ଭୁବନେଶ୍ୱର,୧୭ା୧: ହକି ବିଶ୍ୱକପ୍ରେ ଭାରତକୁ ଲାଗିଛି ବଡ଼ ଝଟକା। ରବିବାର ଇଂଲଣ୍ଡ ବିପକ୍ଷ ଗୋଲଶୂନ୍ୟ ମ୍ୟାଚ୍ର ଚତୁର୍ଥ କ୍ୱାର୍ଟରରେ ଭାରତର ଆଟାକିଂ ମିଡ୍ଫିଲ୍ଡର ହାର୍ଦ୍ଦିକ୍ ସିଂଙ୍କ ମାଂସପେଶୀ ଟାଣି ହୋଇ ଯାଇଥିଲା। ଯାହାଫଳରେ ସେ ଓ୍ବେଲ୍ସ ବିପକ୍ଷ ମ୍ୟାଚ୍ରୁ ବାଦ୍ ପଡ଼ିଛନ୍ତି। ସ୍କାନିଂ ପରେ ସେ ସମ୍ପୂର୍ଣ୍ଣ ଟୁର୍ନାମେଣ୍ଟରେ ଖେଳିବେ କି ନାହିଁ ତାହା ସ୍ପଷ୍ଟ ହେବ। ଉଭୟ ସ୍ପେନ୍ ଓ ଇଂଲଣ୍ଡ ବିପକ୍ଷ ମ୍ୟାଚ୍ରେ ହାର୍ଦ୍ଦିକଙ୍କ ପ୍ରଦର୍ଶନ ଉଚ୍ଚକୋଟୀର ଥିଲା। ସ୍ପେନ୍ ବିପକ୍ଷରେ ଭାରତର ୨-୦ ବିଜୟରେ ହାର୍ଦ୍ଦିକ ଗୋଟିଏ ଗୋଲ ଦେଇଥିଲେ। ହାର୍ଦ୍ଦିକ ବାଦ୍ ପଡ଼ିଲେ ଅତିରିକ୍ତ ଖେଳାଳି ରାଜକୁମାର ପାଲ୍ଙ୍କୁ ବଦଳ ଖେଳାଳି ଭାବେ ସାମିଲ କରାଯିବ। ଏଫ୍ଆଇଏଚ୍ ନିୟମ ଅନୁସାରେ ଯଦି ଜଣେ ଖେଳାଳିଙ୍କ ସ୍ଥାନରେ ଅନ୍ୟ ଖେଳାଳିଙ୍କୁ ସାମିଲ କରାଯାଉଛି ତେବେ ପରେ ସେ ସୁସ୍ଥ ହେଲେ ମଧ୍ୟ ଆଉ ଦଳରେ ସାମିଲ ହୋଇପାରିବେନାହିଁ। ହାର୍ଦ୍ଦିକ ଭାରତୀୟ ମିଡ୍ଫିଲ୍ଡରେ ଜଣେ ଅଗ୍ରଣୀ ଖେଳାଳି ରହିଥିବା ବେଳେ ଫରଓ୍ବାର୍ଡଙ୍କ ପରି ଆଟାକ୍ ଶୈଳୀ ତାଙ୍କୁ ଆଣିଦେଇଥିଲା ପ୍ରସିଦ୍ଧି। ସ୍ପେନ୍ ବିପକ୍ଷ ପ୍ରଥମ ମ୍ୟାଚ୍ରେ ଚମତ୍କାର ଟ୍ୟାକେଲ୍ ଓ ଆକ୍ରମଣର ଉଦାହରଣ ଦେଖାଇ ସେ ଭାରତ ପାଇଁ ଦ୍ୱିତୀୟ ଗୋଲ ସ୍କୋର କରିଥିଲେ।
