ଢେଙ୍କାନାଳ ଅଫିସ, ୪।୭ – ଢେଙ୍କାନାଳ ଜିଲାରେ କରୋନା ଆକ୍ରାନ୍ତ କ୍ରମାଗତ ସୁସ୍ଥ ହେବା ପ୍ରଶାସନ ପାଇଁ ଆଶ୍ୱସ୍ତି ଆଣିଛି। ଏପ୍ରିଲ୍ ୯ରେ ଢେଙ୍କାନାଳ ସହରରୁ ପ୍ରଥମ ଆକ୍ରାନ୍ତ ଚିହ୍ନଟ ହୋଇଥିଲେ। ଏହାପରେ ମୋଟ୍ ପଜିଟିଭ୍ ସଂଖ୍ୟା ୮୨ରେ ପହଞ୍ଚତ୍ଛି। ତେବେ ଇତିମଧ୍ୟରେ ୬୫ ଜଣ ସୁସ୍ଥ ହୋଇ ଫେରିଲେଣି। ଅନ୍ୟ ୧୭ ମାମଲା ସକ୍ରିୟ ରହିଛି। ଜୁଲାଇରେ ସଂକ୍ରମଣ ବଢ଼ିବା ଆଶଙ୍କା ରହିଛି। ନିଜେ ସତର୍କ ରହିବା ସହ ଅନ୍ୟମାନଙ୍କୁ ଏ ଦିଗରେ ସଚେତନ କରାଇଲେ ବିପତ୍ତି ଟଳିବ ଏବଂ କରୋନା ଉପରେ ଅଙ୍କୁଶ ଲାଗିବ ବୋଲି ଜିଲାପାଳ ଭୂମେଶ ଚନ୍ଦ୍ର ବେହେରା ଜିଲାବାସୀଙ୍କୁ ନିବେଦନ କରିଛନ୍ତି।
ଜିଲାରେ ଶୁକ୍ରବାର ୯ଜଣ ଆକ୍ରାନ୍ତ କରୋନା ମୁକ୍ତ ହୋଇ ଘରକୁ ଫେରିଛନ୍ତି। ସେମାନଙ୍କ ମଧ୍ୟରୁ ୭ଜଣ ହେଉଛନ୍ତି ପରଜଙ୍ଗ ବ୍ଲକର। ସମସ୍ତେ ତାଳଚେର କୋଭିଡ୍ ହସ୍ପିଟାଲରେ ଚିକିତ୍ସାଧୀନ ଥିଲେ। ସେହିପରି ଓଡ଼ାପଡ଼ା ବ୍ଲକର ୨ଜଣ ଢେଙ୍କାନାଳ କୋଭିଡ୍ ହେଲଥ୍ ସେଣ୍ଟରରେ ଚିକିତ୍ସିତ ହେଉଥିଲେ। ଅପରପକ୍ଷେ ଜିଲାରେ ୩ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରେ ଢେଙ୍କାନାଳ ପୌରସଂସ୍ଥା ସଙ୍ଗରୋଧ କେନ୍ଦ୍ରରୁ ଜଣେ, ଭୁବନ ବ୍ଲକ ଅନଳ ସଙ୍ଗରୋଧ କେନ୍ଦ୍ରରୁ ଜଣେ, ସଦର ବ୍ଲକ ନାଠୁଆ ସଙ୍ଗରୋଧ କେନ୍ଦ୍ରରୁ ଜଣେ ଅଛନ୍ତି। ସମ୍ପୃକ୍ତ ୩ଜଣ ଯଥାକ୍ରମେ ଆନ୍ଧ୍ରପ୍ରଦେଶ, ଉତ୍ତରପ୍ରଦେଶ ଏବଂ କର୍ନାଟକରୁ ଫେରି ସଙ୍ଗରୋଧ କେନ୍ଦ୍ରରେ ଥିଲେ। ଗତ ଜୁନ୍ ୩୦ରେ ସମସ୍ତଙ୍କ ସ୍ବାବ୍ ସଂଗ୍ରହ କରି ପରୀକ୍ଷା ଲାଗି ପଠାଯାଇଥିଲା। ଗୁରୁବାର ସନ୍ଧ୍ୟାରେ ସମ୍ପୃକ୍ତ ୩ଜଣଙ୍କ ରିପୋର୍ଟ ପଜିଟିଭ୍ ଆସିଛି। ଆକ୍ରାନ୍ତଙ୍କୁ ଢେଙ୍କାନାଳ କୋଭିଡ୍ ହେଲଥ ସେଣ୍ଟରକୁ ପଠାଇ ଦିଆଯାଇଛି। ସେମାନେ ରହୁଥିବା ସଙ୍ଗରୋଧ କେନ୍ଦ୍ରଗୁଡିକୁ ବିଶୋଧନ କରାଯାଇଛି।
