କିନଶାସା,୧୫।୪: ଡେମୋକ୍ରାଟିକ ରିପବ୍ଲିକ ଅଫ କଙ୍ଗୋ (DRC)ର ଅନେକ ସ୍ଥାନରେ ପ୍ରବଳ ବର୍ଷା ଏବଂ ବନ୍ୟା ବିପର୍ଯ୍ୟୟ ସୃଷ୍ଟି କରିଛି। ଦେଶର ରାଜଧାନୀ କିନଶାସା ସବୁଠାରୁ ଅଧିକ ପ୍ରଭାବିତ ହୋଇଛି ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ କହିଛି।
ସଦ୍ୟତମ ସୂଚନା ଅନୁଯାୟୀ, କିନଶାସାର ୧୧ଟି ସ୍ବାସ୍ଥ୍ୟ କ୍ଷେତ୍ର କ୍ଷତିଗ୍ରସ୍ତ ହୋଇଛି। ସେଠାକାର ୫,୦୦୦ରୁ ଅଧିକ ଲୋକଙ୍କୁ ଘର ଛାଡିବାକୁ ବାଧ୍ୟ କରାଯାଇଛି। ଏପର୍ଯ୍ୟନ୍ତ ଅତି କମରେ ୭୨ଜଣ ପ୍ରାଣ ହରାଇଛନ୍ତି ଏବଂ ୧୭୦ରୁ ଅଧିକ ଆହତ ହୋଇଛନ୍ତି। ପ୍ରବଳ ବର୍ଷା ଏବଂ ବନ୍ୟା ଯୋଗୁ ବହୁ କ୍ଷତି ହୋଇଥିବା ଜଣାପଡିଛି।
ଦେଶର ପୂର୍ବରେ ଥିବା ଟାଙ୍ଗାନିକା ଏବଂ ଦକ୍ଷିଣ କିଭୁ ପ୍ରଦେଶ ମଧ୍ୟ ପ୍ରବଳ କ୍ଷତି ସହିଛି। ସେଠାକାର ସ୍ଥାନୀୟ ସରକାର ଆବଶ୍ୟକୀୟ ସାହାଯ୍ୟର ପୂର୍ଣ୍ଣ ମୂଲ୍ୟାଙ୍କନ କରିବାରେ ବ୍ୟସ୍ତ ଅଛନ୍ତି।
କିନସାସା ଷ୍ଟାଡିୟମରେ ଜରୁରୀକାଳୀନ ରିଲିଫ କେନ୍ଦ୍ର ଏବଂ ଆଶ୍ରୟସ୍ଥଳ ସ୍ଥାପନ କରାଯାଇଛି। ତଥାପି, ଦେଶର ସର୍ବବୃହତ କ୍ରୀଡା ଷ୍ଟାଡିୟମ, ଷ୍ଟେଡ ଡି ମାର୍ଟିୟର୍ସରେ ୪,୫୦୦ରୁ ଅଧିକ ଲୋକ ପହଞ୍ଚି ସାରିଛନ୍ତି। ତେଣୁ ସରକାର ଏବେ ଲୋକଙ୍କୁ ଅନ୍ୟ ସ୍ଥାନକୁ ପଠାଇବାକୁ ଯୋଜନା କରୁଛନ୍ତି।
ସ୍ବାସ୍ଥ୍ୟ ମନ୍ତ୍ରଣାଳୟ କହିଛି ଯେ ସ୍ବାସ୍ଥ୍ୟ ଏବଂ ରିଲିଫ କାର୍ଯ୍ୟ ମଧ୍ୟରେ ଉତ୍ତମ ସମନ୍ବୟ ବଜାୟ ରଖିବା ପାଇଁ ଏହା ସମ୍ପୂର୍ଣ୍ଣ ପ୍ରସ୍ତୁତ, ଯାହା ଦ୍ୱାରା ବାସହରାମାନେ ଶୀଘ୍ର ଏବଂ ସଠିକ ଭାବରେ ସାହାଯ୍ୟ ପାଇପାରିବେ।
ଆଗାମୀ ଦିନରେ ଆହୁରି ପ୍ରବଳ ବର୍ଷା ହେବାର ଆଶଙ୍କା କରାଯାଉଛି, ଯାହା ୧୭ ନିୟୁତ ଲୋକଙ୍କ ଏହି ସହରରେ ଆହୁରି କ୍ଷୟକ୍ଷତିର ଆଶଙ୍କା ସୃଷ୍ଟି କରିଛି। ଦ୍ରୁତ ଏବଂ ଅଣଯୋଜନାବଦ୍ଧ ସହରୀକରଣ ଯୋଗୁଁ ସହରଟି ପୂର୍ବରୁ ସମସ୍ୟାର ସମ୍ମୁଖୀନ ହେଉଛି।
ଗୁରୁତ୍ୱପୂର୍ଣ୍ଣ କଥା ହେଉଛି DRCରେ ବର୍ଷା ଋତୁ ସାଧାରଣତଃ ନଭେମ୍ବରରୁ ମେ ପର୍ଯ୍ୟନ୍ତ ଚାଲିଥାଏ।
