ଭୋପାଳ,୪।୧: ରଣଜୀ ଟ୍ରଫି ୨୦୨୨-୨୩ରେ ଚେତେଶ୍ୱର ପୂଜାରା ଦ୍ୱିଶତକ ସ୍କୋର କରି ଇତିହାସ ରଚିଛନ୍ତି। ରଣଜୀ ଟ୍ରଫିରେ ସୌରାଷ୍ଟ୍ର ପାଇଁ ଖେଳିଥିବା ପୂଜାରା ଝାଡଖଣ୍ଡ ବିପକ୍ଷରେ ଖେଳାଯାଇଥିବା ମ୍ୟାଚରେ ଅପରାଜିତ ୨୪୩ ରନ୍ର ପାଳି ରଖେଳିଥିଲେ। ଏହି ଦ୍ୱିଶତକ ସହିତ ପୂଜାରା ଏକ ବିଶେଷ ରେକର୍ଡ ସୃଷ୍ଟି କରିଛନ୍ତି। ପୂଜାରା ପ୍ରଥମ ଶ୍ରେଣୀରେ ସର୍ବାଧିକ ଦ୍ୱିଶତକ ହାସଲ କରିବାରେ ମିଳିତ ଚତୁର୍ଥ ବ୍ୟାଟ୍ସମ୍ୟାନ ହୋଇଥିଲେ। ଦ୍ୱିଶତକ ସହିତ ପୂଜାରା ଅଷ୍ଟ୍ରେଲୀୟ କିମ୍ବଦନ୍ତୀ ସାର୍ ଡନ ବ୍ରାଡମ୍ୟାନଙ୍କ ତାଲିକାରେ ଯୋଗ ଦେଇଥିଲେ।
ତାଙ୍କର ପ୍ରଥମ ଶ୍ରେଣୀ କ୍ୟାରିୟରରେ ପୂଜାରାଙ୍କ ଏହା ୧୭ତମ ଦ୍ୱିଶତକ। ଝାଡଖଣ୍ଡ ବିପକ୍ଷ ମ୍ୟାଚର ତୃତୀୟ ଦିନରେ ପୂଜାରା ଦ୍ୱିଶତକ ପୂରଣ କରିଥିଲେ। ସୌରାଷ୍ଟ୍ର ବ୍ୟାଟ୍ସମ୍ୟାନ ୩୦ ଚୌକା ସହାୟତାରେ ଅପରାଜିତ ୨୪୩ ରନ୍ ସ୍କୋର କରିଥିଲେ। ପ୍ରଥମ ଶ୍ରେଣୀରେ ସର୍ବାଧିକ ଦ୍ୱିଶତକ ହାସଲ କରିଥିବା ବ୍ୟାଟ୍ସମ୍ୟାନ ହେଉଛନ୍ତି ଅଷ୍ଟ୍ରେଲିଆର ପୂର୍ବତନ କିମ୍ବଦନ୍ତୀ ସାର୍ ଡନ ବ୍ରାଡମ୍ୟାନ, ଯିଏ ୩୭ ଦ୍ୱିଶତକ ହାସଲ କରିଛନ୍ତି। ଏହା ପରେ ଇଂଲଣ୍ଡର ପୂର୍ବତନ କିମ୍ବଦନ୍ତୀ ୱାଲି ହାମଣ୍ଡ ଏହି ତାଲିକାରେ ଦ୍ୱିତୀୟ ସ୍ଥାନରେ ଅଛନ୍ତି, ଯିଏ ୩୬ ଡବଲ ଶତକ ହାସଲ କରିଛନ୍ତି।
ତେବେ ତାଲିକାର ତୃତୀୟ ନାମ ଇଂଲଣ୍ଡର ପ୍ୟାଟି ହେଣ୍ଡ୍ରେନ। ସେ ପ୍ରଥମ ଶ୍ରେଣୀ କ୍ରିକେଟରେ ମୋଟ ୨୨ ଦ୍ୱିଶତକ ହାସଲ କରିଥିଲେ। ଏହା ପରେ ଇଂଲଣ୍ଡର ହର୍ବର୍ଟ ସଟକ୍ଲିଫ, ଇଂଲଣ୍ଡର ରାମପ୍ରକାଶ ଏବଂ ଭାରତର ଚେତେଶ୍ୱର ପୂଜାରା ମିଳିତ ଭାବେ ୧୭-୧୭ ପ୍ରଥମ ଶ୍ରେଣୀ ଦ୍ୱିଶତକ ସହ ତାଲିକାର ଚତୁର୍ଥ ସ୍ଥାନରେ ରହିଛନ୍ତି।
