ବାର୍ସିଲୋନା,୩।୯(ଏପି): ଆର୍ଜେଣ୍ଟିନା ଫୁଟବଲ ସୁପରଷ୍ଟାର ଲିଓନେଲ ମେସିଙ୍କ ପିତା ଜର୍ଜ ଆର୍ଜେଣ୍ଟିନାରୁ ସିଧା ବାର୍ସିଲୋନାରେ ପହଞ୍ଚିଛନ୍ତି। ମେସିଙ୍କ ଭବିଷ୍ୟତ ସଂକ୍ରାନ୍ତରେ ଆଲୋଚନା କରିବାକୁ ସେ ବାର୍ସିଲୋନା କ୍ଲବର ବରିଷ୍ଠ ଅଧିକାରୀମାନଙ୍କ ସହ ଆଲୋଚନା କରିବେ। ଜର୍ଜ ମଧ୍ୟ ମେସିଙ୍କ ଏଜେଣ୍ଟ ଭାବେ କାର୍ଯ୍ୟକରନ୍ତି। ସେ କ୍ଲବ୍ ଅଧ୍ୟକ୍ଷ ଜୋସେଫ ବାର୍ଟୋମିୟୁ ଓ ଅନ୍ୟ ଅଧିକାରୀଙ୍କ ସହ ଭେଟି ଆଲୋଚନା କରିବେ ବୋଲି ଆଶା କରାଯାଉଛି। ତେବେ ଏହି ବୈଠକ କେବେ ବସିବ ସେ ନେଇ କିଛି ସ୍ପଷ୍ଟ ହୋଇନାହିଁ। ଏ ସଂକ୍ରାନ୍ତରେ କିଛି ଜାଣି ନାହିଁ ବୋଲି ଜର୍ଜ କହିଛନ୍ତି।
ଗତ ସପ୍ତାହରେ ମେସି କ୍ଲବ୍ ଛାଡିବାକୁ ବାର୍ସିଲୋନାକୁ କହିଥିଲେ। ଫଳରେ ବିବାଦ ସୃଷ୍ଟି ହୋଇଥିଲା। ମେସିଙ୍କ ଚୁକ୍ତି ୨୦୨୧ ଜୁନ୍ ପର୍ଯ୍ୟନ୍ତ ବଳବତ୍ତର ରହିଛି। ଯଦି ମେସି ବାର୍ସିଲୋନା ଛାଡିବାକୁ ଚାହାନ୍ତି ତା’ହେଲେ ୭୦୦ ମିଲିୟନ ୟୁରୋ ଦେବାକୁ କ୍ଲବ ତରଫରୁ କୁହାଯାଇଛି। ୨୦ ବର୍ଷ ତଳେ ମେସି ବାର୍ସିଲୋନାରୁ ହିଁ କ୍ୟାରିୟର ଆରମ୍ଭ କରିଥିଲେ। ଏହି କ୍ଲବ ସହିତ ଜଡିତ ରହି ମେସି ତାଙ୍କ କ୍ୟାରିୟର ଶେଷ କରନ୍ତୁ ବୋଲି ବାର୍ସିଲୋନା ଚାହୁଁଛି। ଏ ନେଇ ମେସିଙ୍କୁ ବୁଝାଇବାକୁ ବାର୍ସିଲୋନ ପ୍ରୟାସ କରିଆସୁଛି ବୋଲି କ୍ଲବ ତରଫରୁ କୁହାଯାଇଛି। ନିଜ ନିଷ୍ପତ୍ତି ସମ୍ପର୍କରେ ଘୋଷଣା କରିବା ପରେ ମେସି କ୍ଲବ ଅଧିକାରୀଙ୍କ ସହ କୌଣସି ଆଲୋଚନା କରିନାହାନ୍ତି। ଅଗଷ୍ଟ ୧୪ରେ ଚାମ୍ପିୟନ୍ସ ଲିଗ୍ କ୍ୱାର୍ଟର ଫାଇନାଲ ମ୍ୟାଚ୍ରେ ବାର୍ସିଲୋନା ୮-୨ ଗୋଲରେ ବେୟର୍ନ ମ୍ୟୁନିକ୍ଠାରୁ ପରାସ୍ତ ହୋଇଥିଲା। ଏହା ବାର୍ସିଲୋନା ପାଇଁ ସର୍ବବୃହତ୍ ପରାଜୟ ସାବ୍ୟସ୍ତ ହୋଇଥିଲା। ଏହି ପରାଜୟ ମେସିଙ୍କୁ ନିରାଶ କରିଥିଲା। ଚଳିତ ମାସ ଶେଷ ଆଡ଼କୁ ବାର୍ସିଲୋନା ସ୍ପାନିଶ୍ ଲିଗ୍ରେ ଭିଲାରିୟଲ ବିପକ୍ଷରୁ ସିଜନ ଆରମ୍ଭ କରିବ।
