ସୁନ୍ଦରଗଡ଼,୧୫ା୧୦(ଡି.ଏନ୍.ଏ.): ସୁନ୍ଦରଗଡ଼ ଅତିରିକ୍ତ ଜିଲା ଦୌରାଜଜ୍ ତଥା ସ୍ବତନ୍ତ୍ର ପୋକ୍ସୋ ଅଦାଲତର ପ୍ରିଜାଇଡିଂ ଅଫିସର ମହେନ୍ଦ୍ର କୁମାର ସୂତ୍ରଧର ଗତ ୨୦୧୬ରେ ଘଟିଥିବା ଏକ ନାବାଳିକା ବଳାତ୍କାର ମାମଲାର ଶନିବାର ଶୁଣାଣି କରି ବଣାଇ ବାଉଁରକେଲା ଗ୍ରାମର ଅଭିଯୁକ୍ତ ଅଲେଖ ପାତ୍ର(୩୬)ଙ୍କୁ ୮ ବର୍ଷ ସଶ୍ରମ ଜେଲ୍ଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୧୦ହଜାର ଟଙ୍କା ଜରିମାନା ଆଦେଶ ସହ ଜରିମାନା ଅନାଦେୟ ଅଧିକ ୩ ବର୍ଷ ଜେଲଦଣ୍ଡ ପାଇଁ ଅଦାଲତ ତାଙ୍କ ରାୟରେ ଆଦେଶ ଦେଇଛନ୍ତି।
ମାମଲାର ରାୟର ବିବରଣୀରୁ ପ୍ରକାଶ ଯେ, ପୀଡ଼ିତା ନାବାଳିକାଙ୍କ ବାପା ଜଣେ ଗୁପଚୁପ୍ ବିକାଳି। ଘଟଣା ଦିନ ଅର୍ଥାତ ଗତ ୨୦୧୬ ଜୁଲାଇ୧୪ ତାରିଖ ସନ୍ଧ୍ୟାରେ ବର୍ଷା ହେଉଥିବାରୁ ଗୁପ୍ଚୁପ୍ ବିକ୍ରି କରୁଥିବା
ବାପା ୮ବର୍ଷର ଝିଅକୁ ଛତାରେ ଘରେ ଛାଡ଼ି ଦେବାକୁ ଅଭିଯୁକ୍ତ ଅଲେଖଙ୍କୁ କହିଥିଲେ। ହେଲେ ଅଭିଯୁକ୍ତ ଅଲେଖ ନାବାଳିକାଙ୍କୁ ଘରକୁ ନେବା ବଦଳରେ ଗ୍ରାମ ସ୍କୁଲ ଘରକୁ ନେଇ ବଳାତ୍କାର କରିଥିଲେ। ଏହାପରେ ପରିବାର ଲୋକେ ଝିଅକୁ ଖୋଜାଖୋଜି କରି ପରେ ସ୍କୁଲ ଘରୁ ଉଦ୍ଧାର କରିଥିଲେ। ଏ ସମ୍ପର୍କରେ ପୀଡ଼ିତାଙ୍କ ପରିବାର ପକ୍ଷରୁ ବଣାଇ ଥାନାରେ ରିପୋର୍ଟ କରି ଥିଲେ। ରିପୋର୍ଟ ପରେ ପୋଲିସ ଏକ ନାବାଳିକା ବଳାତ୍କାର ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ପୀଡ଼ିତାଙ୍କୁ ୫ଲକ୍ଷ ଟଙ୍କା ସରକାରୀ ସହାୟତା ରାଶି ଯୋଗାଇ ଦେବା ପାଇଁ ଜିଲା ଆଇନ ସେବା ପ୍ରାଧିକରଣଙ୍କୁ ଅଦାଲତ ତାଙ୍କ ରାୟରେ ଆଦେଶ ଦେଇଛନ୍ତି। ସରକାରଙ୍କ ପକ୍ଷରୁ ପୋକ୍ସୋ ଅଦାଲତର ସ୍ବତନ୍ତ୍ର ପବ୍ଲିକ ପ୍ରସିକ୍ୟୁଟର ଦେବାଶିଷ ମିଶ୍ର ଏହି ମାମଲାଟିର ପରିଚାଳନା କରୁଥିଲେ।
