ଖଇରା,୧୨।୨(ଡି.ଏନ.ଏ.): ଦିନକୁ ଦିନ ସ୍ବାମୀଙ୍କ ସ୍ବାସ୍ଥ୍ୟରେ ଅବନତି ଘଟୁଛି। ଏପଟେ ୨ନାବାଳକ ସନ୍ତାନଙ୍କୁ ଲାଳନପାଳନ ଚିନ୍ତା। ସ୍ବାମୀଙ୍କ ଚିକିତ୍ସା ଚିନ୍ତାରେ ଖାଇବା ପିଇବା ଭୁଲିଗଲେଣି ବାଲେଶ୍ୱର ଜିଲା ଖଇରା ବ୍ଲକ ଗଣ୍ଡିବେଡ ଗ୍ରାମର ପ୍ରମିତା ଦାସ। ସ୍ବାମୀଙ୍କ ଅସ୍ତ୍ରୋପଚାର ଲାଗି ଅଧିକ ଅର୍ଥ ଆବଶ୍ୟକ ହେଉଥିବାରୁ ସେ ବୁଲି ବୁଲି ସହାୟତା ଲାଗି ଲୋକଙ୍କୁ ଆକୁଳ ନିବେଦନ କରିଛନ୍ତି। ଅନ୍ୟପକ୍ଷରେ ବିଜୁ ସ୍ବାସ୍ଥ୍ୟ କାର୍ଡକୁ ପୂର୍ଣ୍ଣମାତ୍ରାରେ ବ୍ୟବହାର କରିବାକୁ ନର୍ସିଂହୋମ ମାଲିକ ମନା କରୁଥିବାରୁ ଏହାକୁ ନେଇ ପ୍ରମିତା ଚିନ୍ତାରେ ପଡିଛନ୍ତି।
କହିବା ଅନୁଯାୟୀ, ସ୍ବାମୀ କିଶୋର କୁମାର ଦାସ(୪୩)ଙ୍କ ଜିଭରେ ୧୦ମାସ ତଳେ ଏକ ଘା ହୋଇଥିଲା। ଡାକ୍ତରଙ୍କୁ ପଚାରି ଔଷଧ ଖାଇବା ପରେ ତାହା ପ୍ରଥମେ କମିଯାଇ ପରେ ବାହାରିଥିଲା। ବାରମ୍ବାର ଏମିତି ହେବା ପରେ ସେ କଟକରେ ଡାକ୍ତରଙ୍କୁ ଦେଖାଇବା ପରେ କର୍କଟ ହୋଇଥିବା ସେ କହିଥିଲେ। କେମୋ ନେବା ଓ ଲାଇଟ୍ ପଡିବା ପରେ ଏହା କମିବା ପରିବର୍ତ୍ତେ ଏବେ ଗଳା ଓ ନାକ ପର୍ଯ୍ୟନ୍ତ କାୟା ବିସ୍ତାର କଲାଣି। ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ୧ଲକ୍ଷ ୪୦ହଜାର ମିଳିବା ପରେ ଏବେ ଅଧିକ ଦେବାକୁ କଟକରେ ଚିକିତ୍ସା କରୁଥିବା ନର୍ସିଂହୋମ ମାଲିକ ମନା କରୁଥିବା ପ୍ରମିତା ଅଭିଯୋଗ କରିଛନ୍ତି। ପୁରୁଷ ଲୋକଙ୍କ ପାଇଁ ୫ଲକ୍ଷ ବ୍ୟବସ୍ଥା ଥିବା ବେଳେ ନର୍ସିଂହୋମ ମାଲିକଙ୍କ ଏଭଳି ଆଚରଣକୁ ନେଇ ସେ ନିରାଶ ହୋଇପଡିଛନ୍ତି। ଅସ୍ତ୍ରୋପଚାର ପାଇଁ ୫ଲକ୍ଷ ଟଙ୍କା ଦରକାର ଥିବାରୁ ସହାୟତା ପାଇଁ ବିଭିନ୍ନ ସଙ୍ଗଠନ ଓ ନେତା ପ୍ରଶାସନ ନିକଟରେ ନିବେଦନ କରିଛନ୍ତି।
