ମୁମ୍ବାଇ,୧୫।୭:ମହାରାଷ୍ଟ୍ର ରାଜନୀତିରେ ‘ଅପରେଶନ ଟାଇଗର୍’କୁ ନେଇ ଚର୍ଚ୍ଚା ଏବେ ବି ଶାନ୍ତ ପଡ଼ିନଥିବା ବେଳେ ଏକ ନୂଆ ମୋଡ଼ ସାମ୍ନାକୁ ଆସିଛି। ପ୍ରତିଦିନ ନୂଆ ନୂଆ ଆଶଙ୍କା, ଗୁପ୍ତ ବୈଠକ ଏବଂ ରାଜନୈତିକ ସଙ୍କେତ ରାଜ୍ୟର ରାଜନୈତିକ ପାଣିପାଗକୁ ବଦଳାଇବାରେ ଲାଗିଛି। ମଙ୍ଗଳବାର ବିଳମ୍ବିତ ରାତିରେ ହୋଇଥିବା କିଛି ଗୁରୁତ୍ୱପୂର୍ଣ୍ଣ ଆଲୋଚନା ଏହି ରାଜନୈତିକ ଉଷ୍ମତାକୁ ଆହୁରି ବଢ଼ାଇ ଦେଇଛ। ଏକପଟେ ଶରଦ ପାୱାର ଗୋଷ୍ଠୀର ପ୍ରଦେଶ ସଭାପତି ଜୟନ୍ତ ପାଟିଲ ପ୍ରଥମେ ପାୱାରଙ୍କ ବାସଭବନ ‘ସିଲଭର ଓକ’ରେ ଆଲୋଚନା କରିବା ପରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନ୍ଭିସଙ୍କ ସରକାରୀ ବାସଭବନ ‘ବର୍ଷା’ରେ ପହଞ୍ଚିଥିଲେ। ଅନ୍ୟପଟେ ଶାସକ ଦଳରେ ସାମିଲ ଥିବା ଏନସିପିର ବରିଷ୍ଠ ନେତା ପ୍ରଫୁଲ୍ଲ ପଟେଲ ଏବଂ ସୁନୀଲ ତଟକରେ ମଧ୍ୟ ସେହି ସମୟରେ ଫଡନ୍ଭିସଙ୍କ ସହ ପୃଥକ ବୈଠକ କରିଥିଲେ। ଏହି ବିଳମ୍ବିତ ରାତିର ରହସ୍ୟମୟ ସାକ୍ଷାତକାର ପରେ ରାଜ୍ୟରେ ଏକ ନୂଆ ରାଜନୈତିକ ସମୀକରଣ ତିଆରି ହେଉଥିବା ନେଇ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି।
ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଜୁଲାଇ ୨୦୨୩ରେ ଅଜିତ ପାୱାରଙ୍କ ବିଦ୍ରୋହ ପରେ ପ୍ରଥମ ଥର ପାଇଁ ଶରଦ ପାୱାରଙ୍କ ଦଳ ସବୁଠାରୁ ବଡ଼ ସଙ୍କଟଜନକ ମୋଡ଼ରେ ଛିଡ଼ା ହୋଇଛି। ପ୍ରଥମେ ଦଳ କଂଗ୍ରେସ ସହ ମିଶ୍ରଣ କରିବା ନେଇ ଆଲୋଚନା ହେଉଥିଲା, କିନ୍ତୁ ବର୍ତ୍ତମାନ ଏନଡିଏ (NDA) ସହ ଯିବା ନେଇ ଚର୍ଚ୍ଚା ଜୋର ଧରିଛି।
ସୂତ୍ର ଅନୁଯାୟୀ, ଶରଦ ପାୱାରଙ୍କ ଦଳର ଏକାଧିକ ବିଧାୟକ ମନେକରନ୍ତି ଯେ ଦୀର୍ଘ ସମୟ ଧରି ବିରୋଧୀ ଦଳରେ ରହିବା ଦାରା ସେମାନଙ୍କ ନିର୍ବାଚନ ମଣ୍ଡଳୀର ବିକାଶମୂଳକ କାର୍ଯ୍ୟ ପାଇଁ ସରକାରୀ ପାଣ୍ଠି ଓ ପ୍ରଶାସନିକ ମଞ୍ଜୁରୀ ପାଇବାରେ ବହୁତ ଅସୁବିଧା ହେଉଛି। ତେଣୁ ସେମାନେ ଶାସକ ମେଣ୍ଟ ସହ ଯିବାକୁ ଆଗ୍ରହ ପ୍ରକାଶ କରୁଛନ୍ତି। ଅବଶ୍ୟ ଏହି ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି କେବଳ ଶରଦ ପାୱାର ହିଁ ନେବେ।
ଯଦିଓ ନେତାମାନେ ଏହାକୁ କେବଳ ସାଧାରଣ ନିର୍ବାଚନମଣ୍ଡଳୀ କାର୍ଯ୍ୟର ଆଲୋଚନା ବୋଲି କହୁଛନ୍ତି, କିନ୍ତୁ ବିଳମ୍ବିତ ରାତିର ଏହି ବୈଠକ ମହାରାଷ୍ଟ୍ର ରାଜନୀତିରେ ଆଗକୁ ଆସୁଥିବା କୌଣସି ଏକ ବଡ଼ ରାଜନୈତିକ ବିସ୍ଫୋରଣର ପୂର୍ବାଭାସ ବୋଲି ଚର୍ଚ୍ଚା ହେଉଛି।