ଥୁଆମୂଳ ରାମପୁର, ୧୯।୯ (ଦୁର୍ଗା କୀର୍ତ୍ତି ): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ ସିନ୍ଧିପଦର ଗ୍ରାମ ପଞ୍ଚାୟତର ଉପାନ୍ତ ଅଞ୍ଚଳରେ ଏକ ମେଗା ସ୍ବାସ୍ଥ୍ୟ ଶିବିର ସଫଳତାର ସହ ସମ୍ପନ୍ନ ହୋଇଯାଇଛି। ସ୍ବାଧୀନତାର ଦୀର୍ଘ ୭୮ ବର୍ଷ ପରେ ମଧ୍ୟ ଯେଉଁ ଗ୍ରାମଗୁଡ଼ିକୁ ମୌଳିକ ସୁବିଧା ପହଞ୍ଚିବା ସାତସପନ ଥିଲା, ଜିଲା ଓ ବ୍ଲକ ପ୍ରଶାସନର ମିଳିତ ପ୍ରଚେଷ୍ଟାରେ ସେହି ଦୁର୍ଗମ ପଥରେ ଗାଡ଼ି ଚଳାଚଳ ସମ୍ଭବ ହୋଇଛି। ଏହି ସଫଳତା କ୍ରମରେ ସୱାସ୍ଥ୍ୟକର୍ମୀମାନେ ପ୍ରଥମ ଥର ପାଇଁ ପଞ୍ଚାୟତ ମୁଖ୍ୟାଳୟ ବଦଳରେ ସିଧାସଳଖ ଗାଁରେ ପହଞ୍ଚି ଲୋକଙ୍କୁ ଦୁଆରମୁହଁରେ ସେବା ଯୋଗାଇଛନ୍ତି। ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଡାକ୍ତର ପ୍ରଦ୍ୟୁଶ କୁମାର ପଣ୍ଡାଙ୍କ ନିର୍ଦ୍ଦେଶକ୍ରମେ ସିନ୍ଧିପଦର ପଞ୍ଚାୟତର ଦୁର୍ଗମ କନ୍ଦାଗୁଡ଼ା ଗ୍ରାମରେ ଏହି ଶିବିର ଅନୁଷ୍ଠିତ ହୋଇଥିଲା। ଏଥିରେ କନ୍ଦାଗୁଡ଼ା, କେନ୍ଦୁଗୁଡ଼ା ଏବଂ ତଳ କେନ୍ଦୁଗୁଡ଼ା ଗ୍ରାମର ୧୦୦ ରୁ ଊର୍ଦ୍ଧ୍ୱ ଜନସାଧାରଣ ଉପସ୍ଥିତ ରହି ସ୍ବାସ୍ଥ୍ୟ ସେବାର ସୁଯୋଗ ନେଇଥିଲେ। ଶିବିରରେ ସିନ୍ଧିପଦର ସିଏଚଓ କମଳିନୀ ସବର, ଆଶା କର୍ମୀ ମନ୍ଦାକିନୀ ନାଏକ ଏବଂ ମହିଳା ସ୍ବାସ୍ଥ୍ୟକର୍ମୀ ଧନ୍ମତୀ ପୋଟେଲ ପ୍ରମୁଖ ୪୦ରୁ ଅଧିକ ଗ୍ରାମବାସୀଙ୍କର ସ୍ବାସ୍ଥ୍ୟ ପରୀକ୍ଷା କରିଥିଲେ। ଏହି ଅବସରରେ ମୁଖ୍ୟତଃ ଜ୍ୱର, କାଶ ଓ ଥଣ୍ଡା ଜନିତ ରୋଗର ଚିକିତ୍ସା କରାଯିବା ସହ ମ୍ୟାଲେରିଆ, ମଧୁମେହ, ରକ୍ତଚାପ, ଏଚଆଇଭି