ନୂଆଦିଲ୍ଲୀ,୧।୧୧: ରାଜଧାନୀ ଦିଲ୍ଲୀର ଇନ୍ଦରପୁରୀଠାରେ ଥିବା ଏକ ୬୦ ବର୍ଷ ପୁରୁଣା ଅଶ୍ୱତ୍ଥ ଗଛକୁ କାଟିବା ପାଇଁ ହେଉଥିବା ଯୋଜନା ଉପରେ ରୋକ ଲାଗିଛି। ଦିଲ୍ଲୀ ହାଇକୋର୍ଟ ଏନେଇ ନିର୍ଦ୍ଦେଶ ଜାରି କରିଛନ୍ତି। ବରିଷ୍ଠ ଆଇନଜୀବୀ ଏନ୍.ହରିହରନ୍ଙ୍କ ପକ୍ଷରୁ ଦାଖଲ ହୋଇଥିବା ଆବେଦନରେ ଉଲ୍ଲେଖ କରାଯାଇଥିଲା ଯେ, ଗଛକୁ କାଟିବା ଦ୍ୱାରା ପରିବେଶ ଉପରେ ନକାରାତ୍ମକ ପ୍ରଭାବ ପଡ଼ିବା ସହ ସ୍ଥାନୀୟ ବାସିନ୍ଦାଙ୍କର ମଧ୍ୟ କ୍ଷତି ହେବ।
ଉତ୍ତର ଦିଲ୍ଲୀ ମ୍ୟୁନିସପାଲ କର୍ପୋରେଶନ, ଦିଲ୍ଲୀ ପୋଲିସ ଏବଂ ବନ ଉପ ସଂରକ୍ଷକଙ୍କୁ ଗଛ କାଟିବାରୁ ରୋକା ଯାଉବୋଲି ଆବେଦନରେ ଦର୍ଶାଯାଇଛି ଥିଲା।
ପ୍ରତିପକ୍ଷ ଆଇନଜୀବୀ ଅଭିନବ ଏସ୍. ଅଗ୍ରଓ୍ବାଲ କୋର୍ଟରେ ସୂଚିତ କରିଥିଲେ ଯେ, ଗଛ କାଟିବା ଲାଗି ବନ ଉପ ସଂରକ୍ଷକଙ୍କ ପକ୍ଷରୁ ଅନୁମତି ପ୍ରଦାନ କରାଯାଇଛି। ତେବେ ଅଭିନବ ସମ୍ପୃକ୍ତ ଅନୁମତି ସମ୍ପର୍କରେ ବିଶଦ ତଥ୍ୟ ଉପସ୍ଥାପନ କରିପାରି ନ ଥିଲେ। ସେହିପରି ଦିଲ୍ଲୀ ପୋଲିସ ଏବଂ ବନ ଉପସଂରକ୍ଷକଙ୍କ କାର୍ଯ୍ୟାଳୟ ପକ୍ଷରୁ ମଧ୍ୟ ଅନୁମତି ନିର୍ଦ୍ଦେଶନାମା ବିଷୟରେ କୌଣସି ସୂଚନା ପ୍ରଦାନ କରାଯାଇ ନ ଥିଲା।
ବିଚାରପତି ରେଖା ପାଲିଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହାର ବିଚାର କରି ଘର ନମ୍ବର ଏ-୭ ସମ୍ମୁଖରେ ଥିବା ଅଶ୍ୱତ୍ଥ ଗଛ କଟାଯିବା ଉପରେ ରୋକ ଲଗାଇଛନ୍ତି। ତେବେ ଖଣ୍ଡପୀଠ ଆଇନ ଅନ୍ତର୍ଗତ ଔପଚାରିକ ପିଟିଶନ ଦାଖଲ ପାଇଁ ଆବେଦନକାରୀଙ୍କୁ ନଭେମ୍ବର ୯ ପର୍ଯ୍ୟନ୍ତ ସମୟ ପ୍ରଦାନ କରିଛନ୍ତି।
ରୋଷ୍ଟର ବେଞ୍ଚ୍ଙ୍କଠାରେ ନଭେମ୍ବର ୧୧ରେ ଏହି ମାମଲାକୁ ତାଲିକାଭୁକ୍ତ କରିବା ଲାଗି ଖଣ୍ଡପୀଠ କହିଛନ୍ତି।
