ନୂଆଦିଲ୍ଲୀ, ୩୧ା୧୦: କେନ୍ଦ୍ର ସରକାର ୨୦୧୯ରେ ଆଣିଥିବା ନାଗରିକତ୍ୱ ସଂଶୋଧନ ଆଇନ (ସିଏଏ)ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଦାଖଲ ୨୩୨ ଆବେଦନର ଶୁଣାଣି ସୋମବାର ହେବ। ସିଜେଆଇ ୟୁ.ୟୁ. ଲଲିତ ଏବଂ ଜଷ୍ଟିସ୍ ରବୀନ୍ଦ୍ର ଭଟ୍ଟଙ୍କ ଖଣ୍ଡପୀଠ ଏହି ବିବାଦୀୟ ଆଇନର ଭାଗ୍ୟ ନିର୍ଦ୍ଧାରଣ କରିବେ।
ପୂର୍ବରୁ କୋଭିଡ୍-୧୯ ମହାମାରୀ ଯୋଗୁ ଏହି ସମ୍ବେଦନଶୀଳ ପ୍ରସଙ୍ଗରେ ଶୁଣାଣି ହୋଇପାରି ନ ଥିଲା। ଗତ ସେପ୍ଟେମ୍ବର ୧୨ରେ ସିଜେଆଇଙ୍କ ଖଣ୍ଡପୀଠ ଏହାର ଶୁଣାଣି କରି ୩ ଜଣିଆ ଖଣ୍ଡପୀଠରେ ଆଗକୁ ବିଚାର କରାଯିବ ବୋଲି କହିଥିଲେ। ପ୍ରକାଶ ଯେ, ଇଣ୍ଡିଆନ୍ ୟୁନିୟନ୍ ମୁସ୍ଲିମ ଲିଗ୍, ଟିଏମ୍ସି ଏମ୍ପି ମହୁଆ ମୋଇତ୍ର, ପୂର୍ବତନ କେନ୍ଦ୍ରମନ୍ତ୍ରୀ ଜୟରାମ ରମେଶ, ଏଆଇଏମ୍ଆଇଏମ୍ ମୁଖ୍ୟ ଅସାଦୁଦ୍ଦିନ ଓଓ୍ବାଇସିଙ୍କ ସମେତ ଅନେକ ରାଜନୈତିକ ଦଳ ଓ ସଙ୍ଗଠନ ପକ୍ଷରୁ ସିଏଏର ବୈଧତାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଛି। ସିଏଏ କେବଳ ଆଇନ ଉପରେ ଗୁରୁତ୍ୱ ଦେଇ ବେଆଇନ ଅନୁପ୍ରବେଶକୁ ବାରଣ କରିଛି ବୋଲି କେନ୍ଦ୍ର ସରକାରଙ୍କ ପକ୍ଷରୁ ସତ୍ୟପାଠରେ ଦର୍ଶାଯାଇଛି।
