ଭୁବନେଶ୍ୱର, ୨୪।୨(ସୁନିତ୍ ମିଶ୍ର):ବିଧାନସଭା ବଜେଟ ଅଧିବେଶର ଷଷ୍ଠ ଦିନ ଗୃହ କାର୍ଯ୍ୟ ବନ୍ଦ ହେବା ପରେ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ବାହାରକୁ ବାହାରି ସରକାରଙ୍କ ଉପରେ ବର୍ଷିଛନ୍ତି। ସେ ଅଭିଯୋଗ କରି କହିଛନ୍ତି, ସରକାରୀ ଦଳ ଜାଣିଶୁଣି ଗୃହ ଚଳାଇ ନ ଦେବାକୁ ଷଡ଼ଯନ୍ତ୍ର କରିଛି। ପ୍ରାଥମାର୍ଦ୍ଧରେ ଗୃହ କାର୍ଯ୍ୟ ଆରମ୍ଭ ହେବା ପରେ ଏପ୍ଷ୍ଟିନ ଫାଇଲ ଭଳି କଳଙ୍କିତ ଅଧ୍ୟାୟ ସହିତ ଦେଶର କେତେଜଣ ଗୁରୁତ୍ୱପୂର୍ଣ୍ଣ ଲୋକ ଜଡ଼ିତ ଅଛନ୍ତି। ଦେଶର ଯିଏ ପେଟ୍ରୋଲିୟମ ମନ୍ତ୍ରୀ ଅଛନ୍ତି ହରଦୀପ୍ ସିଂ ପୁରୀ ଏପଷ୍ଟିନଙ୍କ ସହିତ ଏକାଧିକ ଥର ଭେଟିବାର ଅଭିଯୋଗ ହୋଇଥିଲା। ପରବର୍ତ୍ତୀ ସମୟରେ ପୁରୀ ମଧ୍ୟ ଏହି କଥାକୁ ସ୍ବୀକାର କଲେ। ଅନ୍ୟ ଦେଶରେ ଯେଁଉମାନେ ସେମାନଙ୍କ ସରକାରର ପ୍ରମୁଖ ବ୍ୟକ୍ତି ଅଛନ୍ତି ଏବଂ ଏପ୍ଷ୍ଟିନ ଫାଇଲ ସେମାନଙ୍କ ସହ ଯୋଡି ହେବା କାରଣରୁ ସେମାନେ ନିଜ ପଦରୁ ଇସ୍ତଫା ଦେଇସାରିଲେଣି। ସେହି ଲୋକମାନଙ୍କ ମଧ୍ୟରେ କେତେଜଣ ପ୍ରମୁଖ ଚେହେରା ଏବେ ଗିରଫ ମଧ୍ୟ ହେଲେଣି ବୋଲି ଶୁଣିବାକୁ ମିଳୁଛି। ହେଲେ କେନ୍ଦ୍ରମନ୍ତ୍ରୀ ପୁରୀ ଏ ପର୍ଯ୍ୟନ୍ତ କାହିଁକି ମନ୍ତ୍ରୀ ପଦରୁ ଇସ୍ତଫା ଦେଇନାହାନ୍ତି। ତାଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ହେଉନାହିଁ। ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନାଁ ମଧ୍ୟ ଏପ୍ଷ୍ଟିନ ଫାଇଲରେ ଥିବା ଶୁଣାଯାଉଛି। ସିଏ ମଧ୍ୟ ତାଙ୍କ ପଦରୁ ଇସ୍ତଫା ଦେବା ଦରକାର। ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ପ୍ରତି ଦେଶର ସଂସଦୀୟ ବ୍ୟାପାର ମନ୍ତ୍ରୀ ଅପଶବ୍ଦ ବ୍ୟବହାର କରୁଛନ୍ତି। ସଂସଦୀୟ ବ୍ୟାପାର ମନ୍ତ୍ରୀଙ୍କ ଇସ୍ତଫା ଦାବି ମଧ୍ୟ ଗୃହରେ କହିଥିଲେ। ହେଲେ ଦ୍ୱିତୀୟାର୍ଦ୍ଧରେ ଅପରାହ୍ନ ବେଳକୁ ଗୃହ କାର୍ଯ୍ୟ ଆରମ୍ଭ ହେବା ମାତ୍ରେ ବାଚସ୍ପତି ରେକର୍ଡରୁ ସେହି କଥା କାଟିଦେଲେ। ଗୃହରେ ଏଥିଲାଗି ବିରୋଧ କରିବା ସତ୍ତ୍ୱେ ବାଚସ୍ପତି ସେହି ଭାଷଣକୁ ଗଣମାଧ୍ୟମରେ ପ୍ରକାଶ ନ କରିବା ସହିତ ରେକର୍ଡରୁ କାଟିଲେ ବୋଲି କାଡାମ କହିଛନ୍ତି।
Dharitri – Odisha’s No.1 Odia Daily
