କୋଲକାତା,୧୫ା୭: ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କ ବିଜୟକୁ ଚ୍ୟାଲେଞ୍ଜ କରିଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଆବେଦନକୁ ବୁଧବାର କାଲକାଟା ହାଇକୋର୍ଟ ଗ୍ରହଣ କରିଛନ୍ତି। ଜଷ୍ଟିସ୍ ଶାମ୍ପା ସର୍କାର ନନ୍ଦିଗ୍ରାମର ପରାଜିତ ଟିଏମ୍ସି ପ୍ରାର୍ଥୀ ମମତାଙ୍କ ପିଟିଶନର ଶୁଣାଣି ଅଗଷ୍ଟ ୧୨ରେ କରିବାକୁ ଧାର୍ଯ୍ୟ କରିଛନ୍ତି। ଇତିମଧ୍ୟରେ ଭାଜପା ବିଧାୟକ ଶୁଭେନ୍ଦୁ ଓ ଅନ୍ୟ ପକ୍ଷମାନଙ୍କୁ ନୋଟିସ କରିବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ନନ୍ଦିଗ୍ରାମ ନିର୍ବାଚନ ସମ୍ପର୍କିତ ସମସ୍ତ ରେକର୍ଡ ଓ ଉପକରଣ ସୁରକ୍ଷିତ ରଖିବା ପାଇଁ ନିର୍ବାଚନ କମିଶନଙ୍କୁ ନିର୍ଦ୍ଦେଶ ଦିଆଯାଇଛି। ଶୁଭେନ୍ଦୁ ଉକ୍ତ ଆସନରୁ ମମତାଙ୍କୁ ୧,୯୫୬ ଭୋଟ ବ୍ୟବଧାନରେ ପରାଜିତ କରିଥିବା ନିର୍ବାଚନ କମିଶନ ଘୋଷଣା କରିଥିଲେ। ମମତା ଏହା ବିରୋଧରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଇତିମଧ୍ୟରେ ମମତାଙ୍କ ଆବେଦନକୁ ରାଜ୍ୟ ବାହାର କୌଣସି ଏକ କୋର୍ଟକୁ ସ୍ଥାନାନ୍ତର କରାଯାଉ ବୋଲି ଶୁଭେନ୍ଦୁ ସୁପ୍ରିମକୋର୍ଟ ଯାଇଛନ୍ତି। ସେପଟେ ପଶ୍ଚିମବଙ୍ଗ ସିଆଇଡି ଅଧିକାରୀମାନେ ଶୁଭେନ୍ଦୁଙ୍କ କୋଣ୍ଟାଇ ବାସଭବନରେ ପହଞ୍ଚିଛନ୍ତି। ୩ ବର୍ଷ ତଳେ ଶୁଭେନ୍ଦୁଙ୍କ ସୁରକ୍ଷାକର୍ମୀଙ୍କ ସନ୍ଦେହଜନକ ମୃତ୍ୟୁକୁ ନେଇ ତଦନ୍ତ କରିଛନ୍ତି।
