ନୂଆଦିଲ୍ଲୀ,୨୨ା୯: ଘୃଣା ମନ୍ତବ୍ୟ ପ୍ରସଙ୍ଗରେ ସୁପ୍ରିମକୋର୍ଟ ବୁଧବାର ଟିଭି ଉପସ୍ଥାପକଙ୍କ ଭୂମିକାକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଦର୍ଶାଇବା ସହ ଚ୍ୟାନେଲଗୁଡ଼ିକ ଉପରେ ବର୍ଷିଛନ୍ତି। ଏଥିସହ ସରକାର କାହିଁକି ନୀରବଦ୍ରଷ୍ଟା ସାଜିଛନ୍ତି ବୋଲି ସର୍ବୋଚ୍ଚ ଅଦାଲତ ପ୍ରଶ୍ନ କରିଛନ୍ତି।
ମୁଖ୍ୟସ୍ରୋତର ଗଣମାଧ୍ୟମ କିମ୍ବା ସୋସିଆଲ ମିଡିଆରେ ଘୃଣା ମନ୍ତବ୍ୟ ଉପରେ ଲଗାମ ଲଗାଯାଇପାରୁ ନାହିଁ। ଟିଭି ଚ୍ୟାନେଲ ଉପସ୍ଥାପକଙ୍କ କର୍ତ୍ତବ୍ୟ ହେଉଛି ଖବର ଉପସ୍ଥାପନ ଓ ବିତର୍କ ବେଳେ ଯେପରି ଏପରି ମନ୍ତବ୍ୟ ନ ଆସେ ତାହା ସୁନିଶ୍ଚିତ କରିବା। ପ୍ରେସ୍ ସ୍ବାଧୀନତା ଗୁରୁତ୍ୱପୂର୍ଣ୍ଣ। ଆମେରିକା ଭଳି ଭାରତରେ ଗଣମାଧ୍ୟମର ସ୍ବାଧୀନତା ନାହିଁ। କିନ୍ତୁ ସୀମା କେଉଁଠି ଅଙ୍କାଯିବ ତାହା ଆମେ ଜାଣିରଖିବା ଉଚିତ ବୋଲି ଜଷ୍ଟିସ୍ କେ.ଏମ୍. ଜୋସେଫ୍ ଗତବର୍ଷ ଦାଖଲ ହୋଇଥିବା କେତେକ ଆବେଦନର ଶୁଣାଣି କରି କହିଛନ୍ତି।
ଘୃଣା ମନ୍ତବ୍ୟ ଦେବା ହେଉଛି ଜଣକୁ ହତ୍ୟା କରିବା ସଦୃଶ। ଏହି ପ୍ରସଙ୍ଗରେ କେନ୍ଦ୍ର ସରକାର ବିପରୀତ ଆଭିମୁଖ୍ୟ ଗ୍ରହଣ ନ କରି କୋର୍ଟଙ୍କୁ ସହଯୋଗ କରିବା ଉଚିତ ବୋଲି ଜଷ୍ଟିସ୍ ଜୋସେଫ୍ଙ୍କ ଖଣ୍ଡପୀଠ କହିଛନ୍ତି। ଏହି ପ୍ରସଙ୍ଗରେ ଆସନ୍ତା ନଭେମ୍ବର ୨୩ରେ ପରବର୍ତ୍ତୀ ଶୁଣାଣି କରାଯିବ। ଏହା ଭିତରେ ଘୃଣା ମନ୍ତବ୍ୟ ଉପରେ ରୋକ୍ ଲଗାଇବା ପାଇଁ ଲ’ କମିଶନଙ୍କ ସୁପାରିସକୁ କେନ୍ଦ୍ର ସରକାର କିପରି କାର୍ଯ୍ୟକାରୀ କରୁଛନ୍ତି ସେନେଇ ନିଜ ଆଭିମୁଖ୍ୟ ସ୍ପଷ୍ଟ କରନ୍ତୁ ବୋଲି ଖଣ୍ଡପୀଠ କହିଛନ୍ତି।
ପ୍ରକାଶ ଯେ, ଦେଶରେ ହେଟ୍ ସ୍ପିଚ୍ ମାମଲା ବଢ଼ିଚାଲିଥିବାବେଳେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ୨୦୧୭ରେ ଲ’ କମିଶନ କେତେକ ନିର୍ଦ୍ଦିଷ୍ଟ ଆଇନ ଆଣିବା ପାଇଁ ରିପୋର୍ଟ ଦାଖଲ କରିଥିଲେ। ଘୃଣା ମନ୍ତବ୍ୟକୁ ବର୍ତ୍ତମାନ ସୁଦ୍ଧା ଭାରତର କୌଣସି ଆଇନରେ ପରିଭାଷିତ କରାଯାଇ ନାହିଁ। ତେବେ କେତେକ ନିର୍ଦ୍ଦିଷ୍ଟ ଆଇନ ପ୍ରଣୟନ କରାଗଲେ ଏହା ଉପରେ ଅଙ୍କୁଶ ଲଗାଯାଇପାରିବ ବୋଲି ଲ’ କମିଶନ ନିଜ ରିପୋର୍ଟରେ ପ୍ରସ୍ତାବ ଦେଇଥିଲେ।
