ଅମରାବତୀ,୫।୧୦: ଆନ୍ଧ୍ରପ୍ରଦେଶରେ ଜଣେ ୫୫ ବର୍ଷୀୟ ପୋଲିସ ହେଡ କନଷ୍ଟେବଳ ନିଜ ପତ୍ନୀ ଏବଂ ଦୁଇ ଝିଅଙ୍କୁ ଗୁଳି କରି ହତ୍ୟା କରିବା ପରେ ନିଜେ ଆତ୍ମହତ୍ୟା କରିଥିବା ଘଟଣା ସାମ୍ନାକୁ ଆସିଛି। ପୋଲିସ ଏହି ଘଟଣାର ତଦନ୍ତ କରି ହତ୍ୟାକାଣ୍ଡ ସମ୍ପର୍କରେ ଜାଣିବାକୁ ଚେଷ୍ଟା କରୁଛି। ଗୁରୁବାର ସକାଳେ ଏହି ଘଟଣା ଘଟିଛି। ପୋଲିସ ଘଟଣାସ୍ଥଳରୁ ଏକ ଆତ୍ମହତ୍ୟା ନୋଟ ମଧ୍ୟ ଜବତ କରିଛି।
ସୂଚନାଯୋଗ୍ୟ, ଏହି ଘଟଣା କଡପ୍ପାରେ ଘଟିଛି। ଭେଙ୍କଟେଶ୍ୱରାଲୁ କଡପ୍ପା ପୋଲିସ ଷ୍ଟେଶନରେ କାର୍ଯ୍ୟ କରନ୍ତି। ପୋଲିସ କହିଛି ଯେ, ଭେଙ୍କଟେଶ୍ୱରାଲୁ ବୁଧବାର ରାତି ପ୍ରାୟ ୧୧ଟା ପର୍ଯ୍ୟନ୍ତ କାମ କରିଥିଲେ ଏବଂ ପରେ ପିସ୍ତଲ ଏବଂ କିଛି ଗୁଳି ନେଇ ତାଙ୍କ ଘରକୁ ଯାଇଥିଲେ। ଭେଙ୍କଟେଶ୍ୱରାଲୁଙ୍କ ବଡ ଝିଅ ପ୍ରଥମ ବର୍ଷ ସ୍ନାତକ ପଢୁଥିବା ବେଳେ ସାନ ଝିଇ ଦଶମ ଶ୍ରେଣୀରେ ପଢୁଥିଲେ। କୁହାଯାଉଛି ଯେ, ମୃତକ ହେଡ କନଷ୍ଟେବଳ ଷ୍ଟକ ମାର୍କେଟରେ ବହୁ ଟଙ୍କା ହରାଇଥିଲେ ଏବଂ ପରିବାରର କିଛି ସମସ୍ୟା ଯୋଗୁ ମଧ୍ୟ ସେ ଚିନ୍ତାରେ ଥିଲେ। ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
