ନୟାଗଡ଼ ଅଫିସ,୧୭।୩: ବିପର୍ଯ୍ୟସ୍ତ ସ୍ବାସ୍ଥ୍ୟସେବାର ପ୍ରତିବାଦ କରିବାରୁ ସ୍ବାମୀଙ୍କୁ ଦୋଷ ଦେଇ ରୋଗିଣା ସ୍ତ୍ରୀ ଉପରେ ନିର୍ଯାତନା ଦେବା ପରି ଘଟଣା ନୟାଗଡ଼ ଜିଲା ଓଡ଼ଗଁା ବ୍ଲକର ଶରଣକୁଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଗୁରୁବାର ଘଟିଛି। ପ୍ରତିଶୋଧ ପରାୟଣ ହୋଇ ନିଦାନ ବିଭାଗର କେତେଜଣ କର୍ମଚାରୀ ସମ୍ପୃକ୍ତା ମହିଳାଙ୍କ ରକ୍ତ ଓ ପରିଶ୍ରା ପରୀକ୍ଷା କଲେନି। ବରଂ ବାହାରେ ଟଙ୍କା ଦେଇ ପରୀକ୍ଷା କରାଇ ନେବାକୁ ପରାମର୍ଶ ଦେଲେ। ସେହିପରି ନିରାମୟରୁ ମାଗଣା ଔଷଧ ନ ଦେଇ ଡାକ୍ତର ବାହାରୁ ଔଷଧ କିଣିବାକୁ ଲେଖିଲେ। ଏପରି କି ବେଡ୍ ନ ଥିବା ଦର୍ଶାଇ ତାଙ୍କୁ ଆଡ୍ମିଶନ କରା ନ ଯାଇ ଘରକୁ ଫେରାଇ ଦିଆଯାଇଥିଲା। ଏହାକୁ ନେଇ ସମ୍ପୃକ୍ତା ମହିଳା ମେଡିକାଲ ଅଫିସରଙ୍କ ନିକଟରେ ଅଭିଯୋଗ କରି ନ୍ୟାୟ ପାଇଁ ନିବେଦନ କରିଛନ୍ତି।
ସୂଚନା ଅନୁଯାୟୀ, କରଡା ବ୍ରାହ୍ମଣ ଶାସନର ବସନ୍ତ ପ୍ରଧାନ ନାମ୍ନୀ ଜଣେ ମହିଳା ଜ୍ୱରରେ ପୀଡ଼ିତ ହୋଇ ଗୁରୁବାର ଶରଣକୁଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆସିଥିଲେ। ଓପିଡିରେ ତାଙ୍କ ସ୍ବାସ୍ଥ୍ୟ ପରୀକ୍ଷା କରିବା ପରେ ଡାକ୍ତର ରକ୍ତ ଓ ପରିଶ୍ରା ପରୀକ୍ଷା କରିବାକୁ ପରାମର୍ଶ ଦେଇଥିଲେ। ରୋଗୀ ନିଦାନ ବିଭାଗକୁ ଯାଇ ଡାକ୍ତରଙ୍କ ପ୍ରେସ୍କ୍ରିପଶନ ଦେଖାଇଥିଲେ। ନିଦାନ ବିଭାଗର କର୍ମଚାରୀ ଡାକ୍ତରଙ୍କ ଲେଖା ଦେଖି ବାହାରେ ପରୀକ୍ଷା କରିବାକୁ କହିଥିଲେ। ତୁମ ସ୍ବାମୀ ଆମ ବିରୋଧରେ ବିଭିନ୍ନ ସମୟରେ ଅଭିଯୋଗ କରୁଥିବାରୁ ଆମେ ପରୀକ୍ଷା କରି ପାରିବୁ ନାହିଁ କହି ସମ୍ପୃକ୍ତ ମହିଳାଙ୍କୁ ଏଣୁତେଣୁ କଥା କହିଥିଲେ। ନିଦାନ ବିଭାଗ କର୍ମଚାରୀଙ୍କ ଜୁଲମ ବିରୋଧରେ ସେ ପ୍ରତିବାଦ ନ କରି ବାହାରେ ପରୀକ୍ଷା କରାଇ ଡାକ୍ତରଙ୍କୁ ରିପୋର୍ଟ ଦେଖାଇଲେ। ଏପରି ସମୟରେ ଡାକ୍ତର ବାହାରୁ ଔଷଧ କିଣିବାକୁ ପ୍ରେସକ୍ରିପଶନ ଲେଖିଥିଲେ। ମହିଳା ଜଣକ ନିରାମୟରୁ ଔଷଧ ନେବେ ବୋଲି ବାରମ୍ବାର କହୁଥିଲେ ମଧ୍ୟ ଡାକ୍ତର