଫେଡେରେଶନ(ଏଫ୍ଆଇଏଚ୍) ଓ ରାଜ୍ୟଗୋଷ୍ଠୀ ଗେମ୍ସ ଫେଡେରେଶନ(ସିଜିଏଫ୍) ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ।
୧୯୯୮ରେ ହକି ପଦାର୍ପଣ କରିବା ପରଠାରୁ ଏହା ରାଜ୍ୟଗୋଷ୍ଠୀ କ୍ରୀଡାର ଏକ ପ୍ରମୁଖ ଅଂଶ ରହି ଆସିଛି। ଯଦିଓ ଏ ସମ୍ପର୍କରେ କୌଣସି ଚୂଡାନ୍ତ ନିଷ୍ପତ୍ତି ନିଆଯାଇ ନାହିଁ ତେବେ ଗ୍ଲାସ୍ଗୋର ଆୟୋଜକ ମାନେ ହକିକୁ ବାଦ୍ ଦେବାକୁ ଚାହୁଁଥିବା ଜଣାପଡିଛି। ଏଫ୍ଆଇଏଚ୍ ଏ ସମ୍ପର୍କରେ କୌଣସି ପ୍ରତିକ୍ରିୟା ପ୍ରକାଶ କରି ନ ଥିବା ବେଳେ ମଙ୍ଗଳବାର ଚୂଡାନ୍ତ କାର୍ଯ୍ୟସୂଚୀ ଆସିବାକୁ ଅପେକ୍ଷା ଥିବା କହିଛି।
ଆସନ୍ତା କିଛିଦିନ ମଧ୍ୟରେ କାର୍ଯ୍ୟସୂଚୀ ସମ୍ପୂର୍ଣ୍ଣ ସ୍ପଷ୍ଟ ହୋଇଯିବ ତା’ପରେ ଏହା ଉପରେ ପ୍ରତିକ୍ରିୟା ଦେବା ଠିକ୍ ରହିବ ବୋଲି ଏଫ୍ଆଇଏଚ୍ କହିଛି। ସେହିପରି ବର୍ମିଂହାମ ରାଜ୍ୟଗୋଷ୍ଠୀ କ୍ରୀଡ଼ାରେ ଇଭେଣ୍ଟ ସଂଖ୍ୟା ୧୯ ରହିଥିବା ବେଳେ ଚଳିତବର୍ଷ ଏହାକୁ ୧୦କୁ ହ୍ରାସ କରାଯାଇଛି। ଜୁଲାଇ ୨୩ରୁ ଅଗଷ୍ଟ ୨ ମଧ୍ୟରେ ଏହା ଆୟୋଜିତ ହେବାର କାର୍ଯ୍ୟକ୍ରମ ରହିଛି। ଏହି ଇଭେଣ୍ଟର ୨ ସପ୍ତାହ ପରେ ବେଲଜିୟମ ଓ ନେଦରଲାଣ୍ଡ୍ସରେ ହକି ବିଶ୍ୱକପ ଆୟୋଜିତ ହେବାକୁ ଯାଉଛି। ତେଣୁ ଏହି ରାଜ୍ୟଗୋଷ୍ଠୀ କ୍ରୀଡ଼ାରେ ହକିକୁ ସାମିଲ କରା ନ ଯିବାକୁ ଯୋଜନା କରାଯାଇଥିବା କୁହାଯାଇଛି। ଗ୍ଲାସଗୋ ରାଜ୍ୟଗୋଷ୍ଠୀ କ୍ରୀଡ଼ାରେ ମାତ୍ର ୪ ଭେନ୍ୟୁ ରଖାଯାଇଛି। କମନଓ୍ବେଲ୍ଥ ଆରେନା, ସାର୍ କ୍ରିସ୍ ହୟ ଭେଲ୍ଡୋରମ, ସ୍କଟ୍ସଟାଉନ ଷ୍ଟାଡିୟମ ଓ ଟୋଲ୍କ୍ରସ ଇଣ୍ଟରନ୍ୟାଶନାଲ ସୁଇମିଙ୍ଗ ସେଣ୍ଟରରେ ଏହି ଇଭେଣ୍ଟଗୁଡିକ ଆୟୋଜିତ ହେବାର କାର୍ଯ୍ୟକ୍ରମ ରହିଛି। ଏହା ସହିତ ଏହି ୪ ଭେନ୍ୟୁ ମଧ୍ୟରେ କୌଣସି ବି ସ୍ଥାନରେ ହକି ଟର୍ଫ ନ ଥିବାରୁ ହକି ବାଦ୍ ପଡ଼ିବା ଆପାତତଃ ସ୍ପଷ୍ଟ ହୋଇ ସାରିଛି।
ରାଜ୍ୟ ଗୋଷ୍ଠୀ କ୍ରୀଡ଼ାରୁ ହକି ବାଦ୍ ପଡିବା ଭାରତକୁ ଏକ ବଡ ଝଟକା। ଭାରତୀୟ ପୁରୁଷ ଦଳ ୩ ଥର ରୌପ୍ୟ ଓ ୨ ଥର ବ୍ରୋଞ୍ଜ ପଦକ ଜିତିଥିବା ବେଳେ ମହିଳା ଦଳ ସମୁଦାୟ ୩ ପଦକ ବିଜୟୀ ହୋଇଛି। ଏପରି କି ୨୦୦୦ ସଂସ୍କରଣରେ ମହିଳା ଦଳ ଏକ ସ୍ବର୍ଣ୍ଣ ପଦକ ଜିତିଥିଲା। ତେବେ ଅଷ୍ଟ୍ରେଲିଆ ସବୁଠାରୁ ଅଧିକ ପ୍ରଭାବିତ ହେବ। ପୁରୁଷ ବର୍ଗରେ ଏହା ରେକର୍ଡ ୭ ଥର ସ୍ବର୍ଣ୍ଣ ପଦକ ଜିତିଥିବା ବେଳେ ମହିଳା ବର୍ଗରେ ୪ ଥର ସ୍ବର୍ଣ୍ଣ ଜିତିଛି।
