ଭୁବନେଶ୍ୱର,୧୧।୧୧:ଦେଶର ପ୍ରମୁଖ ଘରୋଇ ପ୍ରତିଷ୍ଠାନ ଜିନ୍ଦଲ ଷ୍ଟିଲ୍ ଆଣ୍ଡ ପାୱାର (ଜେଏସ୍ପି)ର ସିଏସ୍ଆର୍ ଶାଖା ଜେଏସ୍ପି ଫାଉଣ୍ଡେଶନ ପକ୍ଷରୁ ‘ପ୍ରୋଜେକ୍ଟ ଆସିଆନା’ର ଶୁଭାରମ୍ଭ କରାଯାଇଛି। ଉକ୍ତ ପ୍ରକଳ୍ପ ଜରିଆରେ ଦେଶର ଆର୍ଥିକ ଦୁର୍ବଳ ପରିବାରକୁ ଗୃହନିର୍ମାଣର ସହାୟତା ଯୋଗାଇଦିଆଯିବ। ଏପରିକି ପ୍ରଥମ ପର୍ଯ୍ୟାୟରେ ଉକ୍ତ ପ୍ରକଳ୍ପରୁ ସହାୟତା ପାଇଁ ୫୨୯ ଜଣ ଆର୍ଥିକ ଦୁର୍ବଳ ଲୋକଙ୍କୁ ଚିହ୍ନଟ କରାଯାଇଛି। ଉଲ୍ଲେଖଯୋଗ୍ୟ , ଓଡ଼ିଶାର ଅନୁଗୋଳ, ରାୟଗଡ଼, ବଡ଼ବିଲ, ଟେନ୍ସା ଏବଂ ଭୁବନେଶ୍ୱର ସମେତ ନୂଆଦିଲ୍ଲୀରୁ ହାଇବ୍ରିଡ୍ ଜରିଆରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଉକ୍ତ ପ୍ରକଳ୍ପର ଶୁଭାରମ୍ଭ କରି ଜେଏସ୍ପି ଫାଉଣ୍ଡେଶନର ଚେୟାରପର୍ସନ୍ ଶାଲୁ ଜିନ୍ଦଲ କହିଥିଲେ, ପ୍ରତ୍ୟେକ ପରିବାର ପାଇଁ ବାସଗୃହ ଏକ ସ୍ବପ୍ନ । କିନ୍ତୁ ଦୁର୍ବଳ ଆର୍ଥିକ ଅବସ୍ଥା କିଛି ଲୋକଙ୍କୁ ନିଜ ଘର ନିର୍ମାଣରୁ ବଞ୍ଚିତ କରିଥାଏ। ହେଲେ ଲୋକଙ୍କ ଜୀବନଶୈଳୀରେ ଉନ୍ନତି ଆଣିବାକୁ ଜେଏସ୍ପି ଫାଉଣ୍ଡେଶନ ନିରନ୍ତର ପ୍ରୟାସ କରିଆସୁଛି ଏବଂ ‘ପ୍ରୋଜେକ୍ଟ ଆସିଆନା’ କାର୍ଯ୍ୟକ୍ରମରେ ୫୦୦ରୁ ଅଧିକ ପରିବାରକୁ ସେମାନଙ୍କର ସ୍ବପ୍ନର ଘର ନିର୍ମାଣ କରିବାରେ ସହାୟତା ପ୍ରଦାନ କରୁଛି। ଉକ୍ତ ପ୍ରକଳ୍ପ ଅଧୀନରେ ଭାରତର ୧୩ଟି ରାଜ୍ୟରୁ ମୋଟ ୫୨୯ ପରିବାର ଆର୍ଥିକ ସହାୟତା ପାଇଁ ଚୟନ କରାଯାଇଛି। ସେହିପରି ଉକ୍ତ କାର୍ଯ୍ୟକ୍ରମ ଜରିଆରେ ମଧ୍ୟ ସେମାନଙ୍କୁ ଆର୍ଥିକ ଅନୁଦାନ ପାଇଁ ଆୱାର୍ଡ ଲେଟର ପ୍ରଦାନ କରାଯାଇଥିଲା। ପ୍ରୋଜେକ୍ଟ ଆସିଆନା ଅଧୀନରେ ମନୋନୀତ ପରିବାରକୁ ୨,୫୦,୦୦୦ ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ପ୍ରଦାନ କରାଯିବ। ଫାଉଣ୍ଡେଶନର ମୂଲ୍ୟାଙ୍କନ ଉପରେ ଆଧାରକରି ସେମାନଙ୍କ ବାସଗୃହ ତଥା ଶୌଚାଳୟ, ପାନୀୟ ଜଳ ଏବଂ ବିଦ୍ୟୁତୀକରଣ ଭଳି ସୁବିଧା ନିର୍ମାଣ କରିବା ପାଇଁ ଏହି ସହାୟତା ପ୍ରଦାନ କରାଯିବ।
