ନ୍ୟୁୟର୍କ,୨୫।୧୦: ଭାରତ ହେଉଛି ସୋସିଆଲ ମିଡିଆ ପ୍ଲାଟ୍ଫର୍ମ ଫେସ୍ବୁକ୍ ପାଇଁ ବିଶ୍ୱର ସବୁଠୁ ବଡ଼ ବଜାର। ତେବେ ଦେଶରେ ବିଭ୍ରାନ୍ତିକର ତଥ୍ୟ, ଘୃଣା ମନ୍ତବ୍ୟ ଓ ମୁସଲମାନ ବିରୋଧୀ କଣ୍ଟେଣ୍ଟଗୁଡ଼ିକର ବନ୍ୟା ଛୁଟିବାରେ ଲାଗିଛି। ଏହାର ମୁକାବିଲା ପାଇଁ ଫେସ୍ବୁକ୍କୁ କଡ଼ା ସଂଘର୍ଷର ସାମ୍ନା କରିବାକୁ ପଡ଼ିଛି ବୋଲି ଶନିବାର ନ୍ୟୁୟର୍କ ଟାଇମ୍ସରେ ଏକ ରିପୋର୍ଟ ପ୍ରକାଶ ପାଇଛି।
ଗଣମାଧ୍ୟମ ଗବେଷକମାନେ କହିଛନ୍ତି ଯେ, ବିଭ୍ରାନ୍ତି ସୃଷ୍ଟିକାରୀ, ଉତ୍ତେଜକ ଓ ମୁସଲିମ ବିରୋଧୀ କଣ୍ଟେଣ୍ଟରେ ଭରି ରହିଥିବା ଗ୍ରୁପ୍ ଏବଂ ପେଜ୍ ସଂଖ୍ୟା ବଢ଼ିବାରେ ଲାଗିଛି। ଗବେଷକମାନେ ୨୦୧୯ ଫେବୃୟାରୀରେ କେତେକ ନୂଆ ୟୁଜର୍ସ କଣ୍ଟେଣ୍ଟ ତିଆରି କରିଥିଲେ, ଯାହା ସାହାଯ୍ୟରେ ସେମାନେ କେରଳରେ ରହୁଥିବା ଜଣେ ବ୍ୟକ୍ତିଙ୍କ ପାଇଁ ସୋସିଆଲ ମିଡିଆ ଓ୍ବେବ୍ସାଇଟ୍ କିପରି ଦେଖାଯାଉଛି ତାହା ଜାଣିପାରିବେ। ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି ଯେ, ଏହାର ୩ ସପ୍ତାହ ପର୍ଯ୍ୟନ୍ତ ଉକ୍ତ ଆକାଉଣ୍ଟଗୁଡ଼ିକୁ ସାଧାରଣ ନିୟମ ଅନୁସାରେ ପରିଚାଳିତ କରାଯାଇଥିଲା। ଗ୍ରୁପ୍ଗୁଡ଼ିକ ସହ ଯୋଡ଼ିହେବା, ଭିଡିଓ ଓ ସାଇଟ୍ର ନୂଆ ପେଜ୍କୁ ଦେଖିବା ପାଇଁ ଫେସ୍ବୁକ୍ର ଆଲଗୋରିଥିମ୍ (ଆକଳନ ବିଧି) ଦ୍ୱାରା ନିର୍ଦ୍ଧାରିତ ସମସ୍ତ ନିୟମର ଅନୁପାଳନ କରାଯାଇଥିଲା। ଏହାର ପରିଣାମ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଦେଇଥିଲା। ୟୁଜର୍ସଙ୍କ ଆଗରେ ଘୃଣାପୂର୍ଣ୍ଣ ଭାଷଣ, ବିଭ୍ରାନ୍ତିକର ତଥ୍ୟ ଓ ହିଂସାକୁ ନେଇ ଉତ୍ସବ ପାଳନର ବନ୍ୟା ଦେଖାଯାଇଥିଲା। ଫେସ୍ବୁକ୍ ନିଜର ଆଭ୍ୟନ୍ତରୀଣ ରିପୋର୍ଟରେ ଏହାର ଡକ୍ୟୁମେଣ୍ଟେଶନ କରିଛି। ଉକ୍ତ ସଙ୍କଳନ ସେହି ମାସର ଶେଷ ଆଡ଼କୁ ପ୍ରକାଶ କରିଥିବା ନ୍ୟୁୟର୍କ ଟାଇମ୍ସରେ କୁହାଯାଇଛି।
ଟାଇମ୍ସ ଏବଂ ଆସୋସିଏଟେଡ୍ ପ୍ରେସ୍ ସହିତ ଗଣମାଧ୍ୟମ ସଂସ୍ଥାଗୁଡ଼ିକ ହାତରେ ଲାଗିଥିବା ଏହି ରିପୋର୍ଟ ମୁତାବକ କମ୍ପାନୀ ନିଜର ସବୁଠୁ ବଡ଼ ବଜାରରେ ୟୁଜର୍ସଙ୍କ ବ୍ୟବହାରକୁ ନେଇ ସଂଘର୍ଷ କରୁଥିବା ଆଭ୍ୟନ୍ତରୀଣ ରିପୋର୍ଟରୁ ଜଣାପଡ଼ିଛି। ଭାରତରେ ସ୍ବୀକୃତିପ୍ରାପ୍ତ ୨୨ ଭାଷା ମଧ୍ୟରୁ କେବଳ ୫ଟି ଭାଷାରେ ହିଁ କୃତ୍ରିମ ବୁଦ୍ଧିମତ୍ତା(ଆର୍ଟିଫିସିଆଲ ଇଣ୍ଟେଲିଜେନ୍ସ) ଆଧାରରେ କଣ୍ଟେଣ୍ଟଗୁଡ଼ିକର ବିଶ୍ଳେଷଣ କରିବା ସୁବିଧା ଉପଲବ୍ଧ ରହିଛି। ତେବେ ସେଥିରେ ହିନ୍ଦୀ ଓ ବଙ୍ଗଳା ଭାଷାକୁ ଅଦ୍ୟାବଧି ସାମିଲ କରାଯାଇ ନାହିଁ। ଏଥିଯୋଗୁ ଉଭୟ ଶାସକ ଓ ବିରୋଧୀ ନେତାମାନେ ସାଧାରଣ ନିର୍ବାଚନ ବେଳେ ଏହାର ଦୁରୁପଯୋଗ କରିବାରେ ସଫଳ ହୋଇଥିଲେ। ସେହିପରି ଦକ୍ଷିଣପନ୍ଥୀ ସଙ୍ଗଠନ ବଜରଙ୍ଗ ଦଳ ମୁସଲମାନ ବିରୋଧୀ ଅଭିଯାନ ପାଇଁ ଏହି ସୋସିଆଲ ମିଡିଆ ସାଇଟ୍କୁ ବ୍ୟବହାର କରିଛି। ଧର୍ମୀୟ ହିଂସା ବା ସାମ୍ପ୍ରଦାୟିକ ଦଙ୍ଗାକୁ ଉସୁକାଉଥିବା ଏଭଳି ସଙ୍ଗଠନଗୁଡ଼ିକୁ ଫେସ୍ବୁକ୍ ‘ବିପଜ୍ଜନକ’ ଆଖ୍ୟା ଦେବା ପାଇଁ ବିଚାର କରୁଥିବା ନେଇ ମଧ୍ୟ ରିପୋର୍ଟରେ ଦର୍ଶାଯାଇଛି। ବିଶ୍ୱରେ ଫେସ୍ବୁକ୍ରେ ପ୍ରସାରିତ ଘୃଣା ମନ୍ତବ୍ୟକୁ ଚଳିତ ବର୍ଷ ୫୦% ପର୍ଯ୍ୟନ୍ତ ହ୍ରାସ କରାଯାଇଥିବା ଏହାର ମୁଖପାତ୍ର ଆଣ୍ଡି ଷ୍ଟୋନ୍ ସୂଚନା ଦେଇଛନ୍ତି।
