ନୂଆଦିଲ୍ଲୀ,୨୯।୧୨: ଅଷ୍ଟ୍ରେଲିଆ ସହ ଖେଳାଯାଉଥିବା ମେଲବୋର୍ନ ଟେଷ୍ଟ ମ୍ୟାଚରେ ଶତକ ହାସଲ କରି ନୀତୀଶ କୁମାର ରେଡ୍ଡୀ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି। ତାଙ୍କ ଶତକ ସମଗ୍ର ଦେଶକୁ ଗର୍ବିତ କରିଥିଲା। ମେଲବୋର୍ନ ଷ୍ଟାଡିୟମରେ ଉପସ୍ଥିତ ଥିବା ତାଙ୍କ ପରିବାର ଅତ୍ୟନ୍ତ ଭାବପ୍ରବଣ ହୋଇଥିଲେ। ଏହା ପରେ ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ନୀତୀଶଙ୍କ ପିତା ଭେଟେରାନ କ୍ରିକେଟର ସୁନୀଲ ଗାଭାସ୍କରଙ୍କ ପାଦ ଛୁଇଁଥିବାର ନଜର ଆସିଛନ୍ତି।
ନୀତୀଶ କୁମାର ରେଡ୍ଡୀଙ୍କ ଶତକ ପରେ ତାଙ୍କ ପିତା ମୁତିଲିଆ ରେଡ୍ଡୀ ଅତ୍ୟନ୍ତ ଭାବପ୍ରବଣ ଦେଖାଯାଉଥିଲେ। ଷ୍ଟାଡିୟମରେ ତାଙ୍କ ଆଖିରୁ ଖୁସିର ଲୁହ ଝରିବାକୁ ଲାଗିଲା। ଯେତେବେଳେ ପୁଅର ଶତକ ପରେ ବାପା ଭେଟେରାନ କ୍ରିକେଟର ସୁନୀଲ ଗାଭାସ୍କରଙ୍କୁ ଭେଟିବାକୁ ଆସିଥିଲେ, ସେତେବେଳେ ସେ ଗାଭାସ୍କରଙ୍କ ପାଦ ଛୁଇଁ ତାଙ୍କୁ ସମ୍ମାନ ଜଣାଇଥିଲେ। କେବଳ ବାପା ମୁତିୟା ନୁହେଁ ତାଙ୍କ ସହିତ ମା’ ଏବଂ ନୀତୀଶଙ୍କ ଭଉଣୀ ମଧ୍ୟ ଗାଭାସ୍କରଙ୍କ ପାଦ ଛୁଇଁଥିଲେ । ନୀତୀଶଙ୍କ ପିତା ଗାଭାସ୍କରଙ୍କ ପାଦ ଛୁଇଁବା ପରେ ସେ ତାଙ୍କ ଆଣ୍ଠୁରେ ବସି ତାଙ୍କ ସହ କଥା ହେବା ଆରମ୍ଭ କଲେ।
ନୀତୀଶ ରେଡ୍ଡୀଙ୍କ ପରିବାର ସହିତ ସାକ୍ଷାତ ସମୟରେ ସୁନୀଲ ଗାଭାସ୍କର ନୀତୀଶଙ୍କ ବ୍ୟାଟିଂ ବିଷୟରେ କହିଥିଲେ। ସେ କହିଛନ୍ତି ଯେ ସେ ଜଣେ ହୀରା। ପୁଅର ପ୍ରଦର୍ଶନରେ ବାପା ବହୁତ ଖୁସି ଅଛନ୍ତି ଏବଂ ଶବ୍ଦ ମାଧ୍ୟମରେ ମଧ୍ୟ ନିଜର ଖୁସି ବ୍ୟକ୍ତ କରିଛନ୍ତି । ନୀତୀଶଙ୍କ ଶତକ ପରେ ତାଙ୍କ ପିତା ଏକ ଥରିବା ସ୍ବରରେ କହିଛନ୍ତି, ‘ସେ ଅଣ୍ଡର -୧୪, ଅଣ୍ଡର -୧୫ ରୁ ନିଜ ରାଜ୍ୟ ପାଇଁ ଖେଳୁଛନ୍ତି ଏବଂ ବର୍ତ୍ତମାନ ସେ ଟିମ ଇଣ୍ଡିଆ ପାଇଁ ଆନ୍ତର୍ଜାତୀୟ ସ୍ତରରେ ଖେଳୁଛନ୍ତି। ଆଜି ଆମ ପାଇଁ ଏହା ଏକ ସ୍ବତନ୍ତ୍ର ମୁହୂର୍ତ୍ତ।’
