ଢେଙ୍କାନାଳ ଅଫିସ, ୬ା୨ : ଢେଙ୍କାନାଳର ମହାରାଜା ଭଗୀରଥ ମହେନ୍ଦ୍ର ବାହାଦୁରଙ୍କ ରାଜତ୍ୱ ସମୟରେ ବଣୁଆ ହାତୀଙ୍କୁ ପୋଷା ମନାଇବା ଲାଗି ଅନନ୍ତପୁର ସଂରକ୍ଷିତ ଜଙ୍ଗଲରେ ନିର୍ମାଣ କରାଯାଇଥିଲା ‘ହାତୀ-ଗିରିଦା’। ଏହି ଐତିହ୍ୟସମ୍ପନ୍ନ ସ୍ଥାନକୁ ପର୍ଯ୍ୟଟନ ସ୍ଥଳୀର ମାନ୍ୟତା ଦେବାକୁ ଦାବି ହୋଇଛି। ପ୍ରାୟ ୧୬୦ ବର୍ଷ ପୁରାତନ ଏହି ସ୍ଥାନରେ ପର୍ଯ୍ୟଟକ ଅନୁକୂଳ ବାତାବରଣ ସୃଷ୍ଟିକଲେ ଏହାର ଗୁରୁତ୍ୱ ବଢ଼ିବ ବୋଲି ସାମାଜିକ କର୍ମୀ ରାଜୀବ ଲୋଚନ ସିଂଦେଓ କହିଛନ୍ତି।
ଜିଲା କାମାକ୍ଷାନଗର ବ୍ଲକଠାରୁ ୫ କିଲୋମିଟର ଦୂରରେ ରହିଛି ଗୁଣ୍ଡିଚାନାଳୀ ଗ୍ରାମ। ଗ୍ରାମଠାରୁ ୪ କିଲୋମିଟର ଦୂରରେ ରହିଛି ହାତୀ-ଗିରିଦା। ଅନନ୍ତପୁର ସଂରକ୍ଷିତ ଜଙ୍ଗଲର ୩ଟି ପାହାଡ଼ର ମିଶ୍ରଣ ସ୍ଥଳରେ ଜଙ୍ଗଲୀ ହାତୀଙ୍କୁ ଧରି ପୋଷା ମନାଇବା ପାଇଁ ହାତୀ-ଗିରିଦା ନିର୍ମାଣ କରାଯାଇଥିଲା। ଅବିଭକ୍ତ ଢେଙ୍କାନାଳ ଜିଲାର ଗଡ଼ଜାତ ସମୟରେ ଏହା ଥିଲା ଏକମାତ୍ର ହାତୀଧରା କେନ୍ଦ୍ର। ପ୍ରାକୃତିକ ଶୋଭାରାଜିରେ ଭରା ଏହି ସ୍ଥାନକୁ ପର୍ଯ୍ୟଟନ ସ୍ଥଳୀରେ ରୂପାନ୍ତରିତ କରିବାକୁ ଜିଲା ସକ୍ରିୟ ନାଗରିକ ପରିଷଦ ପକ୍ଷରୁ ପ୍ରଶାସନ ଓ ବନ ବିଭାଗର ଦୃଷ୍ଟି ଆକର୍ଷଣ କରାଯାଇଛି। ଇତିହାସ ଏବଂ ପରମ୍ପରାକୁ ନେଇ ହାତୀ-ଗିରିଦା ସମୃଦ୍ଧ। ଗୁଣ୍ଡିଚାନାଳୀଠାରୁ ଗ୍ରାମ ଜଙ୍ଗଲ ଦେଇ ପାଦଚଲା ରାସ୍ତାରେ ୨ କିମି ଗଲେ ପଡ଼େ ମା’ କଳା ମହାପାଟଙ୍କ ମଠ। ୩୨ ବର୍ଷ ତଳେ ନିର୍ମାଣ କରାଯାଇଥିବା ଏହି ମଠରେ ମହାପ୍ରଭୁ ଶ୍ରୀଜଗନ୍ନାଥ ଏବଂ ସୁଭଦ୍ରାଙ୍କ ମୂର୍ତ୍ତି ପୂଜା ପାଉଛନ୍ତି। ମଠ ନିକଟରେ ରହିଛି ମା’ଙ୍କ ଆସ୍ଥାନ। ଏହା ପରିସରରେ ବହୁ ମୂଲ୍ୟବାନ ବୃକ୍ଷରାଜି ରହିଛି। ରାସ୍ତାରେ ପ୍ରତିବନ୍ଧକ ସାଜୁଥିବା ରାମିଆଳ ନଦୀ ପାର ହେବାକୁ ଏକ ଅସ୍ଥାୟୀ କାଠପୋଲ ମଧ୍ୟ ରହିଛି। ହାତୀ-ଗିରିଦାକୁ ସବୁଦିନିଆ ସଡ଼କ କରାଯିବା ସହ ପରିବେଶ ପର୍ଯ୍ୟଟନସ୍ଥଳୀର ମାନ୍ୟତା ଦିଆଗଲେ ଏହା ପର୍ଯ୍ୟଟକଙ୍କ ପାଇଁ ଆକର୍ଷଣ ପାଲଟିବ। ୧୫୦ବର୍ଷ ତଳେ କିପରି ହାତୀ ଧରାଯାଉଥିଲା, ସେ ସମ୍ପର୍କରେ ପର୍ଯ୍ୟଟକମାନେ ଏଠାରୁ ସୂଚନା ପାଇପାରିବେ। ପ୍ରଶାସନ ଏବଂ ବନ ବିଭାଗ ଏ ଦିଗରେ ତ୍ୱରିତ ପଦକ୍ଷେପ ନେବାକୁ ଜିଲା ସକ୍ରିୟ ନାଗରିକ ପରିଷଦ ସଭାପତି ପ୍ରଦ୍ୟୁମ୍ନ ରଥ, ଆବାହକ କୃଷ୍ଣଚନ୍ଦ୍ର ଦ୍ୱିବେଦୀ, ସଭ୍ୟ ରାମଚନ୍ଦ୍ର ସାହୁ ପ୍ରମୁଖ ଦାବି କରିଛନ୍ତି।