ଏବଂ ସିକ୍ଲିନ ଆଦି ଗୁରୁତ୍ୱପୂର୍ଣ୍ଣ ରକ୍ତ ପରୀକ୍ଷା କରାଯାଇଥିଲା। ଏହା ସହିତ ଜନ୍ମରୁ ୫ ବର୍ଷ ବୟସ ମଧ୍ୟରେ ଥିବା ଶିଶୁମାନଙ୍କୁ ଆବଶ୍ୟକୀୟ ଟିକା ପ୍ରଦାନ କରାଯାଇଥିଲା।
ଶିବିରରେ ବହୁ ସଂଖ୍ୟାରେ ଗର୍ଭବତୀ ମହିଳା ମଧ୍ୟ ଉପସ୍ଥିତ ରହି ସ୍ବାସ୍ଥ୍ୟ ପରୀକ୍ଷା କରାଇଥିଲେ। ଚିକିତ୍ସା ସହ ସ୍ବାସ୍ଥ୍ୟକର୍ମୀମାନେ ଗ୍ରାମବାସୀଙ୍କୁ ବ୍ୟକ୍ତିଗତ ସ୍ବଚ୍ଛତା ଓ ସ୍ବାସ୍ଥ୍ୟର ଯତ୍ନ ନେବା ପାଇଁ ପରାମର୍ଶ ଦେଇଥିଲେ। ପାହାଡ଼, ଘଞ୍ଚ ଜଙ୍ଗଲ ଓ ବିପଦସଙ୍କୁଳ ରାସ୍ତା ଅତିକ୍ରମ କରି ସ୍ବାସ୍ଥ୍ୟକର୍ମୀମାନେ ସେବା ଯୋଗାଇଥିବାରୁ ସ୍ଥାନୀୟ ଅଞ୍ଚଳରେ ସେମାନଙ୍କ ନିଷ୍ଠାକୁ ଉଚ୍ଚ ପ୍ରଶଂସା କରାଯାଇଛି।
ବର୍ତ୍ତମାନ ଜୁନାଗଡ଼ ବ୍ଲକର ଦେଦୋରୋ ପାର୍ଶ୍ୱରୁ ଏହି ଗ୍ରାମଗୁଡ଼ିକୁ ଏକ ମାଟି ରାସ୍ତା ନିର୍ମାଣ କାର୍ଯ୍ୟ ଚାଲୁ ରହିଛି। ମାତ୍ର ସିନ୍ଧିପଦରଠାରୁ ସମାପଲା ପର୍ଯ୍ୟନ୍ତ ଯଦି ଏକ ସ୍ଥାୟୀ ପକ୍କା ରାସ୍ତା ନିର୍ମାଣ କରାଯାଏ, ତେବେ ଗର୍ଭବତୀ ମହିଳା ଓ ଜରୁରୀକାଳୀନ ରୋଗୀମାନେ ସହଜରେ ମେଡିକାଲରେ ପହଞ୍ଚିପାରିବେ। ଏଣୁ ପ୍ରଶାସନ ସମାପଲା ରାସ୍ତା ନିର୍ମାଣ କୁ ପ୍ରାଥମିକତା ଦେବାକୁ ସ୍ବାସ୍ଥ୍ୟକର୍ମୀ ଓ ଗ୍ରାମବାସୀମାନେ ଦାବି କରିଛନ୍ତି। ଏହି ସ୍ବାସ୍ଥ୍ୟ ଶିବିର ଅବସରରେ ଉପସ୍ଥିତ ଥିବା ଦୁଇ ଗଣମାଧ୍ୟମ ପ୍ରତିନିଧି ଗ୍ରାମର କୁନି ଶିଶୁମାନଙ୍କୁ ବିସ୍କୁଟ, ଖାତା ଏବଂ କଲମ ବଣ୍ଟନ କରି ଉତ୍ସାହିତ କରିଥିଲେ। ସମଗ୍ର କାର୍ଯ୍ୟକ୍ରମ ସୁରୁଖୁରୁରେ ସମ୍ପନ୍ନ ହୋଇଯାଇଛି।