କେସିଙ୍ଗା,୧୩।୨(ତୁମେଶ୍ୱର ସାହୁ): ଟିଟିଲାଗଡ଼ରୁ ଜୁନାଗଡକୁ ଇସ୍ପାତ ଟ୍ରେନକୁ ସମ୍ପ୍ରସାରଣ ପାଇଁ ଗ୍ରୀନ୍ ସିଗ୍ନାଲ୍ ମିଳିଯାଇଛି। ଏନେଇ ଇଷ୍ଟ କୋଷ୍ଟ ରେଲୱେ, ଭୁବନେଶ୍ୱର ପକ୍ଷରୁ ସମ୍ବଲପୁର ଡିଭିଜନର ସିନିୟର ଡିସିଏମଙ୍କୁ ଚିଠି ଯୋଗେ ଜଣାଇଦିଆଯାଇଛି। ଏହି ଇସ୍ପାତ ଟ୍ରେନକୁ ଆସନ୍ତା ୧୯ରେ ଜୁନାଗଡ ରେଳ ଷ୍ଟେଶନରେ ଅପରାହ୍ନ ୩ଟା କଳାହାଣ୍ଡି ଏମପି ମାଳବିକା ଦେବୀଙ୍କ ଦ୍ୱାରା ପତାକା ଦେଖାଇ ଉଦ୍ଘାଟନ କରିବା ପାଇଁ ଚିଠିରେ ଉଲ୍ଲେଖ କରାଯାଇଛି। ଇସ୍ପାତ ଟ୍ରେନ ଟିଟିଲାଗଡରୁ ତିନି ଦିନ ଜୁନାଗଡକୁ ସମ୍ପ୍ରସାରଣ କରାଯିବ। ଏହି ଟ୍ରେନ ଟିଟିଲାଗଡ ରୁବାହାରି କେସିଙ୍ଗା, କାଣ୍ଡେଲ, ରୁପ୍ରା, ନର୍ଲା, ଲାଞ୍ଜିଗଡ଼, ଦେଇ ଭବାନୀପାଟଣା ଦେଇ ଜୁନାଗଡରେ ପହଞ୍ଚିବ। କେସିଙ୍ଗା ସିଟିଜେନ ଫୋରମର ସଭାପତି ଡ଼. ହେମ ସାଗର ସାହା, ସମ୍ପାଦକ ବି ଚନ୍ଦ୍ରଶେଖର ଆଚାରିଙ୍କ ସମେତ କଳାହାଣ୍ଡି ଜିଲା ରେଲୱେ ସଂଘ କେସିଙ୍ଗାର ସଭାପତି ସୁବାସ ଜୈନ କେସିଙ୍ଗା ସହରବାସୀ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ, ସମ୍ବଲପୁର ଡିଭିଜନର ସିନିୟର ଡିସିଏମଙ୍କୁ ଧନ୍ୟବାଦ ଜଣାଇଛନ୍ତି। ଏହା ସହ କେସିଙ୍ଗାରୁ ଭୁବନେଶ୍ୱରକୁ ସିଧା ଏକ ନୂତନ ଟ୍ରେନ ଦେବା ପାଇଁ ସହରବାସୀ ରେଳମନ୍ତ୍ରୀଙ୍କୁ ଅନୁରୋଧ କରିଛନ୍ତି।
ସୂଚନାଯୋଗ୍ୟ, କଳାହାଣ୍ଡି ଜିଲା କେସିଙ୍ଗା ରେଳ ଷ୍ଟେଶନରୁ ରାଜଧାନୀ ଭୁବନେଶ୍ୱରକୁ ସିଧା ଏକ ଟ୍ରେନ ଚଳାଚଳ ଏବଂ ଇସ୍ପାତ ଟ୍ରେନକୁ ଟିଟିଲାଗଡ଼ରୁ ଜୁନାଗଡକୁ ସମ୍ପ୍ରସାରଣ ପାଇଁ ଦୀର୍ଘ ଦିନରୁ କେସିଙ୍ଗା ସିଟିଜେନ ଫୋରମର ସଭାପତି ତଥା ଜେଡ ଏସଏସର ସଦଦ୍ୟ ଡ଼.ହେମ ସାଗର ସାହାଙ୍କ ସମେତ କଳାହାଣ୍ଡି ଏମ୍ପି ମାଳବିକା ଦେବୀ,କଳାହାଣ୍ଡି ଜିଲା ରେଳ ଯାତ୍ରୀ ସଙ୍ଘ କେସିଙ୍ଗା ଏବଂ ଭବାନୀପାଟଣା ସଦର ବିଧାୟକ ସାଗର ଚରଣ ଦାଶ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଦୀର୍ଘ ଦିନରୁ ଦାବି ପତ୍ର ଦେଇଥିଲେ।
Dharitri – Odisha’s No.1 Odia Daily