ତାଙ୍କ କଥା ଶୁଣି ନ ଥିଲେ ବୋଲି ସେ ଅଭିଯୋଗ କରିଥିଲେ। ଏତିକିରେ ମହିଳଙ୍କ ଉପରେ ନିର୍ଯାତନା କମି ନ ଥିଲା। ଶେଷରେ ସେ ହଟହଟା ହୋଇ ୮୧୦ ଟଙ୍କାର ଔଷଧ କିଣି ଘରକୁ ଫେରିଥିଲେ। ରୋଗୀଙ୍କ ଅଭିଯୋଗ ଓ ସ୍ବାସ୍ଥ୍ୟକେନ୍ଦ୍ରର ସେବାକୁ ଦେଖିଲେ ବିପର୍ଯ୍ୟସ୍ତ ସ୍ବାସ୍ଥ୍ୟସେବାର ପ୍ରତିବାଦ କରିବା କେତେ ଯେ ଭୟଙ୍କର ବସନ୍ତ ପ୍ରଧାନ ନାମକ ଏହି ମହିଳା ରୋଗୀଙ୍କ ଘଟଣାକୁ ଅନୁଧ୍ୟାନ କଲେ ସ୍ପଷ୍ଟ ହୋଇ ଯାଉଛି।
ଏନେଇ ବସନ୍ତଙ୍କ ସ୍ବାମୀ ଋଷି ପ୍ରଧାନ କୁହନ୍ତି, ଶରଣକୁଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ଜିଲା ମୁଖ୍ୟ ଚିକିସତ୍ାଳୟର ବିପର୍ଯ୍ୟସ୍ତ ସ୍ବାସ୍ଥ୍ୟସେବା, ଚାଷୀ ଓ ଶ୍ରମିକଙ୍କ ସମସ୍ୟା, ଦୁଃଖି ଦରିଦ୍ର ଲୋକଙ୍କ ଅସୁବିଧାକୁ ଦେଖିଲେ ମୁଁ ପ୍ରତିବାଦ କରି ଏହାର ସମାଧାନ କରିବାକୁ ଚେଷ୍ଟା କରେ। ଏଥିପାଇଁ ଅନେକ ଥର ଆନ୍ଦୋଳନ କରିଛୁ। ଅନେକ କିଛି ପରିବର୍ତ୍ତନ ହୋଇଛି। ଏଭଳିସ୍ଥଳେ ନିଦାନ ବିଭାଗରେ ରୋଗୀ ଫେରିବା, ଠିକ ସମୟରେ ପରୀକ୍ଷଣ ନ ହେବା, କର୍ମଚାରୀ କାର୍ଯ୍ୟାଳୟକୁ ନ ଆସିବା ନେଇ ପ୍ରତିବାଦ କରିଛି। ପୁଣି କାୟାକଳ୍ପ ଟିମ୍ ସମ୍ମୁଖରେ ବିପର୍ଯ୍ୟସ୍ତ ସ୍ବାସ୍ଥ୍ୟସେବା ସମ୍ପର୍କରେ ଅଭିଯୋଗ କରିଛି। ସ୍ବାସ୍ଥ୍ୟସେବାରେ ସୁଧାର ଆଣିବାକୁ ମୋର ପ୍ରଚେଷ୍ଟା ଯୋଗୁ ରାଗ ରଖି ମୋର ସ୍ତ୍ରୀକୁ ସେବା ମିଳିବନି କେବେ ଭାବି ନ ଥିଲି। ଡାକ୍ତର ଓ ନିଦାନ ବିଭାଗରେ ମୋ ସ୍ତ୍ରୀ ଜ୍ୱରରେ ପୀଡ଼ିତ ହୋଇ ବାରଣ୍ଡାରେ ପଡି ରହିଥିଲେ। ଘରୁ ଟଙ୍କା ଆଣିବା ପରେ ଔଷଧ କିଣି ଘରକୁ ଫେରିଲି। ମୋ ଅଭିଯୋଗକୁ ଚପାଇ ଦେବାକୁ ଉଦ୍ୟମ ଚାଲିଛି। ହେଲେ ମୁଁ ଠିକ୍ରେ ଅଛି, ମୋ ସ୍ତ୍ରୀଙ୍କୁ ନ୍ୟାୟ ମିଳିବ ବୋଲି ଆଶା ରହିଛି। ସିଡିଏମ୍ଓ ମକରନ୍ଦ ବେଉରା କୁହନ୍ତି, ଅଭିଯୋଗ ମିଳିଛି। ଘଟଣାର ତଦନ୍ତ ପାଇଁ ମେଡିକାଲ ଅଫିସରଙ୍କୁ କୁହାଯାଇଛି। ଚିକିତ୍ସା କରୁଥିବା ଡାକ୍ତର, ନିଦାନ ବିଭାଗର କର୍ମଚାରୀ ଓ ଅଭିଯୋଗକାରୀଙ୍କୁ ଡକାଇ ଘଟଣାର ତଦନ୍ତ କରିବାକୁ ପରାମର୍ଶ ଦେଇଛନ୍ତି ।
