ପୁରୀ ଅଫିସ, ୨୦ା୭: ମହାପ୍ରଭୁ ଶ୍ରୀଜଗନ୍ନାଥ ହେଉଛନ୍ତି ବିଶ୍ୱ ଦେବତା। ସେ ଭାବର ଠାକୁର। ତାଙ୍କୁ ଯିଏ ଯେମିତି ଡାକିଛି ସେ ତା’ ଡାକ ସେମିତି ଶୁଣିଛନ୍ତି। ତାଙ୍କର ସାନ୍ନିଧ୍ୟ ଟିକିଏ ପାଇବା ପାଇଁ କାହିଁ କେତେ ଦୂରରୁ ପୂଣ୍ୟଭୂମି ଶ୍ରୀକ୍ଷେତ୍ରକୁ ଭକ୍ତ ଛୁଟି ଆସନ୍ତି। ହେଲେ କୋଟି କୋଟି ହିନ୍ଦୁଙ୍କ ଏହି ଆରାଧ୍ୟ ଦେବତାଙ୍କୁ ଲେଖକ ତଥା ଆଇଆଇପିଏମ୍ ଡାଇରେକ୍ଟର ଅରିନ୍ଦମ ଚୌଧୁରୀ କଟାକ୍ଷ କରିଛନ୍ତି। ଏହାଦ୍ୱାରା ସେ ଅସଂଖ୍ୟ ଜଗନ୍ନାଥପ୍ରେମୀ ଓ ହିନ୍ଦୁ ଧର୍ମାବଲମ୍ବୀଙ୍କ ଧର୍ମୀୟ ଭାବନାକୁ ଆଘାତ ଦେଇଛନ୍ତି। ଏ ନେଇ ପୁରୀରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି। ଭକ୍ତ ଓ ସେବାୟତମାନେ ଅରିନ୍ଦମଙ୍କୁ ଦୃଢ ନିନ୍ଦା କରିଛନ୍ତି।
ଅରିନ୍ଦମ ନିଜ ଅଫିସିଆଲ ଫେସ୍ବୁକରେ ଏକ ବିବାଦୀୟ ପୋଷ୍ଟ କରିଛନ୍ତି। ଯେଉଁଥିରେ ସେ ଉଲ୍ଲେଖ କରିଛନ୍ତି କୌଣସି ଭଗବାନଙ୍କୁ ପ୍ରାର୍ଥନା କଲେ କରୋନାରୁ ମୁକ୍ତି ମିଳିବ ନାହିଁ। ପ୍ରାର୍ଥନା କେବେ କାମ କରେ ନାହିଁ, ଯଦି ଖୁସିରେ ରହିବାକୁ ଚାହୁଁଛ ତେବେ ତାଙ୍କ ବହି ପଢିବାକୁ ସେ ପରାମର୍ଶ ଦେଇଛନ୍ତି। ଏଥିସହ ଶ୍ରୀଜଗନ୍ନାଥଙ୍କ ସ୍ବାସ୍ଥ୍ୟ ପରୀକ୍ଷା ଜଣେ ଡାକ୍ତର କରୁଥିବା ଫଟୋ ପୋଷ୍ଟ କରି ଅରିନ୍ଦମ କଟାକ୍ଷ କରିଛନ୍ତି। କେବଳ ସେତିକି ନୁହେଁ, ତିରୁପତି ବାଲାଜୀଙ୍କୁ ଉପହାସ କରି ଏହି ମନ୍ଦିରର ୫୦ ସେବାୟତଙ୍କ ମଧ୍ୟରୁ ୧୫ କରୋନାରେ ଆକ୍ରାନ୍ତ ହୋଇଥିବା ଲେଖିଛନ୍ତି। ଏ ନେଇ ବରିଷ୍ଠ ସେବାୟତ ବିନାୟକ ଦାସମହାପାତ୍ର କହିଛନ୍ତି, ମହାପ୍ରଭୁଙ୍କୁ ନେଇ ଅରିନ୍ଦମ ଯେଉଁ ଫଟୋ ପୋଷ୍ଟ କରିଛନ୍ତି ତାହା ଅତ୍ୟନ୍ତ ନିନ୍ଦନୀୟ। ଶ୍ରୀଜଗନ୍ନାଥ ହେଉଛନ୍ତି ବିଶ୍ୱର ଠାକୁର। ତାଙ୍କ ମହିମା ଜଗତବାସୀ ଜାଣନ୍ତି। ମାତ୍ର ମହାପ୍ରଭୁଙ୍କ ସ୍ବାସ୍ଥ୍ୟ ପରୀକ୍ଷା ଜଣେ ଡାକ୍ତର କରୁଥିବାର ଫଟୋ ପୋଷ୍ଟ କରି ସେ ହିନ୍ଦୁ ଧର୍ମ ଓ ଜଗନ୍ନାଥ ସଂସ୍କୃତିକୁ କୁଠାରଘାତ କରିଛନ୍ତି। ଯେଉଁ କରୋନାର ଭ୍ୟାକ୍ସିନ ବାହାର କରିବା ଲାଗି ବିଶ୍ୱର ବୈଜ୍ଞାନିକମାନେ ଲାଗିପଡ଼ିିଛନ୍ତି ସେଥିରେ ମହାପ୍ରଭୁଙ୍କ ଆଶୀର୍ବାଦ ରହିଛି। କାରଣ ଆଶୀର୍ବାଦ ନ ରହିଲେ ବିଜ୍ଞାନ କେବେ ଆଗେଇ ପାରିବ ନାହିଁ। ତେଣୁ ଅରିନ୍ଦମ ଏଭଳି ମାନସିକତାରୁ ଦୂରେଇ ରହି ମହାପ୍ରଭୁଙ୍କୁ କ୍ଷମା ମାଗନ୍ତୁ ବୋଲି ବିନାୟକ ଦାବି କରିଛନ୍ତି। ଭକ୍ତ ସରୋଜ କୁମାର ବେହେରା ମଧ୍ୟ ଏଭଳି ଫଟୋ ପୋଷ୍ଟକୁ ଦୃଢ ନିନ୍ଦା କରିଛନ୍ତି। ଏପରି କଟାକ୍ଷ କରିବା ପୂର୍ବରୁ ସେ ଶ୍ରୀଜଗନ୍ନାଥ ସଂସ୍କୃତି, ପରମ୍ପରା ଏବଂ ମହାପ୍ରଭୁଙ୍କ ସମ୍ପର୍କରେ ଜ୍ଞାନ ଆହରଣ କରିବା ଉଚିତ ଥିଲା। ଜଣେ ଭଲ ଲେଖକ କେବେ କୌଣସି ଧର୍ମକୁ ଆଘାତ ଦେଇ ନ ଥାଏ। ତେଣୁ ଅରିନ୍ଦମ ମହାପ୍ରଭୁଙ୍କ ନିକଟରେ କ୍ଷମା ପ୍ରାର୍ଥନା କରନ୍ତୁ ବୋଲି ବେହେରା କହିଛନ୍ତି।
