ନୂଆଦିଲ୍ଲୀ, ୭ ।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ଷମତାରେ ରହିବା ୨୦ ବର୍ଷ ପୂରଣ ହୋଇଛି । ପ୍ରଥମେ ସେ ୭ ଅକ୍ଟୋବର ୨୦୦୧ରେ ଗୁଜରାଟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ । ଏହାପରେ ୨୦୧୪ ସାଧାରଣ ନିର୍ବାଚନରେ ବିଜୟି ହେବା ପର୍ଯ୍ୟନ୍ତ ଗୁଜରାଟର ମୁଖ୍ୟମନ୍ତ୍ରୀ ପଦ ସମ୍ଭାଳିଥିଲେ । ଏହାପରେ ସେ ହେଲେ ଦେଶର ପ୍ରଧାନମନ୍ତ୍ରୀ । ପ୍ରଧାନମନ୍ତ୍ରୀ ଭାବେ ବି ସେ ୭ ବର୍ଷ କାଟି ସାରିଲେଣି । ୨୦ ବର୍ଷର କ୍ଷମତା ମଧ୍ୟରେ କିଛି ବିବାଦ ଘେରକୁ ବି ଆସିଛନ୍ତି ଏହି ରାଜନେତା । ବିରୋଧୀ ତାଙ୍କୁ ଅନେକ ଥର ଟାର୍ଗେଟ କରିଥିଲେ ବି କିଛିଥର ଅସଫଳ ହୋଇଛନ୍ତି ।
କୁହାଯାଏ ୧୯୯୮ରେ ଗୁଜରାଟ ବିଧାନସଭା ନିର୍ବାଚନ ପୂର୍ବରୁ ମୋଦି ଶଙ୍କର ସିଂ ବାଘେଲାଙ୍କ ସ୍ଥାନରେ କେଶୁଭାଇ ପଟେଲଙ୍କୁ ଗୁଜରାଟର ମୁଖ୍ୟମନ୍ତ୍ରୀ କରି ଭାରତୀୟ ଜନତା ପାର୍ଟିକୁ ଭାଙ୍ଗି ଯାଇଥିବାରୁ ରକ୍ଷା କରିଥିଲେ । ସେଥିପାଇଁ ରାଜ୍ୟରେ ଭାଜପା ବିଜୟର ସମସ୍ତ ଶ୍ରେୟ ମୋଦିଙ୍କୁ ଦିଆଯାଏ । ୨୦୦୨ରେ ହୋଇଥିବା ଗୁଜରାଟ ଦଙ୍ଗାକୁ ନେଇ ବିବାଦ ଘେରକୁ ଚାଲି ଆସିଥିଲେ ମୋଦି । କେବଳ ସେତିକି ନୁହେଁ ଗୁଲବର୍ଗ ସୋସାଇଟି ମାମଲା, ସଞ୍ଜିବ ଭଟ୍ଟ ମାମଲା, ୨୦୧୨ରେ ହିମାଚଳ ପ୍ରଦେଶର ଏକ ନିର୍ବାଚନ ରାଲିରେ ଶଶି ଥରୁରଙ୍କୁ ଟାର୍ଗେଟ କରି ସୁନନ୍ଦା ପୁଷ୍କରଙ୍କୁ ୫୦ କୋଟିର ଗର୍ଲ ଫ୍ରେଣ୍ଡ ବୋଲି କହିଥିଲେ ମୋଦି । ଗୁଜରାଟ ମଡେଲ ଓ କୁପୋଷଣକୁ ନେଇ ବିବାଦ, ବିଶ୍ୱ ହିନ୍ଦୁ ସଙ୍ଗଠନର ବୟାକୁ ନେଇ ବିବାଦ, ନିର୍ବାଚନ ସମୟରେ ନିର୍ବାଚନ ଚିହ୍ନ ପଦ୍ମ ସହ ସେଲ୍ଫିକୁ ନେଇ ବିବାଦକୁ ଆସିଛନ୍ତି ମୋଦି । ୧୦ ଲକ୍ଷର ମୋଦି ଶୁଟ୍, କଳାଧନ ଓ ୧୫ ଲକ୍ଷ ଟଙ୍କା ସମସ୍ତ ଆକାଉଣ୍ଟକୁ ଆସିବା ବୟାନ ବି ଆସିଛି ଚର୍ଚ୍ଚାକୁ । ମୋଦି ଓ ତାଙ୍କ ମନ୍ତ୍ରୀଙ୍କ ଶିକ୍ଷାଗତ ଯାଗ୍ୟତାକୁ ନେଇ ପ୍ରଶ୍ନ, ଜମି ଅଧିଗ୍ରହଣ, ସିଏଏ-ଏନ୍ଆର୍ସି ଓ କୃଷି ଆଇନକୁ ନେଇ ବିବାଦ ଘେରକୁ ଆସିଛନ୍ତି ମୋଦି । କରୋନା ଲଢେଇରେ ଆଗୁଆ ଓ ରାଫେଲ ଡିଲକୁ ନେଇ ବି ପ୍ରଶ୍ନ ଘେରକୁ ଆସିଛନ୍ତି ମୋଦି ।
