ହିନ୍ଦୀ, ସଂସ୍କୃତ ଶିକ୍ଷକରେ ଚାଲିଛି ପାଠପଢ଼ା
2:13 pmJune 28, 2023June 28, 2023 / 09

ରୂପ୍‌ସା,୨୮।୬(ବାଞ୍ଛାନିଧି ଦେ): ୧୯୮୧ରେ ପ୍ରତିଷ୍ଠା ହୋଇଥିବା ବାଲେଶ୍ୱର ଜିଲା ରୂପ୍‌ସା ଥାନା ରାଉତପଡ଼ା ପଞ୍ଚାୟତ ବାରାପାଳ ଗ୍ରାମର ଉଦୟନାଥ ମହାପାତ୍ର ଉଚ୍ଚ ବିଦ୍ୟାନିକେତନକୁ ଏବେ ୫-ଟି ଅନୁଦାନ ମିଳିଛି। ହେଲେ ଶିକ୍ଷକ ଓ ଅଣଶିକ୍ଷକ କର୍ମଚାରୀ ଅଭାବରୁ ଛାତ୍ରୀଛାତ୍ରଙ୍କ ଭବିଷ୍ୟତ ଅନ୍ଧାର ଭିତରକୁ ଠେଲି ହୋଇଯାଉଛି।
ଏହି ବିଦ୍ୟାଳୟ ଉପରେ ରାଉତପଡ଼ା, ଗଡ଼ପଦା ଓ ଦୁଧହଂସା ପଞ୍ଚାୟତର ୩୦ଟି ଗାଁର ପିଲା ନିର୍ଭର କରନ୍ତି। ଚଳିତ ଶିକ୍ଷାବର୍ଷରେ ଏହି ବିଦ୍ୟାଳୟରେ ନବମ ଶ୍ରେଣୀରେ ୭୪ ଓ ଦଶମ ଶ୍ରେଣୀରେ ୭୮ ମିଶି ମୋଟ ୧୫୨ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସେଥିମଧ୍ୟରୁ ଅଧିକାଂଶ ଆଦିବାସୀ, ହରିଜନ ଓ ସଂଖ୍ୟାଲଘୁ ସମ୍ପ୍ରଦାୟର ପିଲା ଅଛନ୍ତି। କିନ୍ତୁ ହିନ୍ଦୀ ଓ ସଂସ୍କୃତ ଶିକ୍ଷକଙ୍କ ଦ୍ୱାରା ଏଠାରେ ଚାଲିଛି ପାଠପଢ଼ା। ସରକାରଙ୍କ ୫-ଟି ବ୍ୟବସ୍ଥା ଏଠି ପ୍ରହସନରେ ପରିଣତ ହୋଇଛି ବୋଲି ଅଭିଭାବକ ମହଲରୁ ଅଭିଯୋଗ ହୋଇଛି। ୬ଜଣ ଶିକ୍ଷକଙ୍କ ଅବସର ପରେ ଦୀର୍ଘଦିନରୁ ୨ଜଣ ବିଜ୍ଞାନ ଶିକ୍ଷକ, ୩ଜଣ କଳା ବିଭାଗ ଶିକ୍ଷକ ଓ ଜଣେ କ୍ରୀଡ଼ା ଶିକ୍ଷକଙ୍କ ସମେତ ଜଣେ କିରାଣି, ୨ଜଣ ଚତୁର୍ଥ ଶ୍ରେଣୀ କର୍ମଚାରୀ ପଦବୀ ଫାଙ୍କା ପଡ଼ିଛି। ଏ ସଂକ୍ରାନ୍ତରେ ବିଦ୍ୟାଳୟ କର୍ତ୍ତୃପକ୍ଷ ଓ ପରିଚାଳନା କମିଟି ତରଫରୁ ରାଜ୍ୟପାଳ, ଜିଲାପାଳ, ଜିଲା ଶିକ୍ଷାଧିକାରୀ, ବ୍ଲକ ଶିକ୍ଷାଧିକାରୀ ଓ ବିଧାୟକଙ୍କ ଦୃଷ୍ଟି ଆକର୍ଷଣ କରାଯାଇଛି। ହେଲେ ଫଳ ଶୂନ। ୫-ଟି ଅନୁଦାନରେ ବିଦ୍ୟାଳୟ ଗୃହ ଉପରେ ଚକ ଚକ ଦିଶୁଥିଲେ ହେଁ ଶିକ୍ଷାଦାନ କ୍ଷେତ୍ରରେ ଭିତରେ ଫମ୍ପା ସଦୃଶ ବୋଲି ସାଧାରଣରେ ଆଲୋଚନା ହେଉଛି।
ବିଦ୍ୟାଳୟ ପରିଚାଳନା କମିଟି ସଭାପତି ଯୋଗେଶ୍ୱର ମହାପାତ୍ର କହନ୍ତି, ୭ା୬ା୧୯୯୪ ସୁଦ୍ଧା ପୂର୍ଣ୍ଣ ଅନୁଦାନପ୍ରାପ୍ତ ବିଦ୍ୟାଳୟଗୁଡ଼ିକୁ ସରକାରୀକରଣ କରାଯାଇଛି। ଆମ ବିଦ୍ୟାଳୟ ୧ା୬ା୧୯୯୪ରେ ପୂର୍ଣ୍ଣ ଅନୁଦାନ ପାଇଥିବା ସ୍ଥଳେ ଅଦ୍ୟାବଧି ଏହା ସରକାରୀକରଣ ନ ହେବା ଦୁଃଖର ବିଷୟ। ଦଶମ ଶ୍ରେଣୀ ଛାତ୍ର ମୟୂରେଶ ପାଣିଗ୍ରାହୀ, ଦୀପ୍ତରାଗ ଦେ କହିଛନ୍ତି, ଶିକ୍ଷକ ଅଭାବ ଯୋଗୁ ଓଡ଼ିଆ, ଇଂଲିଶ, ଗଣିତ, ବିଜ୍ଞାନ ଆଦି ବିଷୟରେ ପାଠପଢ଼ା ହୋଇପାରୁନି। ୨୦୨୪ ବୋର୍ଡ ପରୀକ୍ଷାରେ ଭଲ ରେଜଲ୍ଟ ପାଇଁ ସରକାର ତୁରନ୍ତ ସମସ୍ତ ଶିକ୍ଷକ ନିଯୁକ୍ତି କରନ୍ତୁ।
ଭାରପ୍ରାପ୍ତ ପ୍ରଧାନ ଶିକ୍ଷକ ବାସୁଦେବ ବେହେରା ଶିକ୍ଷକ ଓ କର୍ମଚାରୀ ଅଭାବ ସମ୍ପର୍କରେ ସରକାର ତଥା ଉଚ୍ଚ କର୍ତ୍ତୃପକ୍ଷଙ୍କୁ ଲିଖିତ ଭାବେ ଅବଗତ କରାଯାଇଥିବା କହିଛନ୍ତି। ପିଲାଙ୍କ ଭବିଷ୍ୟତ ପାଇଁ ସ୍କୁଲ ଖୋଲିବା ମାତ୍ରେ ଆବଶ୍ୟକ ଶିକ୍ଷକ ନିଯୁକ୍ତି କରା ନ ଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଅଭିଭାବକ ଯୋଗେନ୍ଦ୍ର ଦାସ, ବରେନ୍ଦ୍ର ପରିଡ଼ା, ମଧୁସୂଦନ ଦାସ, କାର୍ତ୍ତିକ ଦାସ ପ୍ରମୁଖ ଚେତାବନୀ ଦେଇଛନ୍ତି।