ନୂଆଦିଲ୍ଲୀ,୨୩।୧: ବିଶ୍ୱସ୍ତରୀୟ କ୍ରିକେଟରେ ସର୍ବକାଳୀନ ଶ୍ରେଷ୍ଠ ପାକିସ୍ତାନୀ ବ୍ୟାଟ୍ସମ୍ୟାନ ହେଉଛନ୍ତି ହନିଫ ମହମ୍ମଦ। ଗୁଜରାଟର ଜୁନାଗଡ଼ରେ ଜନ୍ମ ହୋଇଥିବା ହନିଫ ୧୯୫୨ରେ ଭାରତ ବିପକ୍ଷରେ ଅନ୍ତଃର୍ଜାତୀୟ କ୍ରିକେଟ କ୍ୟାରିୟର ଆରମ୍ଭ କରିଥିଲେ। ନିଜ ସମୟରେ ତାଙ୍କୁ ଦୁନିଆର ଶ୍ରେଷ୍ଠ ବ୍ୟାଟ୍ସମ୍ୟାନ୍ ଭାବେ ବିବେଚନା କରାଯାଉଥିଲା। ସେ ୫୫ ଟେଷ୍ଟ ମ୍ୟାଚ୍ ଖେଳି ହାରାହାରି ୪୩.୯୮ରେ ୩,୯୧୫ ରନ୍ ସ୍କୋର କରିଥିଲେ। ଏଥିରେ ୫୫ ଶତକ ଏବଂ ୬୬ ଅର୍ଦ୍ଧଶତକ ରହିଥିଲା।
ହନିଫ ତାଙ୍କ ଟେଷ୍ଟ କ୍ୟାରିୟରରେ ଅନେକ ଉଲ୍ଲେଖନୀୟ ଇନିଂସ ଖେଳିଥିଲେ। ହେଲେ ୧୯୫୮ରେ ବାରବାଡୋସ୍ରେ ଖେଳାଯାଇଥିବା ଓ୍ବେଷ୍ଟଇଣ୍ଡିଜ ବିପକ୍ଷ ମ୍ୟାଚ୍ରେ ତାଙ୍କର ପ୍ରଦର୍ଶନ ସ୍ମରଣୀୟ ହୋଇ ରହିଛି। ୧୯୫୮ ଜାନୁୟାରୀ ୨୩ରେ ଖେଳାଯାଇଥିବା ଉକ୍ତ ମ୍ୟାଚ୍ରେ ସେ ୩୩୭ ରନ୍ କରିଥିଲେ। ଏହାଛଡ଼ା ଦଳକୁ ପରାଜୟରୁ ରକ୍ଷା କରିବାକୁ ନେଇ ବିଶ୍ୱ ରେକର୍ଡ ମଧ୍ୟ କରିଥିଲେ।
ମ୍ୟାଚ୍ରେ ଓ୍ବେଷ୍ଟଇଣ୍ଡିଜ୍ର କନାର୍ଡ ହଣ୍ଟ(୧୪୨) ଏବଂ ଏଭର୍ଟନ ଭିକ୍ସ(୧୯୭)ର ଶତକୀୟ ପାଳି ଯୋଗୁ ୯ ଉଇକେଟରେ ୫୭୯ ରନ୍ରେ ପାଳି ଘୋଷଣା କରିଥିଲା। ପରେ ଅତିଥି ପାକିସ୍ତାନ ଟିମ୍କୁ ୧୦୨ ରନ୍ରେ ଅଲଆଉଟ୍ କରିବା ପରେ ଫଲୋଅନ୍ ଖେଳିବାକୁ ବାଧ୍ୟ କରିଥିଲା। ସେତେବେଳେ ପାକିସ୍ତାନୀ ଟିମ୍ ଇନିଂସ ପରାଜୟର ଆଶଙ୍କା ସୃଷ୍ଟି ହୋଇଥିଲା। ଏଭଳି ସମୟରେ ପ୍ରଥମ ଇନିଂସରେ ୧୭ ରନ୍ କରିଥିବା ହନିଫ୍ ପଡ଼ିଆକୁ ଓହ୍ଲାଇଥିଲେ। ବ୍ୟାଟ୍ସମ୍ୟାନ୍ ଇମ୍ତିଆଜ୍ ଅହମ୍ମଦଙ୍କ ସହ ମିଶି ସେ ୧୫୨ରନ୍ର ଭାଗିଦାରୀ କରିଥିଲେ। ଇମ୍ତିଆଜ୍(୯୧)ଙ୍କ ଉଇକେଟ ଯିବା ପରେ ହନିଫ ତୃତୀୟ ଦିନ ଖେଳ ଶେଷ ସୁଦ୍ଧା ୬୧ ରନ୍ କରି ଅପରାଜିତ ଥିଲେ। ତୃତୀୟ ଦିନରେ ପାକିସ୍ତାନର ସ୍କୋର ୧୬୨/୧ ଥିଲା।
ମ୍ୟାଚ୍ର ଚତୁର୍ଥ ଦିନ ହନିଫ ଦିନସାରା ପିଚ୍ରେ ରହି ନିଜର ଶତକ ପୂରଣ କରିଥିଲେ। ଦଳର ସ୍କୋର ୩୩୯/୨ ଥିବା ବେଳେ ବ୍ୟକ୍ତିଗତ ଭାବେ ସେ ୧୬୧ ରନ୍ କରିଥିଲେ। ପଞ୍ଚମ ଦିନରେ ମଧ୍ୟ ହନିଫ୍ଙ୍କ ମାରାଥନ ଇନିଂସ ଜାରି ରହିଥିଲା। କ୍ରମାଗତ ଭାବେ ତୃତୀୟ ଦିନ ପାଇଁ ସେ ଅପରାଜିତ ୨୭୦ ରନ୍ କରିଥିଲେ। ପଞ୍ଚମ ଦିନରେ ଦଳର ସ୍କୋର ୫୨୫/୩ରେ ପହଞ୍ଚିଥିଲା।
ଷଷ୍ଠ ଦିନ ହନିଫ ନିଜର ତ୍ରିଶତକ ପୂରଣ କରିଥିଲେ। ହନିଫ ୯୭୦ ମିନିଟ୍ ଅର୍ଥାତ ୧୬ ଘଣ୍ଟା ୧୦ ମିନିଟ ବ୍ୟାଟିଂ ପରେ ୩୩୭ ରନ୍ କରି ଆଉଟ୍ ହୋଇଥିଲେ। ହନିଫ ଟେଷ୍ଟ କ୍ରିକେଟରେ ଶତକ କରିଥିବା ଏସିଆର ପ୍ରଥମ ଖେଳାଳି ପାଲଟିଥିଲେ। ନିଜ ପାଳିରେ ସେ ୨୪ଟି ଚଉକା ମାରିଥିଲେ। ତାଙ୍କ ପାଇଁ ଫଲୋଅନ୍ ଖେଳୁଥିବା ପାକିସ୍ତାନୀ ଟିମ୍ ମ୍ୟାଚ୍କୁ ଡ୍ର କରିବାରେ ସଫଳ ହୋଇଥିଲା। ଏହାକୁ ୬୩ ବର୍ଷ ବିତିଥିଲେ ହେଁ ଆଜି ବି ହନିଫ୍ଙ୍କ ବିଶ୍ୱ ରେକର୍ଡ ପୂର୍ବବତ ରହିଛି।
