ନୂଆଦିଲ୍ଲୀ,୨୨।୨: ଭାରତୀୟ କ୍ରିକେଟର ହାର୍ଦ୍ଦିକ ପାଣ୍ଡ୍ୟା ପୁଣି ଥରେ ଚର୍ଚ୍ଚାର ପରିସରକୁ ଆସିଛନ୍ତି। ୨୦୨୪ ମସିହାରେ ପତ୍ନୀ ନତାଶା ଷ୍ଟାନକୋଭିକଙ୍କ ସହ ତାଙ୍କର ବିବାହ ବିଚ୍ଛେଦ ହୋଇଥିଲା। ସମ୍ପର୍କରେ ପୂର୍ଣ୍ଣଚ୍ଛେଦ ପଡ଼ିଥିଲେ ମଧ୍ୟ ନିଜ ପୁଅ ଅଗସ୍ତ୍ୟଙ୍କ ପାଇଁ ହାର୍ଦ୍ଦିକ ସବୁକିଛି କରିବାକୁ ପ୍ରସ୍ତୁତ ବୋଲି ପ୍ରମାଣ କରିଛନ୍ତି।
ସୋସିଆଲ ମିଡିଆରେ ଭାଇରାଲ ହେଉଥିବା ଖବର ଅନୁଯାୟୀ, ହାର୍ଦ୍ଦିକ ତାଙ୍କ ପୁଅ ଅଗସ୍ତ୍ୟଙ୍କ ପାଇଁ ଏକ ଦାମୀ ଲ୍ୟାଣ୍ଡ ରୋଭର ଡିଫେଣ୍ଡର୍ (Land Rover Defender) ଏସ୍ୟୁଭି କାର୍ ଉପହାର ଦେଇଛନ୍ତି। ଏହି ଦାମୀ କାର୍ର ମୂଲ୍ୟ ପ୍ରାୟ ୩ ରୁ ୪ କୋଟି ଟଙ୍କା ବୋଲି କୁହାଯାଉଛି।
ହାର୍ଦ୍ଦିକ ଏହି ଗିଫ୍ଟ ବିଶେଷ କରି ପୁଅ ପାଇଁ ଦେଇଛନ୍ତି। କିନ୍ତୁ ଅଗସ୍ତ୍ୟ ଏବେ ଛୋଟ ହୋଇଥିବାରୁ ଏବଂ ନତାଶା ତାଙ୍କର ଦେଖାଶୁଣା କରୁଥିବାରୁ, ନତାଶା ନିଜେ ଯାଇ ଏହି କାର୍କୁ ରିସିଭ କରିଛନ୍ତି। ସୋସିଆଲ ମିଡିଆରେ କିଛି ଫଟୋ ଭାଇରାଲ ହେଉଛି, ଯେଉଁଥିରେ ନତାଶା ଏବଂ ଅଗସ୍ତ୍ୟ ଏହି ନୂଆ କାର୍ ସହ ପୋଜ ଦେଉଥିବା ଦେଖିବାକୁ ମିଳିଛି।
ହାର୍ଦ୍ଦିକ ଏବଂ ନତାଶା ୩୧ ମେ’ ୨୦୨୦ରେ କୋର୍ଟ ମ୍ୟାରେଜ କରିଥିଲେ। ପରେ ୨୦୨୩ ଫେବୃଆରୀ ୧୪ରେ ଉଦୟପୁରଠାରେ ଉଭୟ ହିନ୍ଦୁ ଓ ଖ୍ରୀଷ୍ଟିଆନ ରୀତିନୀତିରେ ପୁନର୍ବାର ବିବାହ କରିଥିଲେ। ମାତ୍ର ୨୦୨୪ରେ ସୋସିଆଲ ମିଡିଆରେ ଏକ ପୋଷ୍ଟ ଜରିଆରେ ସେମାନେ ନିଜର ଛାଡ଼ପତ୍ର ନେଇ ଘୋଷଣା କରିଥିଲେ।
ସୂଚନାଯୋଗ୍ୟ, ଛାଡ଼ପତ୍ର ପରେ ହାର୍ଦ୍ଦିକ ପାଣ୍ଡ୍ୟା ବର୍ତ୍ତମାନ ମାହିକା ଶର୍ମାଙ୍କୁ ଡେଟ୍ କରୁଛନ୍ତି। ତେବେ ପୂର୍ବତନ ପତ୍ନୀ ଓ ପୁଅଙ୍କ ପ୍ରତି ହାର୍ଦ୍ଦିକଙ୍କ ଏହି ସ୍ନେହ ଏବଂ ଦାୟିତ୍ୱବୋଧକୁ ପ୍ରଶଂସକମାନେ ବେଶ ପସନ୍ଦ କରିଛନ୍ତି।
