ଭାରତୀୟ ଦଳର ଅଧିନାୟକ ବିରାଟ କୋହଲି ଆଜି ୩୨ ବର୍ଷ ବର୍ଷରେ ପଦାର୍ପଣ କରିଛନ୍ତି। ୧୯୮୮, ନଭେମ୍ବର ୫ରେ ଜନ୍ମ ହୋଇଥିବା ବିରାଟ କୋହଲି ଆଜି ଦୁନିଆର ସର୍ବୋତ୍ତମ କ୍ରିକେଟରମାନଙ୍କ ମଧ୍ୟରୁ ଅନ୍ୟତମ। ବିରାଟ କୋହଲି କ୍ରିକେଟର ୩ଟି ଫର୍ମାଟରେ ନିଜ ଜଲଓ୍ବା ଦେଖାସାରିଛନ୍ତି। ସେ ଟେଷ୍ଟରେ ୨୭ ଶତକ ଏବଂ ଏକଦିବସୀୟରେ ୪୩ ଶତକ ହାସଲ କରିଛନ୍ତି। ଅର୍ଥାତ୍ ଅନ୍ତର୍ଜାତୀୟ କ୍ରିକେଟରେ ବିରାଟ କୋହଲି ମୋଟ ୭୦ଟି ଶତକ ଲଗାଇଛନ୍ତି। ବିରାଟ କୋହଲି ଭାରତର ଅଣ୍ଡର-୧୯ ଦଳର ଅଧିନାୟକ ଥିବାବେଳେ ତାଙ୍କ ନାଁ ଚର୍ଚ୍ଚାକୁ ଆସିଥିଲା। ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦଳ ଚାମ୍ପିଅନ ହୋଇଥିଲା। ତେବେ ଖୁବ କମ ଲୋକ ଜାଣନ୍ତି ଯେ ଆରଜେଡି ନେତା ତଥା ଲାଲୁ ଯାଦବଙ୍କ ପୁଅ ତେଜସ୍ବୀ ଯାଦବଙ୍କ ଅଧିନାୟିକତ୍ୱରେ ବିରାଟ କୋହଲିଙ୍କ ଭାଗ୍ୟ ବଦଳି ଯାଇଥିଲା।
ଭାରତର ପୂର୍ବତନ ଚୟନକର୍ତ୍ତା ତଥା ବ୍ୟାଟ୍ସମ୍ୟାନ ଦିଲୀପ ଭେଙ୍ଗସରକାର ବିରାଟ କୋହଲିଙ୍କୁ ପ୍ରଥମ ଥର ପାଇଁ ଭାରତୀୟ ଦଳରେ ସୁଯୋଗ ଦେଇଥିଲେ। ଏକ ସ୍ବତନ୍ତ୍ର ସାକ୍ଷାତକାରରେ ଦିଲୀପ ଭେଙ୍ଗସରକର ବିରାଟ କୋହଲିଙ୍କ ଚୟନର କାହାଣୀ କହିଥିଲେ। ଭେଙ୍ଗସରକର ପ୍ରକାଶ କରିଥିଲେ, ୨୦୦୦ ମସିହାରେ ବିସିସିଆଇ ଏକ ପ୍ରତିଭା ଖୋଜିବା କମିଟି ଗଠନ କରିଥିଲା, ମୁଁ ଏହାର ମୁଖ୍ୟ ଥିଲି। ବ୍ରିଜେଶ ପଟେଲ ମଧ୍ୟ ମୋ ସହିତ ଥିଲେ। ମୁଁ ସାରା ଦେଶରେ ୧୪ ବର୍ଷରୁ କମ, ୧୬ ବର୍ଷରୁ କମ ଏବଂ ୧୯ ବର୍ଷରୁ କମ ମ୍ୟାଚ ଦେଖୁଥିଲି। ମୁଁ ପ୍ରଥମେ ଅଣ୍ଡର -୧୬ ମ୍ୟାଚରେ ମୁମ୍ବାଇ ବିପକ୍ଷରେ ବିରାଟ କୋହଲିଙ୍କୁ ଦେଖିଥିଲି। ବିରାଟ କୋହଲି ତେଜସ୍ବୀଙ୍କ ଅଧିନାୟକତ୍ୱରେ ଖେଳୁଥିଲେ। ସେଠାରେ ବିରାଟ କୋହଲି ଜବରଦସ୍ତ ବ୍ୟାଟିଂ କରିଥିଲେ। ଏହାପରେ ମୁଁ ତାଙ୍କୁ ଭାରତୀୟ ଦଳରେ ସ୍ଥାନ ଦେଇଥିଲି ବୋଲି ସେ କହିଥିଲେ।
