ଖୋର୍ଦ୍ଧା ଅଫିସ,୨୯।୯: ଖୋର୍ଦ୍ଧା ୧୬ନଂ. ଜାତୀୟ ରାଜପଥ ନିଜଗଡ଼ ତାପଙ୍ଗରେ ରହିଛି ହାତିଆ ପାହାଡ଼। ଏଠାରେ ସୃଷ୍ଟି ହୋଇଥିବା କୃତ୍ରିମ ହ୍ରଦ, ନୀଳ ଜଳରାଶିର ମନୋରମ ପ୍ରାକୃତିକ ଦୃଶ୍ୟ ସୋସିଆଲ ମିଡିଆରେ ଭାଇରାଲ ପରେ ପର୍ଯ୍ୟଟକଙ୍କ ଭିଡ଼ ଜମୁଥିଲା। ଯୁବପିଢିଙ୍କ ଲାଗି ସେଲ୍ଫି ପଏଣ୍ଟ ପାଲଟିଥିଲା। ଏନେଇ ସେପ୍ଟେମ୍ବର ୧୮ରେ ‘ଧରିତ୍ରୀ’ରେ ହାତିଆ ପାହାଡ଼ରେ ପର୍ଯ୍ୟଟକ ଅସୁରକ୍ଷିତ ଶୀର୍ଷକ ଖବର ପ୍ରକାଶ ପାଇଥିଲା। ଏହା ପରେ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ହାତିଆ ପାହଡ଼କୁ ନ ଆସିବା ଲାଗି ପ୍ରଶାସନ ପକ୍ଷରୁ କଟକଣା ଜାରି କରାଯାଇଥିବା ନେଇ ଏକ ଭିଡିଓ ଭାଇରାଲ ହୋଇଛି। ପ୍ରଶାସନର କଟକଣା ସମ୍ପର୍କରେ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ଖୋର୍ଦ୍ଧା ଉପଜିଲାପାଳ ଅଶୋକ ବେହୁରିଆ ଏହାକୁ ଖଣ୍ଡନ କରିଛନ୍ତି। ପ୍ରଶାସନ ପକ୍ଷରୁ ସେପରି କୌଣସି କଟକଣା ଜାରି କରାଯାଇନାହିଁ। ଏହି ଭିଡିଓର ତର୍ଜମା କରାଯିବ ବୋଲି ସେ କହିଛନ୍ତି। ଅନ୍ୟପଟେ ହାତିଆ ପାହାଡ଼ରେ ସଦର ଥାନା ପକ୍ଷରୁ ପୋଲିସ ପଇଁତରା ମାରୁଥିବା ଦେଖିବାକୁ ମିଳିଛି। ପାହାଡ ଉପରକୁ ନ ଯିବା ଲାଗି ପର୍ଯ୍ୟଟକଙ୍କୁ ବାରଣ କରିବା ସହ ଏହାର ପ୍ରବେଶ ପଥରୁ ପର୍ଯ୍ୟଟକଙ୍କୁ ଫେରାଇ ଦେଉଥିବା ଜଣାପଡିଛି। ସୋମବାର ଦୁଇ ପ୍ରବେଶ ପଥରେ ପୋଲିସର ବାରଣ ଯୋଗୁ ପର୍ଯ୍ୟଟକ ଫେରି ଯାଇଛନ୍ତି। ଓରବସିଂର ପ୍ରଦୀପ ସାହୁ କହିଛନ୍ତି, ହାତିଆ ପାହାଡର ପ୍ରାକୃତିକ ପରିବେଶ ସମ୍ପର୍କରେ ଜାଣିବା ପରେ ଏହାର ପରିବେଶକୁ ଉପଭୋଗ ଲାଗି ଏଠାକୁ ଆସିଥିଲୁ। ତେବେ ପୋଲିସ ଯିବାକୁ ବାରଣ କରିଥିଲା। ଏଠାରେ ପ୍ରଶାସନ ପକ୍ଷରୁ କଟକଣା ଜାରି କରାଯାଇଥିବା କହି ଫେରାଇ ଦେଇଥିଲେ ବୋଲି ସେ କହିଛନ୍ତି। ସୂଚନାଥାଉ କି, ଏହାକୁ ହାତିଆ ପାହାଡ଼ରେ ତେବେ ଖଣି ମାଫିଆଙ୍କ ପଥର ବ୍ଲାଷ୍ଟିଂ ଯୋଗୁ ଏଠାରେ ସୃଷ୍ଟି ହୋଇଥିବା କୃତ୍ରିମ ହ୍ରଦ ପର୍ଯ୍ୟଟକଙ୍କୁ ଆକର୍ଷଣ କରୁଥିଲା।
