ବଅଁରପାଳ, ୨୦ା୯ (ଡି.ଏନ.ଏ.): ଅନୁଗୋଳ ଜିଲା ନାଲ୍କୋନଗରରେ ଚାଲିଥିବା ବିଶ୍ୱକର୍ମା ପୂଜାରେ ପ୍ରବଳ ଭିଡ଼ ପରିଲକ୍ଷିତ ହେଉଛି। ଚଳିତବର୍ଷ ୧୮ଟି ମେଢ଼ କରାଯାଇଥିବା ବେଳେ ଆକର୍ଷଣୀୟ ସାଜସଜ୍ଜା ଦର୍ଶକମାନଙ୍କୁ ଆକର୍ଷିତ କରୁଛି। ବିଭିନ୍ନ ପୂଜା କମିଟିର ତୋରଣ ଓ ରଙ୍ଗବେରଙ୍ଗର ଆଲୋକମାଳା ଲୋକମାନଙ୍କ ମନଛୁଉଁଛି। ସେଥିପାଇଁ ଦୈନିକ ସହସାଧିକ ଲୋକ ଦୂର ଦୂରାନ୍ତରୁ ପୂଜା ଦେଖିବାକୁ ଆସୁଛନ୍ତି। ସୋମବାର ପୂଜାର ତୃତୀୟ ଦିବସରେ ପ୍ରବଳ ଗହଳି ହୋଇଥିଲା। ପୂର୍ବାହ୍ନରୁ ବିଳମ୍ବିତ ରାତି ଯାଏ ଦର୍ଶକମାନେ ମେଢ଼ଗୁଡ଼ିକ ବୁଲି ଦେଖିବା ସହ ମିନାବଜାର, ଦୋଳି ଓ ଖଦି ମେଳାର ମଜା ନେଉଥିବା ଦେଖିବାକୁ ମିଳିଥିଲା। ନାଲ୍କୋ ଏଫ୍ସିଆଇ ଛକଠାରୁ ଗିରାଙ୍ଗ ଛକ ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ୱରେ ପଡ଼ିଥିବା ଶତାଧିକ ଉଠାଦୋକାନାରେ ଲୋକଙ୍କ ଭିଡ଼ ଲାଗିଥିଲା। ନାଲ୍କୋ ଉଦ୍ୟାନ ବିଭାଗ ପକ୍ଷରୁ ଧୁମ୍ଧାମରେ ପୂଜା ପାଳନ କରାଯାଉଥିବା ବେଳେ ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହୋଇଛି। ଉଦ୍ୟାନ ବିଭାଗ ଡିଜିଏମ୍ ଶୁଭେନ୍ଦୁ ନାୟକ, ଏଜିଏମ୍ ଉମାକାନ୍ତ ମହାରଣା, ମ୍ୟାନଜର ପି.କେ. ମଲ୍ଲିକ ପ୍ରମୁଖଙ୍କ ସମେତ ସମସ୍ତ କର୍ମଚାରୀ ଓ ଠିକା ଶ୍ରମିକ ପୂଜାରେ ସାମିଲ ହୋଇଛନ୍ତି। ସେହିପରି ନାଲ୍କୋ ଟ୍ରକ୍ ମାଲିକ ସଂଘ ପକ୍ଷରୁ ଅତି ଆଡ଼ମ୍ବରରେ ପୂଜା ପାଳନ କରାଯାଉଛି। ଶ୍ରଦ୍ଧାଳୁଙ୍କ ପାଇଁ ଦୈନିକ ପ୍ରସାଦ ସେବନର ବ୍ୟବସ୍ଥା କରାଯାଇଛି। ସଭପତି ମନୋରଞ୍ଜନ ଜେନା, ଉପସଭାପତି ତପନ ସାମନ୍ତ ସିଂ, ସମ୍ପାଦକ ବାବୁଲି ସ୍ବାଇଁ, ସହସମ୍ପାଦକ ରାକେଶ ଦେହୁରୀ ଓ କୋଷଧ୍ୟକ୍ଷ ମୁକେଶ ଜେନା ପ୍ରମୁଖ ପୂଜା ପରିଚଳନା କରୁଛନ୍ତି।
