କେନ୍ଦୁଝର, ୨୪।୮(ସ୍ବ.ପ୍ର.)-ହାତୀ ସୁରକ୍ଷା ଲାଗି ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇ ସଚେତନତା କାର୍ଯ୍ୟକ୍ରମ କରାଯାଉଛି। ହେଲେ କେନ୍ଦୁଝର ଜିଲା ଚମ୍ପୁଆ ବ୍ଲକ ଅଞ୍ଚଳର ଜଣେ ଅବସରପ୍ରାପ୍ତ ବରିଷ୍ଠ ଅଧ୍ୟାପକ ଏକ ହାତୀର ସ୍ମୃତିରେ ହାତୀମିନାର ପ୍ରତିଷ୍ଠା କରି ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ଉକ୍ତ ଅଧ୍ୟାପକ ହେଲେ ଡକ୍ଟର କୃଷ୍ଣଚନ୍ଦ୍ର ନାୟକ ଓ ଘର ଜାଲି ଗ୍ରାମରେ। ହାତୀମିନାର ଲାଗି ସେ ୫ ଏକର ଜମି ଦାନ କରି ବନୀକରଣ କରିଛନ୍ତିି। ଆଗାମୀ ଦିନରେ ଶିଶୁ ପାର୍କ ପ୍ରତିଷ୍ଠା କରିବା ପାଇଁ ସ୍ଥାନୀୟ ଲୋକଙ୍କ ସହଯୋଗରେ ଉଦ୍ୟମ ଜାରି ରଖିଛନ୍ତି। ବନ ବିଭାଗ ପକ୍ଷରୁ କିଛି ସହଯୋଗ ମିଳୁ ନ ଥିବାରୁ ସ୍ଥାନୀୟ ଲୋକ ଅସନ୍ତୋଷ ପ୍ରକାଶ କରିଛନ୍ତି। ଏହାକୁ ପର୍ଯ୍ୟଟନର ମାନ୍ୟତା ମିଳିଲେ ସଚେତନତା ବୃଦ୍ଧି ପାଇବା ସହ ଏହି ସ୍ଥାନ ପ୍ରତି ପର୍ଯ୍ୟଟକମାନେ ଆକୃଷ୍ଟ ହୋଇପାରିନ୍ତେ ବୋଲି ଡକ୍ଟର କୃଷ୍ଣ ଚନ୍ଦ୍ର ନାୟକ କହିଛନ୍ତି।
ଜଙ୍ଗଲରେ ଖାଦ୍ୟାଭାବ ଯୋଗୁ ହାତୀପଲ ଗ୍ରାମମୁହାଁ ହେଉଛନ୍ତି। କେତେବେଳେ ବିଦ୍ୟୁତ ଆଘାତରେ ତ କେତେବେଳେ ରେଳ ଓ ରାସ୍ତା ଦୁର୍ଘଟଣାରେ ମୃତ୍ୟୁର ଶିକାର ହୋଇ ଜୀବନ ହରାଉଛନ୍ତି। ୧୦ବର୍ଷ ତଳେ ଏଭଳି ଏକ ଦୁର୍ଘଟଣା ଘଟିଥିଲା। ୨୦୦୯ ସେପ୍ଟେମ୍ବର ୭ ତାରିଖରେ ଧାନ ଖାଇବାକୁ ଆସିଥିବା ଏକ ହାତୀ ବିଦ୍ୟୁତ୍ ସଂସ୍ପର୍ଶରେ ଆସି ଡକ୍ଟର ନାୟକଙ୍କ ଜମିରେ ଟଳିପଡିଥିଲା। ବନ ବିଭାଗ ହାତୀର ମୁହଁ କାଟି ଦାନ୍ତ ନେଇଯାଇଥିଲେ ଏବଂ ସେଠାରେ ପୋତି ଦେଇଥିଲେ। ସେହି ସମୟରେ କୃଷ୍ଣଚନ୍ଦ୍ରଙ୍କ ମା’ ଅତ୍ୟନ୍ତ ବିବ୍ରତ ହେବା ସହ ଦୁଃଖରେ ଭାଙ୍ଗିପଡିଥିଲେ। ହାତୀ ମୃତ୍ୟୁ ସ୍ମୃତିରେ କିଛି କରିବାକୁ କହିଥିଲେ। ତେବେ ମା’ଙ୍କ ଶେଷ ଇଚ୍ଛା ପୂରଣ କରିବାକୁ ଯାଇ କୃଷ୍ଣଚନ୍ଦ୍ର ୨୦୧୯ରେ ନିଜ ଗ୍ରାମରେ ପ୍ରାୟ ୩୫ ଫୁଟ ଉଚ୍ଚତାର ହାତୀମୀନାର ନିଜ ଉଦ୍ୟମରେ ନିର୍ମାଣ କରିଥିଲେ। ଏହା ଭୂମିରେ ୫ ଫୁଟ ଲମ୍ବା ଓ ୫ ଫୁଟ ଓସାର କଙ୍କ୍ରିଟ ଚଟାଣ ଉପରେ ନିର୍ମିତ। ଏହାକୁ ସେହିବର୍ଷ ମକର ସଂକ୍ରାନ୍ତିରେ ଉଦ୍ଘାଟନ କରାଯାଇଥିଲା। ଏହାକୁ ସେ ସମୟରେ ପ୍ରଥମେ ଧରିତ୍ରୀ ଲୋକଲୋଚନକୁ ଆଣିଥଲା। କେନ୍ଦୁଝର ସହରଠାରୁ ପ୍ରାୟ ୪୫ କି.ମି. ଦୂରରେ ରହିଛି ଏହି ସ୍ଥାନ। ଏହାକୁ ଦେଖିବାକୁ ଆଖପାଖ ଲୋକ ଆସୁଛନ୍ତି। ଅଧିକ ପ୍ରଚାର ପ୍ରସାର ହେଲେ ଏବଂ ଏହାକୁ ଉନ୍ନତୀକରଣ କରାଗଲେ ପର୍ଯ୍ୟଟକମାନେ ଅଧିକ ଆକୃଷ୍ଟ ହୋଇପାରନ୍ତେ ଏବଂ ଉକ୍ତ ଅଞ୍ଚଳର ବିକାଶ ହୋଇପାରନ୍ତା ବୋଲି ସ୍ଥାନୀୟ ଲୋକେ କହିଛନ୍ତି।
କେନ୍ଦୁଝର ବନଖଣ୍ଡରେ ଏବେ ୧୦୦ରୁ ଊର୍ଦ୍ଧ୍ୱ ହାତୀ ବିଚରଣ କରୁଛନ୍ତି। ଚଳିତବର୍ଷ ୪ହାତୀର ଅସ୍ବାଭାବିକ ମୃତ୍ୟୁ ହାତୀମାନଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ବ୍ୟାପକ ଜଙ୍ଗଲ ନଷ୍ଟ ଯୋଗୁ ହାତୀମାନେ ବାସହରା ହେବା ସହ ସେମାନଙ୍କ ଚଳପ୍ରଚଳ ଅଞ୍ଚଳ ସଙ୍କୁଚିତ ହେବାକୁ ବସିଛି। ହାତୀ ଚଲାପଥ ନଷ୍ଟ ହୋଇଯାଇଛି। ସେସବୁର ସୁରକ୍ଷା ଜରୁରୀ ବୋଲି ପରିବେଶବିତ୍ ରମେଶ ଚନ୍ଦ୍ର ମିଶ୍ର ମତବ୍ୟକ୍ତ କରୁଛନ୍ତି।
