ନନ୍ଦପୁର,୧ା୪(ତୁଷାରକାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ଅଞ୍ଚଳରେ ବୁଧବାର ପବନ ସହ କୁଆପଥର ବର୍ଷା ହୋଇଛି। ଯାହାର ପ୍ରଭାବରେ ନନ୍ଦପୁର ବ୍ଲକ ସଦର ମହକୁମା ସ୍ଥିତ ବୁଧବାର ସାପ୍ତାହିକ ହାଟ ମଝିରେ ଏକ ବିରାଟ ଆମ୍ବଗଛ ଭାଙ୍ଗି ପିଣ୍ଡି ଉପରେ ପଡ଼ିବାରୁ ଜଣେ ବ୍ୟବସାୟୀ ଗୁରୁତର ହୋଇଛନ୍ତି। ଏକାଧିକ ବାଇକ୍ ଭାଙ୍ଗି ନଷ୍ଟ ହୋଇଛି। ଗୁରୁତର ଲୁଗା ବ୍ୟବସାୟୀ ଜଣକ ସେମିଲଗଡ଼ା ଓସିସନଗର ଅଞ୍ଚଳର ହରେକୃଷ୍ଣ ବେହେରା (୬୨) ବୋଲି ପରିଚୟ ମିଳିଛି। ତାଙ୍କୁ ସଙ୍ଗେ ସଙ୍ଗେ ଅନ୍ୟ ବ୍ୟବସାୟୀମାନେ ଚିକିତ୍ସା ନିମନ୍ତେ ସେମିଳିଗୁଡା ନେଇ ଯାଇଥିବା ସୂଚନା ମିଳିଛି। ସାଧାରଣତଃ ବୁଧବାର ସାପ୍ତାହିକ ହାଟ ଜନଗହଳି ପୂର୍ଣ୍ଣ ଥାଏ।କିନ୍ତୁ ସୌଭାଗ୍ୟ ଭାଙ୍ଗି ପଡ଼ିଥିବା ଗଛର ଆକାର ବଡ଼ ଥିଲେ ମଧ୍ୟ ଖାଲି ସ୍ଥାନରେ ପଡ଼ି ଥିବାରୁ ଏକ ବଡ଼ଧରଣର ଦୁର୍ଘଟଣାରୁ ହାଟକୁ ଆସୁଥିବା ବ୍ୟବସାୟୀ ଓ ଖାଉଟି ବର୍ତ୍ତି ଯାଇଛନ୍ତି। ଘଟଣାସ୍ଥଳରେ ନନ୍ଦପୁର ଥାନାଧିକାରୀ ତ୍ରିନାଥ ତୋଟା ପାଡ଼ିଆ ଓ ଅଗ୍ନିଶମ ଓଆଇସି ହେମନ୍ତ କୁମାର ସାମଲଙ୍କ ଟିମ୍ ପହଞ୍ଚି ଘଟଣାର ତଦାରଖ କରୁଛନ୍ତି। ଅଗ୍ନିଶମ ଦଳ ହାଟ ମଝିରେ ପଡ଼ିଥିବା ଆମ୍ବ ଗଛଟିକୁ କାଟି ହଟାଇଥିଲେ।
