ଶିମଲା,୧୦ ।୧୨: ହିମାଚଳ ପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସକୁ ବହୁମତ ମିଳିବା ପରେ ଏବେ ମୁଖ୍ୟମନ୍ତ୍ରୀ ଆସନକୁ ନେଇ ଟଣାଓଟରା ଜାରି ରହିଛି । ଶୁକ୍ରବାର ବସିଥିବା ବିଧାୟକ ଦଳର ବୈଠକରେ ମୁଖ୍ୟମନ୍ତ୍ରୀ ବାଛିବାକୁ ଦଳ ସୁପ୍ରିମୋଙ୍କୁ ଦାୟିତ୍ୱ ଦିଆଯାଇଛି । ଏବେ ଶନିବାର ସନ୍ଧ୍ୟା ୫ଟାରେ ପୁଣି ଶିମଲା ସ୍ଥିତ ହିମାଚଳ ପ୍ରଦେଶ ବିଧାନସଭାରେ କଂଗ୍ରେସ ବିଧାୟକ ଦଳର ବୌଠକ ଡକାଯାଇଛି । ବିଧାୟକ ଦଳ ବୈଠକରେ ମୁଖ୍ୟମନ୍ତ୍ରୀଙ୍କ ନାମର ଘୋଷଣା ହୋଇପାରେ ବୋଲି ଅନୁମାନ କରାଯାଉଛି । ଆଉ ଆଗାମୀ ୨ ଦିନ ଭିତରେ ଶପଥ ଗ୍ରହଣ ଉତ୍ସବ ବି ଆୟୋଜିତ ହେବ । ମୁଖ୍ୟମନ୍ତ୍ରୀ ରେସରେ ହିମାଚଳ ପ୍ରଦେଶ କଂଗ୍ରେସ ଅଧ୍ୟକ୍ଷ ପ୍ରତିଭା ସିଂ, ପ୍ରଚାର ସମିତିର ଅଧ୍ୟକ୍ଷ ସୁଖବିନ୍ଦର ସିଂହ ସୁକଖୁ ଓ ତେରହବି ବିଧାନସଭାର ନେତା ପ୍ରତିପକ୍ଷ ମୁକେଶ ଅଗ୍ନିହୋତ୍ରୀ ସବୁଠାରୁ ଆଗରେ ରହିଛନ୍ତି ।
ଶନିବାର ସନ୍ଧ୍ୟାରେ ବିଧାୟକ ଦଳର ବୈଠକରେ ମୁଖ୍ୟମନ୍ତ୍ରୀଙ୍କ ନାମ ଚୁଡାନ୍ତ ହେବା ପରେ ୧୨ ଡିସେମ୍ବରରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇପାରେ । ଶପଥ ଗ୍ରହଣ ସମାରୋହ ରାଜଧାନୀ ଶିମଲାର ରିଜ ମୈଦାନରେ ହେବାର ଯୋଜନା ରହିଛି । ଅଧିକାରୀଙ୍କ ପକ୍ଷରୁ ଏହି ସମାରୋହର ପ୍ରସ୍ତୁତି ଆରମ୍ଭ କରାଗଲାଣି । କେବଳ ମୁଖ୍ୟମନ୍ତ୍ରୀଙ୍କ ନାମ ଘୋଷଣାକୁ ଅପେକ୍ଷା ।
