ଯାଜପୁରରୋଡ୍,୧୪।୫(ଡି.ଏନ.ଏ.): ଯାଜପୁର ଜିଲା ବ୍ୟାସନଗର ସହରରେ ଥିବା କିଛି ଘରୋଇ ନର୍ସିଂହୋମ ଓ ହସ୍ପିଟାଲରେ ଚିକିତ୍ସା ନାମରେ ଶୋଷଣ ଚାଲିଥିବା ଘଟଣା ସାମ୍ନାକୁ ଆସୁଛି। ଏହି କ୍ରମରେ ବ୍ୟାସନଗର ସହରସ୍ଥିତ କ୍ରିଷ୍ଣା ଆଇ ହସ୍ପିଟାଲରେ ଟଙ୍କା ପାଇଁ ଜଣେ ରୋଗୀଙ୍କୁ ଅଧା ଅସ୍ତ୍ରୋପଚାର କରାଯାଇ ଛାଡ଼ି ଦିଆଯାଇଥିବା ଅଭିଯୋଗ ହୋଇଛି।
ସୂଚନା ମୁତାବକ, ଉକ୍ତ ହସ୍ପିଟାଲକୁ ଗୁରୁବାର କୋରେଇ ଅଞ୍ଚଳର ଅବଦୁଲ ରେହମାନ ନାମକ ବ୍ୟକ୍ତି ଆସିଥିଲେ। ସମ୍ପୃକ୍ତ ହସ୍ପିଟାଲର ଡାକ୍ତର ତାଙ୍କୁ ପରୀକ୍ଷା କରିବା ପରେ ଆଖି ଅସ୍ତ୍ରୋପଚାର ପାଇଁ ପରାମର୍ଶ ଦେଇଥିଲେ। ଅବଦୁଲ ଗରିବ ଶ୍ରେଣୀର ହୋଇଥିବାରୁ ଟଙ୍କା ଯୋଗାଡ଼ କରିବା କଷ୍ଟସାଧ୍ୟ ହୋଇଥିଲା। ତେଣୁ ଅବଦୁଲଙ୍କ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଅସ୍ତ୍ରୋପଚାର ପାଇଁ ନିଷ୍ପତ୍ତି ନିଆଯାଇ ପ୍ରସ୍ତୁତି କରାଯାଇଥିଲା। ଅବଦୁଲଙ୍କୁ ଅସ୍ତ୍ରୋପଚାର ଗୃହକୁ ନିଆଯାଇ ଆଖି ପତାର ଚୁଟି କଟାଯାଇଥିଲା। କିନ୍ତୁ ଡାକ୍ତର ପ୍ରଫୁଲ୍ଲ କୁମାର ବେହେରା ଆଉ ୭,୫୦୦ ଟଙ୍କା ଲାଗିବ ଏବଂ ଜଲ୍ଦି ପୈଠ କରିବାକୁ କହିଥିଲେ। ଏଭଳି ପରିସ୍ଥିତିରେ ପରିବାର ଲୋକେ ଭାଙ୍ଗି ପଡ଼ିଥିଲେ। ତଥାପି ଟଙ୍କା ଯୋଗାଡ଼ କରି ଫୋନ ପେ’ ମାଧ୍ୟମରେ ପୈଠ କରିବାକୁ କହିଥିଲେ। ହେଲେ ଡାକ୍ତର ରାଜି ହୋଇ ନ ଥିଲେ। ଟଙ୍କା ନ ପହଞ୍ଚିବାରୁ ଡାକ୍ତର ତାଙ୍କୁ ଅସ୍ତ୍ରୋପଚାର ଗୃହରୁ ବାହାର କରିଦେଇଥିଲେ। ପରେ ଅବଦୁଲ ଜାଣିବାକୁ ପାଇଥିଲେ ତାଙ୍କ ଆଖି ଅଧାଅସ୍ତ୍ରୋପଚାର କରାଯାଇଛି। ଯନ୍ତ୍ରଣା ହେବାରୁ ସେ ପରବର୍ତ୍ତୀ ସମୟରେ ହସ୍ପିଟାଲକୁ ଆସି ହୋହଲ୍ଲା କରିଥିଲେ। କଥା ଯାଜପୁରରୋଡ୍ ଥାନା ପର୍ଯ୍ୟନ୍ତ ଯାଇଥିଲା। ତେବେ ମାଗଣାରେ ଅସ୍ତ୍ରୋପଚାର କରିବାକୁ ଡାକ୍ତର ପ୍ରତିଶ୍ରୁତି ଦେବା ପରେ ଅବଦୁଲଙ୍କ ପରିବାର ଶାନ୍ତ ପଡ଼ିଥିଲେ। ଅବଦୁଲଙ୍କ ପରିବାର ହସ୍ପିଟାଲ ଉପରୁ ବିଶ୍ୱାସ ତୁଟାଇଥିବାରୁ ଅସ୍ତ୍ରୋପଚାର କରିବେନି ବୋଲି ନିଷ୍ପତ୍ତି ନେଇ ଫେରି ଯାଇଥିଲେ। ତାଙ୍କ ବିଜୁ ସ୍ବାସ୍ଥ୍ୟ କାର୍ଡ ଟଙ୍କାକୁ ହସ୍ପିଟାଲ ତରଫରୁ ଫେରାଇ ଦିଆଯାଇଥିଲା। ଏ ସମ୍ପର୍କରେ ସମ୍ପୃକ୍ତ ଡାକ୍ତରଙ୍କୁ ପଚାରିବାରେ ସେ ଅସ୍ତ୍ରୋପଚାର କରିନାହାନ୍ତି ବୋଲି କହିଥିଲେ ା ଏଥିସହ ଘଟଣା ସମ୍ପର୍କରେ କିଛି କହିବାକୁ ଅନିଚ୍ଛା ପ୍ରକାଶ କରିଥିଲେ।
