କଳିଙ୍ଗନଗର,୧୮ା୫(ଡି.ଏନ.ଏ.):ବିଞ୍ଝାରପୁର ବ୍ଲକ ଜରି ପଞ୍ଚାୟତ ଅନ୍ତର୍ଗତ ଜରି ଗ୍ରାମର ଧନେଶ୍ୱର ସେଠୀ ଜଣେ ଭୂମିହୀନ ଓ ଦିବ୍ୟାଙ୍ଗ ବ୍ୟକ୍ତି। ଘର ନ ଥିବାରୁ ସେ ଓ ତାଙ୍କ ସ୍ତ୍ରୀ ଏବଂ ଦୁଇ ଝିଅ ବାଳମୁକୁଳିଠାରେ ଘର ଭଡ଼ା ନେଇ ରହୁଛନ୍ତି। ଧନେଶ୍ୱର ଏକ ପାନ ଦୋକାନ କରି ଦୁଃଖ କଷ୍ଟରେ ପରିବାର ଚଳାଉଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନାରେ ପ୍ରାଥମିକ ତାଲିକାରେ ତାଙ୍କ ନାମ ଅନ୍ତର୍ଭୁକ୍ତ ହୋଇଥିଲା। ମାତ୍ର ପରେ ତାଙ୍କ ନାମକୁ ଯୋଗ୍ୟ ତାଲିକାରୁ ବାଦ କରାଯାଇଛି। ସେ ବିଞ୍ଝାରପୁର ବିଡିଓ, ଯାଜପୁର ଜିଲାପାଳ ଓ କେନ୍ଦ୍ରମନ୍ତ୍ରୀ ଅର୍ଜୁନ ମୁଣ୍ଡା ବିଞ୍ଝାରପୁର ଗସ୍ତରେ ଆସିଥିବା ବେଳେ ତାଙ୍କୁ ଭେଟି ଅଭିଯୋଗ ଜଣାଇଥିଲେ। ହେଲେ ଏପର୍ଯ୍ୟନ୍ତ ତାଙ୍କୁ ଘର ଖଣ୍ଡିଏ ମିଳିପାରିନାହିଁ। ଏହି ଭୂମିହୀନ ପରିବାରକୁ ବସୁନ୍ଧରା ଯୋଜନାରେ ଜମି ଯୋଗାଇ ଦେବା ସହିତ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଯୋଗାଇ ଦେବାକୁ ଦାବି ହୋଇଛି।
