ନୂଆଦିଲ୍ଲୀ,୧୬।୫ : ଦିଲ୍ଲୀର ଶାହଦରା ଅଞ୍ଚଳରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଜଣେ ୪୫ ବର୍ଷ ବୟସ୍କ ବ୍ୟକ୍ତି ତାଙ୍କ ସ୍ତ୍ରୀ ଏବଂ ୬ ବର୍ଷର ଝିଅଙ୍କୁ ହତ୍ୟା କରି ଛୁରୀରେ ପୁଅ ଯୁବରାଜଙ୍କୁ ଆକ୍ରମଣ କରିଥିଲେ। ପୁଅ ବଞ୍ଚିଛି ଏବଂ ତାଙ୍କୁ ଜିଟିବି ଡାକ୍ତରଖାନାରେ ଭର୍ତ୍ତି କରାଯାଇଛି। ହତ୍ୟା ପରେ ଏହି ବ୍ୟକ୍ତି ମଧ୍ୟ ଫ୍ୟାନରେ ଫାଶୀ ଦେଇ ଆତ୍ମହତ୍ୟା କରିଛନ୍ତି। ବ୍ୟକ୍ତି ଜଣକ ଦିଲ୍ଲୀ ମେଟ୍ରୋରେ କାମ କରୁଥିଲେ। ସେ କାହିଁକି ଏପରି କଲେ ତାହା ଏପର୍ଯ୍ୟନ୍ତ ଜଣା ପଡିନାହିଁ ଏବଂ ପୋଲିସ ଏହାର ଅନୁସନ୍ଧାନ କରୁଛି। ପୋଲିସର ତଦନ୍ତରେ କିଛି ଆଶ୍ଚର୍ଯ୍ୟଜନକ ଘଟଣା ମଧ୍ୟ ସାମ୍ନାକୁ ଆସିଛି।
ଅନୁସନ୍ଧାନରେ ଏହା ମଧ୍ୟ ସାମ୍ନାକୁ ଆସିଛି ଏହି ବ୍ୟକ୍ତି କମ୍ପ୍ୟୁଟରରେ କିପରି ଫାଶୀ ଦେଇ ହେବ ତାହା ସର୍ଚ୍ଚ କରିଥିଲେ। ଡିସିପି ଶାହଦରା ରୋହିତ ମୀନା ମଙ୍ଗଳବାର କହିଛନ୍ତି ପଶ୍ଚିମ ବିନୋଦ ନଗରରେ ଅବସ୍ଥିତ ଡିଏମଆରସି ଡିପୋରେ ସୁଶୀଲ ଜଣେ ସୁପରଭାଇଜର ଥିଲେ। ସ୍ତ୍ରୀ ଅନୁରାଧା, ଝିଅ ଆଦିତି ଏବଂ ପୁଅ ଯୁବରାଜଙ୍କୁ ଛୁରୀରେ ଆକ୍ରମଣ କରିଥିଲେ। ଏହା ପରେ ସେ ନିଜକୁ ଫାଶୀ ଦେଇଥିଲେ। ତିନିଜଣଙ୍କର ମୃତ୍ୟୁ ହୋଇଥିବାବେଳେ ପୁଅ ଯୁବରାଜ ଜିଟିବି ହସ୍ପିଟାଲରେ ଚିକିତ୍ସିତ ହେଉଛନ୍ତି।
ପରିବାର ସଦସ୍ୟଙ୍କୁ ହତ୍ୟା କରିବା ପରେ ସୁଶୀଲଙ୍କୁ ତାଙ୍କ ବନ୍ଧୁଙ୍କଠାରୁ କଲ ଆସିଥିବା କୁହାଯାଉଛି। ସେ ପଚାରିଲେ ତୁମେ କାହିଁକି ଡ୍ୟୁଟିକୁ ଆସିନାହଁ? ଏହାର ଉତ୍ତରରେ ସୂଶୀଲ କହିଥିଲେ ହ୍ୟାଲୋ ମୁଁ ମୋ ଘରର ସମସ୍ତ ସଦସ୍ୟଙ୍କୁ ହତ୍ୟା କରିଦେଇଛି ଏବଂ ବର୍ତ୍ତମାନ ନିଜେ ଆତ୍ମହତ୍ୟା କରିବାକୁ ଯାଉଛି। ଏହା ପରେ ତାଙ୍କ ବନ୍ଧୁ ପୋଲିସକୁ ସୂଚନା ଦେଇଥିଲେ। ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା।
ମଧ୍ୟାହ୍ନ ପ୍ରାୟ ୧୨ ଟା ସମୟରେ ଦିଲ୍ଲୀ ପୋଲିସ ପିସିଆର କଲ ପାଇଥିଲା। ଘଟଣାସ୍ଥଳରେ ପହଞ୍ଚିଥିବା ପୋଲିସ ବିଭିନ୍ନ ଦିଗରୁ ଯାଞ୍ଚ କରୁଛି। ରାସ୍ତାରେ ରହୁଥିବା ଲୋକଙ୍କୁ ମଧ୍ୟ ପୋଲିସ ପଚରାଉଚରା କରୁଛି। ମୃତଦେହଗୁଡ଼ିକୁ ପୋଷ୍ଟମର୍ଟମ ପାଇଁ ପଠାଯାଇଛି। ପୋଲିସ ଏକ ସୁଇସାଇଡ ନୋଟ ମଧ୍ୟ ପାଇଛି।
