ରାୟଗଡ଼ା,୧୪।୮(ଆଶିଷରଞ୍ଜନ ପଣ୍ଡା)- ମୋବାଇଲ ତଳେ ପଡିଯିବାରୁ ଚଳନ୍ତା ଟ୍ରେନରୁ ଓହ୍ଲାଇ ମୋବାଇଲ କାଡିବାକୁ ଚେଷ୍ଟା କରୁଥିବା ଜଣେ ଯୁବକଙ୍କୁ ମରଣ ମୁହଁରୁ ବଞ୍ଚାଇଛନ୍ତି ଆର୍ପିଏଫ୍ ହେଡ୍ କନଷ୍ଟେବଳ ଏମ୍.ଭି.ଜେ.ରାଓ । ଏହିଭଳି ଏକ ଘଟଣା ଘଟିଛି ରାୟଗଡ଼ା ରେଳ ଷ୍ଟେସନ ପ୍ଲାଟ ଫର୍ମ ନଂ-୫ରେ। ତେବେ ଯୁବକ ଜଣକ ଆହତ ହୋଇଥିବା ବେଳେ ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ଆହତ ଯୁବକ ଜଣକ ହେଲେ ତାମିଲନାଡୁ ରାଜ୍ୟର ପୃଥ୍ବୀରାଜ(୪୨) ।
ହେଲେ ଡ୍ୟୁଟିରେ ଥିବା କନେଷ୍ଟବଳ ରାଓଙ୍କ ଉପସ୍ଥିତ ବୁଦ୍ଧି ଯୋଗୁ ସେ ଅଳ୍ପକେ ମୃତ୍ୟୁମୁଖରୁ ବର୍ତ୍ତି ଯାଇଛନ୍ତି। ଘଟଣାରୁ ପ୍ରକାଶ ଯେ, ବିଶାଖାପାଟଣା-ହଜରତନିଜାମୁଦ୍ଦିନ(୧୨୮୦୭) ଟ୍ରେନର ବି-୨(୪୬) ନଂ ସିଟର ପାସେଞ୍ଜର ପୃଥ୍ବୀରାଜ ରାୟଗଡ଼ ଷ୍ଟେଶନରେ ପ୍ଲାଟଫର୍ମ ନଂ୫ରୁ ଟ୍ରେନରେ ଚିଢିଥିଲେ । ଏହି ସମୟରେ ତାଙ୍କ ମୋବାଇଲ ପ୍ଲାଟଫର୍ମରେ ପଡି ଯାଇଥିଲା। ତେବେ ପୃଥ୍ବୀରାଜ ମୋବାଇଲ କାଡିବା ପାଇଁ ଚଳନ୍ତା ଟ୍ରେନରୁ ଓହ୍ଲାଇ ମୋବାଇଲ କାଡିବାକୁ ଚେଷ୍ଟା କରିବା ବେଳେ ରେଳ ଟ୍ରାକ ଭିତରକୁ ଟାଣି ହୋଇଯାଇଥିଲେ।
ସେତିକିବେଳେ ଡ୍ୟୁଟିରେ ଥିବା ଆର୍ପିଏଫ ହେଡ୍ କନେଷ୍ଟବଳ ରାଓ ଏହା ଦେଖି ପୃଥ୍ବୀରାଜଙ୍କୁ ତୁରନ୍ତ ନିଜ ଆଡ଼କୁ ଟାଣି ଆଣିଥିଲେ । ଫଳରେ ପୃଥ୍ବୀରାଜ ଆହତ ହୋଇଥିଲେ ହେଁ ଅଳ୍ପକେ ତାଙ୍କ ଜୀବନ ବଞ୍ଚିଯାଇଥିଲା । ରାଓଙ୍କ ଏହିଭଳି ସାହସିକତା ଓ ଉପସ୍ଥିତି ବୁଦ୍ଧି ଯୋଗୁ ବିଭାଗୀୟ ଅଧିକାରୀଙ୍କ ସହ କର୍ମଚାରୀ ଏବଂ ଜନସାଧାରଣ ସାଧୁବାଦ ଜଣାଇଛନ୍ତି।
